Iriotaque Tasorentsi cantacoventajeiterine tseencantatsiri
50
Yora Tasorentsisanori, iriotaque Itasorentsite yora ijitasorentsitashiyeetari,ineanataqueri aisati icajemaqueri maaroni savicayetatsiri quipatsiqui jaocapeerica.
2 Ishipaquireaque Tasorentsi anta nampitsiqui Sión, ora cameetsatasanotatsiri.
3 Coraquetaque Atasorentsite, impocaje,
iro cantaincha eiro omajereitetitsi,
ojivatapaaqueri paamari tsoncantatsiri,
aisati oshoncaqueari antearo tampea.
4 Anta jenoqui incajemajeiteri Tasorentsi
inquitesatipee aisati quipatsisati
impocajeite irameneri incantacoventajeiteri ishanincajeitajari.
5 Icantiri: “Pampatoteri maaroni quemisantasanotaquenari,
yora quearioventaquenarori icarajeitaquena, yoanari virantsi.”
6 Onta inquite, iotacaajeitee cameetsa icantacoventanti Tasorentsi.
7 Icanti aisati: “Pinquemisantena
ishanincajeitaniri Israel, noshanincajeitajari,
noncamantasanotempiro paitapeerica piotantearori.
¡Narotaque Tasorentsi, Pitasorentsite!
8 Te noncantimentempiri poapinijeitanari virantsi,
aisati pitaasanotanari altariqui.
9 Te noncoacotempiji poyena irijani pivacate
aisati chiivojaniqui shirampari.
10 Tempa nashijeitacari maaroni poshiniripee inchatomashiquiniri,
aisati iquempeta vacapee timatsiri ocatsincaiteapai, coquiyetatsiri;
11 aisati nashijeitacari vanquiyetachari timatsiri toncaaripeequi,
aisati maaroni cajemayetatsiri oantsipeequi.
12 Ariorica ayena notashe,
eiro nocoacojeitimpitsi pimpena noyeari;
tempa narotaque ashitarori quipatsi
aisati maaroni timantayetarori.
13 ¿Noarimpa ivatsa vaca
aisati nirirompa iriraja chiivo?
14 Pimpasonquitimenteri Tasorentsi pipayetiriri,
pimoncarateneri Inquitequiniri picashiacaasanotiriri.
15 Pincajemena ariorica ompomerentsitimotempi paitapeerica;
aitaque nojocaacoventaquempi,
aviroquea pincatsajeitenane.”
16 Irintiquea caari cameetsajeitatsi incanteri Tasorentsi:
“¿Jaoca pijitari picantashitantarori nocantasanovetari,
aisati pineanatacotashitaro Nocantacantiri,
17 teerica onimotempiji noametempi,
aisati tee catsini pineacameetsatero noneane?”
18 Irintiquea coshintipee paacameetsati.
¡Picarajeitiri aimentarori ijina!
19 Pineaveetashiyetaro caari cameetsatatsi
aisati piotashiyeeta pitseeya, te pimajeretimateji.
20 ¡Picantimatapinitiri pishaninca,
aisati iriori pirentisanori pitseenquiri!
21 Maaroni ocapee pantayetiri, te noncantimentempiro;
pijitacantashijeita noquempejeitimpi.
¡Iro cantaincha aitaque noncantasanotaquempi;
noasanquetaimentempiro pantayetaqueri!
22 “Pinquemasanotavaquero oca, avirojei peacojeitariri Tasorentsi,
eiroquea nintantimpitsi noasanquetaajeitempi,
aisati tecatsi jocaacoventajeitempine.
23 Yora quearioventasanotirori ipasonquitana,
iriotaque pincatsatanari.
¡Noavisaacoteri maaroni antayetirori nocoacairiri!”