2 “Pincanteri jivatacaajeitiriri ishanincasanoripee iramayetaque aparopee irinchaquiire yajiriquiri, oncarate 12 ampatoanaquea. Impoiji pisanquenayetero ivajiropee irinchaquiirequi aparopeeni. 3 Ora irinchaquiire ishanincapeeni Leví, pisanquenatero ivajiro Aarón. Ocameetsati ontimayete aparopee irinchaquiire jivatacaayetiriri ishanincasanoripee. 4 Impoiji poayetero Pancotsiqui papatotimentantanari, omontetaquearo Cajón otimantari Nocantacantiri, noquenquetsatacantapinitimpiri. 5 Irosati noshiocacantaquearo irinchaquiire nocoyeasanotaqueri, eiroquea noquemapinitantajaritsi pishanincapee incantimajeitajempi.”

6 Ari icamantaqueri Moiseshi ishanincapee. Irosati yamantayetaca jivatacaayetiriri ishanincasanoripee aparopeeni irinchaquiire. Ocarataque 12 apatoanaca; oconoacaro irashi iriori Aarón. 7 Impoiji yoatiayetaquero Moiseshi Inantariqui Tasorentsi, imontetacaaquero Cajón. 8 Ari oquitaiteamanaji ijatamanaque, ineapaatiiro irinchaquiire Aarón, ishanincapeeni Leví, shiocanaque aisati teaquitanaque; otimanaque oitsoqui inquiniroqui iracaquitaque. 9 Irosati yaantajaro Moiseshi maaroni irinchaquiirepee, yonijaaqueri ishanincapee. Ineajeitantacarori, irosati yaantayetajaro aparopeeni.

10 Ari icantiri Tasorentsi Moiseshi: “Poimpiajero irinchaquiire Aarón, pimontetacaajero Cajóqui otimantari Nocantacantiri. Aitaque pinquempoyeerori. Irotaque inquenqueshirejeitantearori pishanincapee piatsajeitachari, eiroquea ineaveetimotantajanarotsi caari cameetsatatsi, icamajeiticari.”

11-12 Ari imataquero Moiseshi maaroni icantaqueriri Tasorentsi. Iro cantaincha yora ishanincapee icantajeitiri Moiseshi: “¡Peaarantajeitaquee! ¡Ancamajeiteni maaroni! 13 Maaroni quempejitearone Inantari Tasorentsi, incamajeite. ¡Antsoncajeiteampa ancamajeite maaroni!”