Iipatsite ishanincasanoripeeni Efraín jeri Manasés
16
Jero iipatsite iriori ishanincajeitaniri José. Oponeanaca otsapijaqui Jordán isotoapinitinta catsirincaiteri, irosati toncaariqui osotoaajayetapai nija Jericóquiniri. Irosati ojatanaque caaraiteriqui, avisanaquero otoncaariyetapai Jericó irosati namitsiqui Betel. 2 Aitaque oponeanajari nampitsiqui Betel (pajitachari aisati Luz), avisanaquero iipatsite arquitapee irosati Atarot. 3 Impoiji ojatanaque iqueapinitinta catsirincaiteri iipatsite jafletitapee, irosati overantapaaca Bet-horón quirincaniri aisati Guézer, irosati osotoantapaaca incajarequi Mediterráneo. 4 Irotaque yaajeitaqueri ishanincasanoripeeni Manasés jeri Efraín, ishanincajeitaniri José.Iipatsitepee ishanincasanoripeeni Efraín
5 Jero overaayetacari iipatsite iriori ishanincasanoripeeni Efraín oponeanaca isotoapinitinta catsirincaiteri: Atarot-adar irosati nampitsiqui catonconiri Bet-horón. 6 Ojatanaque aisati irosati incajarequi Mediterráneo, irosati overantapaaca catonconiri Micmetat. Ari oponeanaja isotoapinitinta catsirincaiteri irosati Taanat-siló, avisanaquero Janóah. 7 Oirincanaca Atarot aisati Naará, irosati Jericóqui aisati osotoapaajiro nija Jordán. 8 Ari oponeanaja aisati Tapúah, oijatanaquero iqueanajinta catsirincaiteri osanteni Caná, irosati incajarequi Mediterráneo. Irotaque iipatsite yaajeitaqueri iriori ishanincasanoripeeni Efraín, ipavacaajeitacari icaratasanojeiti iriori. 9 Aisati yaacojeitaquero nampitsipee jero tsipanampiyetarori timatsiri iipatsitequi ishanincasanoripeeni Manasés. 10 Iro cantaincha yora ishanincasanoripeeni Efraín te irojocajeiteriji canaaaneopee savicajeitatsiri Guézer, ishinejeitaqueri isaviquimojeitaqueri. Irointiquea icoacotapinijeitiri quireequi ipapinijeitiri, irosati icanta meeca isaviquimojeitiri.