135
Häˊ hnähꜘ kihꜗ DSAˉJØ̱Ø̱Hˈ jnänˋ.Läꜙjë̱ë̱ꜙ hnähꜘ hi̱ˉ jmeeꜙ taˊheꜗ kiyhꜗ, häˊ hnähꜘ kiyhꜗ.
2 Läꜙjë̱ë̱ꜙ hnähꜘ hi̱ˉ tä̱ä̱hˊ chaˊnehꜙ kiyhꜗ,
läꜙjë̱ë̱ꜙ hnähꜘ hi̱ˉ gaꜙnääˊ hoˊhneꜚ kihꜗ Dio jnänˋ,
3 häˊ hnähꜘ kihꜗ DSAˉJØ̱Ø̱Hˈ jnänˋ jëëhꜘ lluꜗ dsëyꜗ.
Häˊ hnähꜘ kiyhꜗ kya̱a̱hˊ salmo, jëëhꜘ llu̱u̱yꜗ goˉte˜.
4 Jëëhꜘ, DSAˉJØ̱Ø̱Hˈ jnänˋ gaꜙlle̱e̱yhˉ jo̱o̱ꜘsɨɨhˊ Jacob,
gaꜙlle̱e̱yhˉ läꜙjë̱ë̱ꜙ dsaˉ Israel mahꜗ le̱e̱ꜘ dsaˉ kya̱a̱yꜗ.
5 Jëëhꜘ, jnäꜘ manꜙ DSAˉJØ̱Ø̱Hˈ jnänˋ baˊ hi̱ˉ jø̱hˈga̱a̱ˉ.
Ja̱a̱ˉ hi̱ˉ heꜘ baˊ jø̱ø̱hˈ gaˊ kihˈ jeeˊ läꜙjë̱ë̱ꜙ dio hi̱ˉ naˉla̱a̱ꜚ ka̱a̱h˜ dsaˉ.
6 Läꜙjëꜙ heˉ hyohˉ dsëꜗ DSAˉJØ̱Ø̱Hˈ jnänˋ jmeeˈ läꜙka̱a̱ˉ gyʉʉhˈ hwaꜗ, jmeeyꜗ baˊ.
Läꜙja̱ˉ kaˉlähꜘ nëˊ jmɨˉñeehꜚ hiꜙ läꜙ gaꜙtëꜘ nehꜙ hwaꜗ,
leꜘ jmeeyꜗ läꜙ hyohˉ dsëyꜗ.
7 Hñiiyꜘ jmeeyꜙ sooˉ jniiꜘ läꜙka̱a̱ˉ gyʉʉhˈ jmɨˉgyʉʉꜙ,
jmeeyꜙ gwaꜘ jmaꜗ, jmeeyꜙ hɨ̱ɨ̱ˊ ñihꜗ hiꜙ näy˜ tooꜚ lleꜘ.
8 Hñiiyꜘ gaꜙjngëëyhꜗ jo̱o̱ꜘ dsaˉ Egipto
hi̱ˉ la̱a̱ꜗ hi̱ˉ ñʉʉhˉ toˉnëˊ kya̱a̱yˈ,
hiꜙ läꜙkye̱ˉ jo̱o̱ꜘ jahꜘ
hi̱ˉ la̱a̱ꜗ jahꜘ dsooꜗ toˉnëˊ kya̱a̱yˈ gaꜙjngëëhꜗ Dio.
9 Gaꜙche̱e̱yꜗ chaˉmiihˉ heˉ jʉhˉga̱a̱ˉ nëˊ kyahꜗ hnähꜘ dsaˉ Egipto,
heˉ gaꜙtohꜘ nëˊ kihˈ Faraón
hiꜙ läꜙkye̱ˉ kihꜗ hi̱ˉ maˊ jmeeꜙ taˊheꜗ kiyhꜗ.
10 Gaꜙlɨyhꜗ gaꜙllaꜙdsëëyˋ kihꜗ chaˉmiihˉ nääꜗ dsaˉ,
gaꜙjngëëyhꜗ dsaˉtaˊ ka̱a̱hˊ hi̱ˉ hä̱ä̱ˈ jwërte.
