37
Junni Jacóbori Canaán tinun tobi chuminue yachi apa Isaac chununtenan. 2 Junni in Jacóbochi naolaca itsanque cuwenta joe: Joseri chunca siete wata tan joto, yachi acolabe parejo opisa pequiranaminue. Yachi apachi sonala paluca Bílhabe Zílpabe jominlanue. Aman yalachi naolabe Joseri opisa pecuidainaminue. Junni yachi acolari seiton quilaquinari, yachi apabe manpamin jominue.3 Junni Israel yachi nao Joseca duque munaraminue. Aman Jacóbonan Israel mumunnan jominue. Junni Israel yachi nao Joseca man weyan naolaca fécari laquiraminue ya unica josa naica jonun tenchi. Junto Josechi uraran camisa cuwanue. 4 Junni Josechi acolari tenhilainue yalachi apari Josécari fécari laquiraeque. Junto paito nin seque pan quitumin jominlanue.
5-6 Junni man nete Josechi quipinue. Junni yachi acolabe cuenta quinan, fécari painaminlanue. Itsanque quipiquee tinue:
7 —Chiquila witabi trico tuntulaquinayoeque quipiquee. Juntonan lachi tunturi cupasi, tuca wiruie. Junni nulachi tunturi lachi tuntuchi awinta wiruilaie. Junto lachi tuntuchi awinta jera telenhilaieque quipiquee tinue.
8 Junni yachi acolari beconan manpato itsantilatinue:
—Nuri tsanque pato, seitonque pánae. ¿Ti quichun chiquilaca mantamin miya joanae tinayun? tilatinue.
Tsanque quipiqueeque cuenta quinan, painaminlanue.
9 Junni Josechi manan quipiquinue. Junto yacanan yachi acolabe cuenta quito itsantinue:
—Man quipiman quee. Junni jun quipibiri yobe pebe, junte nechi chunca manca tsabola lachi cale telenhilaie tinue.
10 Junni José yachi apabe, yachi acolabe junca cuenta quinan, yachi apari wepanato itsantinue:
—¿Ti quichun tsanque quipi tinayun? ¿Junni nuchi ayan, nuchi acola, junsi lanan nuchi cale telenhino jocaichinan? tinue.
11 Junni yachi acolari fécari painaminlanue. Juntonan Josechi apari duque tenca canaminue ya quipi tinun tenchi.
Josechi acola yaca osilaquinunca
12 Junni man mate Josechi acola Siquem pueblo quelobi tape neyabi jilainue yalachi apachi opisachi. 13 Junni Israel Josebe itsantinue:
—Quirade! Nuchi acola Siquem quelobi ralarae tinue opisa cuidaito. Yala niyan jolajonunca quirabi jisa tenjae tinue.
Junni Joseri beco manpato itsantinue:
—Joo, jichinayoe tinue.
14 Junni Israel se joe tinue. Quirabi jide! nuchi acola, junsi opisala niyan jolajonunca. Junsi we manjana! tinue manmiichun.
Junni Israel mantaca jun, Joseri Hebrón quelote nechi jinue. Junsi Siquem quelobi neyato nenatonan, feno podeitunue. 15 Junnasa tsachi manca yabe tulaito itsanque panhanue:
—¿Nuri tica neyato nenayun? tinue.
16 Joseri beco manpato itsantinue:
—Lachi acolaca neyato nenayoe tinue. ¿Junni pansileri nu miitoyun? nunchi opisa cuidaito ralaranunca.
17 Junni ya tsachiri itsantinue:
—Inte nechi jicalae. Dotanca jilainayoe ticalae tinue.
Junni José junca merasi, yachi acolaca neyabi jito, Dotán pueblo quelobi yalaca manfenue. 18 Junni ya acolari José nuwiri janaminca quirato, caquelo fatusanan, totechun tenpalaquinue. 19 Yala tala itsantilatinue:
—Quirade! Jabi janae quipi quiramin aco. 20 Yaca totelaquisa! latinue. Toteto, forochi quepontsan joe latinue. Junto apaberi itsantintsan joe: Jelenchi nenamin animali fica jonhoe tintsan joe. Junni yachi quipi jera epe patichunae latinue.
21 Junni Rubenni junca merasi, yari Joseca se larichi tinue yape yachi weyan acola totelaquitusa. Yari itsantinue:
22 —Chiquilanan totetuntsan joe tinue. In forochi quepolaquisa! Junbi nechi manlono podeituto, tenca mántanan puyachunae. Chiquilari niyannantiya quitusanan tenca mántanan puyaniichunae tinue.
Rubén Joseca forobi nechi nosa manlarito, yachi apachica mantanjino jominue. Junto tsantinaminue. 23 Junnasa José fanue. Junni yachi acolari ya uraran camisa pominca laricato, 24 yaca chuito, forochi queerelaquinue. Pi iton, fu foro jominue. 25 Tsanquetobi, ano fichun chudilainue.
Junni ano finasa, ismaelítala Galaabi nechi janaminlanue. Cameyobi carca tanjinaminlanue osichun. Puban pibe, pomadabe, mira tinun puban pibe tanjinaminlanue Egipto tobi osichun. 26 Junni Judari yachi acolabe itsantinue:
—Chiquilachi aco Joseca totetori, ¿tica canaicaichunan? tinue. Nanni ina nene pano jochunae niyaito puyaca jonunca monantiya miilaitusa. 27 Totenari seitochunae. Junbe quirachun. Ismaelítalachi osilaquisa! Tsanqueri chiquilachi acoca totecaituchunae tinue.
Junni weyan acolari se joe latinue. 28 Junni yala titiya osito caminla, Madianbi nechi jominla, junse polelainue. Junni aman Josechi acolari yaca forobi nechi manlarito osilaquinue palu chunca calaca quica jun piti cato. Tsanque Joseca Egíptoca tanjilainue.
29 Osilaquinasa, Rubén junte peitominue. Junni manjatobi, foroca jinue Joseca manse laribi. Jun quiranari, junbi itominue. Junca quirato, Rubén yachi camisaca chilenue duque laquichi. 30 Junsi weyan acolachica manjato, itsantinue:
—Chiquilachi aco forobi itoe. ¿Aman niyan quino joinhin? tinue.
31 Junni yalari Josechi camisaca cato, chibo manca toteto, jun asanca Josechi camisa jominbi mitelaquinue. 32 Junni camisaca yachi apachica in fiquibe manherelaquinue: In camisaca manfelaiyoe. Sele quirana! tinue pansile Josechi camisa jotun. 33 Junni Jacóbori camisaca quirato miinue Josechi joeque. Miisi, itsantinue:
—In camisari lachi naochie. Yaca jelenchi ti animalitiya chitalulu cato, fica jonhoe tinue. 34 Junni Jacobo yachi tsanpaca chilenue duque laquichi. Junsi laqui joto ponun camisaca poto, duque numarinca wareto nenaminue yachi nao puyaca joe tito. 35 Yachi naolari, namalari nantari waretude! tinasanan, yari merátuchi tinue. Ya yachi naochi tenchi warenato, itsantinue:
—La puyano fecári lachi naoca laqui joanae tinue.
36 Junnasa Madián to comersiantela Egipto tobi Joseca osilaquinue. Potifárichi osilaquinue. Junni ya Potifar Egipto to miyachi ministro jominue. Aman Egipto fiquichi miyaca Faraón tinun jominlanue. Junni ya Potifar ministro jotonan, Faraonca isaimin soldado capitannan jominue.