149
Häˊ hnähꜘ kihꜗ DSAˉJØ̱Ø̱Hˈ jnänˋ ko̱o̱ˉ su̱ꜚ hmëëꜘ.Läꜙja̱ˉ jeeˊ dsaˉñeeꜙ hi̱ˉ naˉjngëëˈ kya̱a̱yꜗ, waˊ häꜘ kiyhꜗ.
2 Hnähꜘ dsaˉ Israel,
waˊ cha̱a̱ˉ hnähꜘ lluꜗ kya̱a̱hˊ hi̱ˉ gaꜙjmääꜗ hnähꜘ.
Hnähꜘ hi̱ˉ cha̱a̱ˉ jwɨɨˉ Sión,
waˊ cha̱a̱ˉ hnähꜘ lluꜗ kya̱a̱hˊ dsaˉtaˊ jø̱ø̱hˈ kya̱a̱hꜗ hnähꜘ.
3 Jmeeˊ hnähꜘ ja̱ˊ jeeˊ jmeehˉ hnähꜘ jʉʉhˉ kiyhꜗ.
Baꜗ hnähꜘ pandero, saꜗ hnähꜘ tu̱ˉ jeeˊ häˊ hnähꜘ kiyhꜗ.
4 Jëëhꜘ DSAˉJØ̱Ø̱Hˈ jnänˋ cha̱a̱yˉ lluꜗ kya̱a̱hˊ dsaˉ kya̱a̱yꜗ.
Lla̱a̱yꜗ lluꜗ hi̱ˉ täˉñeeꜘ hiꜙ lä̱ä̱yꜗ kaˉlähꜘ.
5 Läꜙjë̱ë̱ꜙ hnähꜘ hi̱ˉ naˉjngëëˈ
waˊ jë̱ë̱ꜘ hohꜘ hnähꜘ läꜙlluꜗ heˉ miˉjä̱ä̱yꜗ hnähꜘ.
Jeeˊ sa̱a̱ꜘ hnähꜘ nëˊ ji̱i̱ˊ, häˊ hnähꜘ kiyhꜗ.
6 Hnähꜘ dsaˉ Israel, häˊ hnähꜘ kihꜗ Dio.
Cho̱o̱hˈ hnähꜘ ñeˈ heˉ naˉjniiˊ läꜙto̱ꜘ jwooˈ,
7 mahꜗ te̱e̱hˉ hnähꜘ jwɨɨ˜ kihꜗ läꜙjë̱ë̱ꜙ nääꜗ dsaˉ,
hiꜙ heehˈ hnähꜘ wɨɨꜘ läꜙjë̱ë̱ꜙ goˉte˜ dsaˉ jmɨˉgyʉʉꜙ.
8 Hñuuhˋ hnähꜘ dsaˉtaˊ ka̱a̱hˊ kya̱a̱yˈ kya̱a̱hˊ caden˜.
Läꜙja̱ˉ jmeehˈ hnähꜘ kihꜗ dsaˉka̱a̱hˊ kya̱a̱yˈ kaˉlähꜘ.
9 Jmeehˈ hnähꜘ kiyhꜗ läꜙko̱o̱ˉ teꜗ lleˋ leꜘ kiyhꜗ.
Heˉ ja̱ˉ baˊ laˈ ko̱o̱ˉ taˊ jʉʉhˉ
heˉ jmeeꜗ hi̱ˉ naˉjngëëˈ kya̱a̱yꜗ. ¡Aleluya!