Diosi caque quica jun cosala
(Génesis)
Diosi titiya jera quinunca
1
Casale casaleri Diosi yoquidobe tobeca quinue. 2 In tori niyaquenantiya molde itominue. Jeralete lamarisiri jominue. Wapun nemen jominue. Junni Diosichi Tencari jun pile nechi jamobile titiya quichun raminue. 3 Junsi Diosi itsantinue: Tsen jode! tinue. Junni tsantinunsiri tsen inue. 4 Junni Diosi tsen jominca quirato, se joe tinue. Junsi tsenbe nemenbe chican suwanue. 5 Tsen óra jominca malon tinun jochunae tinue. Nemente óraca mantimini quepen tinun jochunae tinue. Tsanque casale ma jerainue.6-7 Junsi manan Diosi itsantinue: Jola jode! yape pi palu posto isa. Junnunsi wu josa jola inue. Weyan piri jola minu tenpe purainue. Weyan jamochi purainue poyobi. 8 Junsi Diosi itsantinue: Jamochica yoquido tinun jochunae tinue. Tsanque casale to quicale nechi palu ma jerainue.
9 Junni Diosi itsantinue: Pica man postori layaisa tinue yape to quiraisa. Junni tsantinunsi, tsanhinue. 10 Junni Diosi itsantinue: Pi iton postoca to tinue. Pi layaica jun postoca lamari tinue. Junni Diosi jera se joe tito quiranue. 11 Tsantisi, piyanle ni imin lapa tsanlaca, junsi piyanle puca imin chide pelelaca lasa tinue. Ya pucabi ni pun jochunae. 12 Junni yala jerale lalainue. Jun ni suto uwaito, jun ninan manhimin jominue. Junca Diosi jera se joe tito quiranue. 13 Tsanque casale to quicale nechi peman ma jerainue.
14-15 Junni Diosi itsantinue: Yoquidobi nechi tseminla jode! tinue yape tobi tsen josa, yape malon jun, quepen jun, josa. Ya tseminlari wata, junsi tienpo micuwaminla jochunae tinue. Junni tsanhinue. 16 Diosi paluca tsemin quinue. Fe duque tsemin malon tsesa, mancaca quepen tsesa quinue. Junsi tsabocanan quinue. 17 Diosi yoquidobi nechi tseminca suwanue yape tobi tsesa. 18 Manca tsenasa, malon jominue. Junni manca tsenasa, quepen jominue. Junni Diosi junca quirato, se joe tinue. 19 Tsanque junpalu ma jerainue to quicale nechi.
20 Junni mante ma inasa, Diosi itsantinue: Piyanle pibi nenamin animalilaca pibi josa tinue. Junsi pichulacanan josa tinue to jamo jajilainasa. Junni tsanhinue. 21 Lamaribi nenamin jelelen animalilacanan, piyanle uyan lamaribi sonnaminlacanan quinue. Junsi jerale pichulaca quinue. Yala jeralela na quinan, jun tsannan jominlanue. Junni Diosi piyanleca jera quirato, se joe tinue. 22 Jun animalilaca quito, yalaca itsantito bendesiquinue: Duque seralaina! tinue. Lamaribi jerale postote jolajosa, junsi pichulaca jun tsanquenan piyanle tote duque jolajosa bendesiquinue. 23 Tsanque mante ma jerainue to quicale nechi. 24-25 Junni Diosi itsantinue: Tobi piyanle animalilaca, piyanle tsachila tanun animalilaca, jelenchi nenamin animalilaca tobi josa tinue. Diosi ya animalilaca jera quito, jera se joe tito quiranue.
26 Junsi Diosi itsantinue: Aman tsachilaca quilaquisa! Yalari chiquila cuwenta jolajochunae. Mantá talarachunae. Watsalaca, pichulaca, walalaca, susulaca, quelalaca, curulaca, pinilaca, matelaca, junsi piyanle animalilaca mantá talarachunae tinue. 27 Junto Diosi tsachilaca quinato, ya cuwentanan suwanue. Junsi aman unilabe sonabeca quinue. Junto yalaca bendesiquinato, itsantinue: Duque seralaina! 28 Jerale tote chuto, mantá talarana! Watsa tsanlaca, pichu tsanlaca, ti animalilacatiya mantasa nulachi mantá cuwanayoe tinue.
29 Junsi Diosiri itsantinue: Meralaquede! Nulachi ano cuwanayoe yape filaquisa. Jerale tote pelebi imin nica, junsi chidebi imin pucaca, arosi, trico, piyo, lati, tsa ano tsanlaca nulachi cuwanayoe tinue. Nulari in jeraca fino podeilaichunae tinue. 30 Junsi animalilachinan, pichulachinan, lapaca, tapeca cuwanayoe tinue yape filaquisa. Junni tsanhinue. 31 Junni jeraleca quirato, duque se joe tinue. Tsanque sota ma jerainue to quicale nechi.