144
¡Heˉ baˊ cheˉ llu̱u̱ꜗ DSAˉJØ̱Ø̱Hˈ jnänˋ,hi̱ˉ la̱a̱ꜗ kinꜙ läꜙko̱o̱ˉ ku̱u̱ˊ hlooˉ!
Hñiiꜘ bihꜗ miˉtë̱ë̱yꜙ jnäꜘ haˉ läꜙ jmeenˋ
gaˊ maˉchehnꜗ jeeˊ hniiˉ.
2 Hi̱ˉ heꜘ la̱a̱ꜗ omeꜚ kya̱a̱nꜙ hi̱ˉ chehꜗ nëˊ kinꜙ.
Hi̱ˉ heꜘ kwaꜙ jeeˊ hmäähnˊ hiꜙ lä̱ä̱y˜ jnäꜘ.
La̱a̱yꜗ läꜙko̱o̱ˉ ñeˈ heˉ hɨɨˉ hløøꜘ jeeˊ lä̱ä̱y˜ hñiiyꜘ.
Hñiiyꜘ jmeeyꜙ nʉʉhˊ dsaˉ kya̱a̱hˊ jnäꜘ.
3 DSAˉJØ̱Ø̱Hˈ kya̱a̱nꜙ,
¿heeˉ baˊ la̱a̱ˈ dsaˉ heˉ kye̱hˊ hʉʉˊdsëˉ kiyhꜗ?
¿Heeˉ baˊ la̱a̱ˈ dsaˉ jmɨˉgyʉʉꜙ heˉ jmeehˉ heˈ kiyhꜗ?
4 Dsaˉ jmɨˉgyʉʉꜙ la̱a̱yꜗ läꜙko̱o̱ˉ lleꜘ heˉ dsaˉngëëꜘ.
Ji̱ˉñeˉ kiyhꜗ laꜗ läꜙko̱o̱ˉ hi̱i̱hˈ heˉ dsaˉä̱ä̱hꜗ.
5 Hiiꜘ hwa̱a̱ꜗ gaˊ miihˉ gyʉʉhˈ jmɨˉgyʉʉꜙ mahꜗ jña̱a̱ˋ.
Jmeeˊ hihꜙ kihꜗ mohꜘ mahꜗ hwëëˉ ñeˊ.
6 Hëëꜙ kihꜗ hi̱ˉ naˉhøøhˊ kyahˈ kya̱a̱hˊ jeꜚñihꜗ kya̱a̱hꜗ.
Jmeeˊ waˊ kyʉ̱ʉ̱ˈ taꜙ laꜙ taꜙ jnøꜙ hi̱ˉ naˉhøøhˊ kyahˈ.
7 Läꜙ gaꜙtëꜘ gyʉʉhˈ hiiꜘ goohˉ nëˊ kinꜙ
mahꜗ lä̱ä̱ˋ jnäꜘ heˉ jëën˜ chaˉmiihˉ wɨɨꜘ.
Laꜗ läꜙko̱o̱ˉ heˉ ngooꜗ gaꜙhmäähnꜗ chaˊjmɨɨˉ juuhˉ.
Lä̱ä̱ˋ jnäꜘ kihꜗ dsaˉ hi̱ˉ maˉyaˉnääꜗ ʉ̱ʉ̱ꜘ.
8 Läꜙjëꜙ heˉ hlëëyhꜙ laꜗ juuˈ taˉjuuˈ jmahꜗ.
Jmeeyꜙ dsooꜘ heˉ laꜗ juuˈ taˉjuuˈ,
läꜙji̱i̱hˈ hɨɨyˉ gooyˉ raˉllu̱u̱ꜗ.
9 Kyahꜗ hneˉ Dio kya̱a̱nꜙ, hänˋ ko̱o̱ˉ su̱ꜚ hmëëꜘ.
Hänˋ kyahˈ kya̱a̱hˊ tu̱ˉ heˉ chooˈ gyaꜗ sɨˊñeꜗ.
10 Hneˉ hi̱ˉ jmeeꜙ lɨhˈ dsaˉtaˊ ka̱a̱hˊ.
Hneˉ hi̱ˉ maˉlä̱ä̱ꜗ David hi̱ˉ jmeeꜙ taˊheꜗ kyahꜗ,
saꜙ gaꜙju̱u̱yꜗ kya̱a̱hˊ ñeˈtuuhꜚ.
11 Lä̱ä̱ˋ jnäꜘ kihꜗ dsaˉ hi̱ˉ maˉyaˉnääꜗ ʉ̱ʉ̱ꜘ.
Läꜙjëꜙ heˉ hlëëyhꜙ laꜗ juuˈ taˉjuuˈ jmahꜗ.
Jmeeyꜙ dsooꜘ heˉ laꜗ juuˈ taˉjuuˈ,
läꜙji̱i̱hˈ hɨɨyˉ gooyˉ raˉllu̱u̱ꜗ.
12 Chihˉñʉʉhˉ jnänˋ,
waˊ kwa̱a̱yꜘ läꜙko̱o̱ˉ dsaˉkwa̱a̱ꜙ chaahˈ nuuˉ eehˉ.
Chihˉmëꜘ jnänˋ,
waˊ jnä̱ä̱yꜘ naˊhñaahꜗ läꜙko̱o̱ˉ jwɨˊ ku̱u̱ˊ jihˈ
heˉ jmeeꜙ dsaˉ hmaˉdsëˉ kihꜗ ko̱o̱ˉ hneꜗ jʉʉhˉ.
13 Läꜙjëꜙ nëëˈ mɨɨˈ heˉ kihˉhi̱hˉ jneˊ,
waˊ läꜙchaˉ jnänˋ chaˉmiihˉ.
Läꜙja̱ˉ jahꜘ jnänˋ,
waˊ läꜙjwë̱ë̱yꜘ chaˉgaˊmiihˉ ko̱o̱ˉ häˊ ko̱o̱ˉ häˊ.
14 Kyaˊtehˈ jnänˋ waˊ kye̱yˉ carret heˉ naˉka̱hˈ goˉte˜.
Taꜙ kwaˉ jwëˈ kihꜗ hi̱ˉ naˉhøøhˊ saˊhlayꜗ naˊhyahˉ heˉ chihꜗ läꜙkuˊ läꜙji̱i̱ꜗ jeeˊ jwɨɨˉ jnänˋ.
Taꜙ waˊ jmeeyꜘ hniiˉ jeeˊ jwɨɨˉ jnänˋ.
15 ¡Heˉ baˊ cheˉ lluꜗ kihꜗ jeeˊ jwɨɨˉ heˉ laꜗ läꜙja̱ˉ kihꜗ!
¡Heˉ baˊ cheˉ lluꜗ kihꜗ dsaꜙ
cherˊmahꜗ DSAˉJØ̱Ø̱Hˈ jnänˋ la̱a̱yꜗ Dio kya̱a̱yꜗ!