' Alef
119
Lluꜗ laꜗ kihꜗ hi̱ˉ gaꜙnääˊ läꜙko̱o̱ˉ lleˋ kihˈ,hi̱ˉ høøꜙ ley kihꜗ DSAˉJØ̱Ø̱Hˈ jnänˋ.
2 Lluꜗ laꜗ kihꜗ hi̱ˉ nʉʉhˊ madaꜚ kiyhꜗ,
hi̱ˉ hnaahˉ Dio läꜙka̱a̱ˉ tuhˉdsëꜗ.
3 Hi̱ˉ heꜘ saꜙ tä̱ä̱hˊ kya̱a̱hˊ heˉ hlɨɨhˈ,
jëëhꜘ gaꜙnääyˊ jwëꜘ kihꜗ DSAˉJØ̱Ø̱Hˈ jnänˋ.
4 Hneˉ gaꜙjmeehˊ hihꜙ
heˉ høøˊ jnäähꜗ läꜙjëꜙ madaꜚ kyahꜗ.
5 Lluꜗ waˊraˉ jähꜘ kihꜗ ji̱hˊko̱hꜘ baˊ saꜙ tʉnꜚ
heˉ høønꜙ läꜙjëꜙ madaꜚ kyahꜗ.
6 Läꜙja̱ˉ saꜙ chaˉ heˉ kihꜗ jä̱nˋ naˉhiihnˊ,
gaˊ maˉka̱nꜗ kwa̱a̱t˜ chaˉgaˊmiihˉ kihꜗ nʉʉhꜚ kyahꜗ.
7 Hänˋ kyahˈ kya̱a̱hˊ ko̱o̱ˉ nëëˈ baˊ hʉʉˊdsëˉ,
gaˊ maˉläˉtë̱ë̱nꜙ nʉʉhꜚ kyahꜗ.
8 Hnoonꜗ miˉtenˋ ley kyahꜗ,
taꜙ be̱e̱ꜙ jnäꜘ ji̱hˊko̱hꜘ.
b Bet
9 ¿Haˉ läꜙ jmeeꜗ chihˉ mahꜗ hä̱ä̱y˜ hñiiyꜘ?
Hnøøꜗ høøyꜗ maꜙlaꜙ juuˈ kyahꜗ baˊ.
10 Läꜙka̱a̱ˉ tuhˉdsënꜙ hnaahnꜚ hneˉ.
Taꜙ kwaˉ jwëˈ jmeenˋ taꜙ kooꜘ madaꜚ kyahꜗ.
11 Läˉhøøˉ baˊ jnäꜘ juuˈ kyahꜗ nehꜙ tuhˉdsënꜙ,
mahꜗ moꜙsoꜙ hlä̱ä̱hꜙ gaˊ jnäꜘ kya̱a̱hˊ hneˉ.
12 Waˊ naˉjä̱ä̱ꜚ hneˉ DSAˉJØ̱Ø̱Hˈ kya̱a̱nꜙ.
Heehˋ jnäꜘ ley kyahꜗ.
13 Kya̱a̱hˊ hoonꜙ hlëëhnˊ haˉ läꜙ laꜗ juuˈ kyahꜗ.
14 Peerꜙ jë̱ë̱ˉ dsënꜙ heˉ ngënꜙ kya̱a̱hˊ hihꜙ kyahꜗ.
Läꜙko̱hꜘ hi̱ˉ chaˉ kuuˊ baˊ laˈ kinꜙ.
15 Kye̱nˊ hʉʉˊdsëˉ kihꜗ madaꜚ kyahꜗ,
mahꜗ jmeenˋ heˈ kihꜗ juuˈ kyahꜗ.
16 Peerꜙ cha̱a̱nˉ lluꜗ kya̱a̱hˊ juuˈ laˉ.
Ji̱hˊko̱hꜘ saꜙ gaaꜘ dsënꜙ juuˈ kyahꜗ.
g Guímel
17 Taꜙ jmeeˉ hñaaˉ hohꜘ kya̱a̱hˊ hi̱ˉ jmeeꜙ taˊheꜗ kyahꜗ.
Kwaˊ jwëꜘ jëë˜ gaˊ jnäꜘ jmɨˉgyʉʉꜙ
mahꜗ høønˋ juuˈ kyahꜗ.
18 Näˊ mɨˊnënꜙ,
mahꜗ jëënꜚ heˉ jʉhˉga̱a̱ˉ heˉ jmeehˉ.
19 Läꜙko̱hꜘ ja̱a̱ˉ dsaˉ cha̱a̱ˉ ʉ̱ʉ̱ꜘ baˊ laˈ kinꜙ jmɨˉgyʉʉꜙ laˉ.
Taꜙ hmäˊ kinꜙ läꜙjëꜙ madaꜚ kyahꜗ.