11 Gaꜙjngëëyhꜗ Sehón
hi̱ˉ maˊ la̱a̱ˈ dsaˉtaˊ kya̱a̱ˈ dsaˉ amorreo,
läꜙja̱ˉ Og hi̱ˉ maˊ la̱a̱ˈ dsaˉtaˊ hwaˈ Basán,
läꜙja̱ˉ gaꜙjngëëyhꜗ läꜙjë̱ë̱ꜙ dsaˉtaˊ kya̱a̱ˈ dsaˉ Canaán.
12 Hwaꜗ jeeˊ maˊ tä̱ä̱hˊ hi̱ˉ heꜘ gaꜙkwëëyhꜗ dsaˉ Israel.
Hwaꜗ ja̱ˉ gaꜙlaꜗ he̱e̱ꜚ dsaˉ kya̱a̱yꜗ.
13 Hneˉ cha̱a̱hˉ läꜙjëꜙ johꜘ jmɨɨˊ chaˉ, DSAˉJØ̱Ø̱Hˈ kya̱a̱nꜙ.
Ko̱o̱ˉ kyooˉ baˊ ngooˈ hiiꜘ juuˈ kyahꜗ hneˉ, DSAˉJØ̱Ø̱Hˈ kya̱a̱nꜙ.
14 Jëëhꜘ hñaahꜗ baˊ hneˉ noohˈ nëˊ kihˈ dsaˉ kya̱a̱hꜗ.
Maꜙraꜙ heˉ läˉñihꜘ baˊ hohꜘ kihꜗ hi̱ˉ jmeeꜙ taˊheꜗ kyahꜗ.
15 He̱e̱hꜚ heˉ naˉlaꜚ kooh˜ dsaˉ hi̱ˉ saꜙ kyu̱u̱ꜙ Dio,
laꜗ kya̱a̱hˊ kuˊnøøꜚ kuˊtøøˉ,
ja̱ˉbaˊ heˉ jmeeyꜙ hñiiyꜘ kya̱a̱hˊ gooyˉ.
16 Chaˉ toˉhooyˊ, pero saꜙ hlëëyhꜙ.
Chaˉ mɨˈnëyˊ, pero saꜙ jëëy˜.
17 Chaˉ toˉgwayˊ, pero niꜙ miihˉ saꜙ nuuyˉ.
Niꜙ miihˉ saꜙ häˊ lleꜘ tuhˉdsëyꜗ.
18 Ja̱ˉbaˊ läꜙko̱o̱ˉ la̱a̱ꜗ dio heꜘ, läꜙja̱ˉ la̱a̱ꜗ dsaˉ hi̱ˉ gaꜙjmääyꜗ,
hiꜙ ja̱ˉbaˊ läꜙja̱ˉ la̱a̱ꜗ hi̱ˉ kye̱ˉ oˉjø̱hꜙ dsëˉ kihꜗ dio heꜘ.
19 Hnähꜘ dsaˉ Israel, häˊ hnähꜘ kihˈ DSAˉJØ̱Ø̱Hˈ jnänˋ.
Läꜙja̱ˉ hnähꜘ saˊju̱ˉ kihꜗ Aarón, häˊ hnähꜘ kiyhꜗ.
20 Läꜙja̱ˉ hnähꜘ saˊju̱ˉ kihꜗ Leví, häˊ hnähꜘ kiyhꜗ.
Läꜙjë̱ë̱ꜙ hnähꜘ hi̱ˉ ga̱hꜙ DSAˉJØ̱Ø̱Hˈ jnänˋ, häˊ hnähꜘ kiyhꜗ.
21 Hnähꜘ hi̱ˉ tä̱ä̱hˊ jwɨɨˉ Sión,
häˊ hnähꜘ kihꜗ DSAˉJØ̱Ø̱Hˈ jnänˋ hi̱ˉ gyaꜗ ja̱ˉbaˊ jeeˊ jwɨɨˉ ja̱ˉ heˉ jähˊ jneˊ kihˈ Jerusalén. ¡Aleluya!