122
Peerꜙ jë̱ë̱ˉ dsënꜙ waˊraˉ gaꜙsɨɨhꜙ dsaˉ jnäꜘ:“Maˊnøønˈ taꜙ jeeˊ chihˈ gwahꜙ kihꜗ DSAˉJØ̱Ø̱Hˈ jnänˋ.”
2 Naꜗ maˉtøøhˊ jneˊ taꜙ chaˊnehꜙ kihꜗ hoˊhaahˊ
kihˈ chʉʉhˊ jwɨɨˉ Jerusalén.
3 Jerusalén jnänˋ, ko̱o̱ˉ jeeˊ jwɨɨˉ heˉ nøøꜘ naˊhñaahꜗ
jeeˊ tø̱ø̱ꜘ naˉkuˊ naˉje̱e̱hˈ baˊ hneˈ.
4 Taꜙ laꜙ goˉnääˊ läꜙjë̱ë̱ꜙ nääꜗ dsaˉ Israel
hi̱ˉ la̱a̱ꜗ kya̱a̱ꜗ DSAˉJØ̱Ø̱Hˈ jnänˋ,
mahꜗ maˊ jmeeyꜙ jʉʉhˉ kiyhꜗ
läꜙko̱hꜘ madaꜚ heˉ gaꜙjmeeꜘ Dio kiyhꜗ.
5 Jeeˊ laˉ täähˊ hmaˉsii˜ kihꜗ hi̱ˉ llaꜙ taˊ kihˈ dsaˉgooˉ jneˊ.
Ja̱ˉbaˊ jeeˊ laˉ laꜗ hø̱ø̱ˈ saˊju̱ˉ kihꜗ David
jeeˊ dsaˉta̱a̱yhˋ jmeeyꜙ hihꜙ jnänˋ.
6 Ngɨɨˊ hnähꜘ kihꜗ Dio mahꜗ hɨɨꜗ tiiˊ kihˈ Jerusalén.
Waˊ cha̱a̱ˉ lluꜗ läꜙjë̱ë̱ꜙ hi̱ˉ tɨh˜ dsëꜗ jeeˊ jwɨɨˉ laˉ.
7 Waˊ hiiꜘ tiiˊ kihˈ läꜙjë̱ë̱ꜙ hi̱ˉ tä̱ä̱hˊ jeeˊ jwɨɨˉ
jeeˊ naˉjnëˉ läꜙkuˊ läꜙji̱i̱ꜗ kya̱a̱hˊ naˊhyahˉ.
Waˊ te̱e̱yhˉ dsëyꜗ läꜙlluꜗ heˉ tø̱ø̱ꜘ hneꜗ ñiiꜘ
jeeˊ dsaˉlä̱ä̱ꜘ hi̱ˉ cha̱a̱ˉ jeeˊ jwɨɨˉ laˉ.
8 Läꜙlluꜗ heˉ hnaanꜙ läꜙjë̱ë̱ꜙ ø̱ø̱hnꜗ
hiꜙ läꜙjë̱ë̱ꜙ omeꜚ kya̱a̱nꜙ, heˉja̱ˉ jwahnꜙ:
“Waˊ hiiꜘ tiiˊ kyahꜗ hnähꜘ.”
9 Haˉ ko̱hꜘ saꜙ tɨh˜ dsënꜙ gwahꜙ kihꜗ DSAˉJØ̱Ø̱Hˈ jnänˋ,
heˉja̱ˉ ngooꜗ baˊ jnäꜘ ngɨɨnˊ heˉ hɨɨꜗ tiiˊ kihꜗ Jerusalén.