20 Kuhˉngɨɨꜙ tuhˉdsënꜙ
heˉ miˉtenˋ madaꜚ kyahꜗ läꜙjëꜙ jmɨɨˊ baˊ.
21 Hneˉ hi̱ˉ jʉʉhˊ kihˈ läꜙjë̱ë̱ꜙ hi̱ˉ jmää˜ hñiiꜘ ka̱a̱hˊ,
hiꜙ läꜙja̱ˉ jʉʉhˊ kihˈ hi̱ˉ hñaaˉ dsëꜗ
hi̱ˉ gaꜙläꜙø̱ø̱ꜘ kihꜗ madaꜚ kyahꜗ.
22 Taꜙ kwaˉ jwëˈ hlëëhꜗ wɨɨꜘ hi̱ˉ naˉhøøhˊ kinꜙ.
Jëëhꜘ høøꜙ baˊ jnäꜘ läꜙjëꜙ madaꜚ kyahꜗ.
23 Maꜙkeꜙ dsaˉka̱a̱hˊ dsaˉku̱hꜗ hlëëhꜙ wɨɨꜘ kinꜙ,
pero hi̱ˉ jmeeꜙ taˊheꜗ kyahꜗ laˉ,
kye̱yˉ hʉʉˊdsëˉ kihꜗ ley kyahꜗ baˊ.
24 Peerꜙ jë̱ë̱ˉ dsënꜙ kya̱a̱hˊ madaꜚ kyahꜗ.
Jëëhꜘ, heˉ naˉ kwëëhˋ jnäꜘ nʉʉhꜚ.
d Dálet
25 Ngooꜗ gaꜙju̱u̱ꜗ jnäꜘ.
Kwaˊ jwëꜘ jëëˋ gaˊ jnäꜘ jmɨˉgyʉʉꜙ
läꜙko̱hꜘ gaꜙbä̱ä̱hˋ hñaahꜗ.
26 Gaꜙjmeehnꜗ juuˈ kyahꜗ haˉ läꜙ hʉʉˊdsëˉ kinꜙ,
cha̱hꜘ baˊ gaꜙnʉʉhˉ kinꜙ.
Miˉjnääˈ kinꜙ nʉʉhꜚ kyahꜗ.
27 Miˉtë̱ë̱ˈ jnäꜘ haˉ läꜙ laꜗ nʉʉhꜚ kyahꜗ,
mahꜗ jmeenꜙ hʉʉˊdsëˉ kihꜗ läꜙjëꜙ heˉ jʉhˉga̱a̱ˉ heˉ jmeehˉ.
28 Meehˉ dsënꜙ tu̱u̱ˉ jmɨɨˉ mɨˈnënꜙ.
Kya̱a̱hˊ juuˈ kyahꜗ kwaˊ beꜘ kinꜙ.
29 Taꜙ kwaˉ jwëˈ heˉ miˉgooꜙ heˉ hlɨɨhˈ kinꜙ.
Taꜙ jmeeˉ hñaaˉ hohꜘ heehˋ jnäꜘ ley kyahꜗ.
30 Maˉllaꜙ dsënꜙ hnoohnꜚ juˈdsooꜘ kyahꜗ.
Jmeeˋ baˊ jnäꜘ läꜙjëꜙ madaꜚ heˉ jmeehˉ kinꜙ.
31 Cho̱o̱hnˊ ko̱o̱ˉ hwehˉ juˈdsooꜘ kyahꜗ.
Taꜙ kwaˉ jwëˈ jä̱nˋ oˉhihꜙ DSAˉJØ̱Ø̱Hˈ kya̱a̱nꜙ.
32 Chaˉgaˊmiihˉ jmeenˋ nʉʉhnˊ madaꜚ kyahꜗ,
jëëhꜘ gaꜙjmeehˊ jë̱ë̱ˉ dsënꜙ.
h He
33 DSAˉJØ̱Ø̱Hˈ kya̱a̱nꜙ heehˋ jnäꜘ läꜙjëꜙ madaꜚ kyahꜗ,
mahꜗ høønˋ läꜙji̱i̱hˈ lla̱a̱ꜙ jmɨˉgyʉʉꜙ.
34 Miˊtë̱ë̱ˈ jnäꜘ haˉ läꜙ høønˋ ley kyahꜗ,
mahꜗ miˊtehnˋ läꜙka̱a̱ˉ tuhˉdsënꜙ.
35 Jä̱ä̱ꜙ jnäꜘ jwëꜘ lluꜗ kyahꜗ,
jëëhꜘ heˉ naˉ baˊ hyohˉ dsënꜙ.
36 Jmeeˊ waˊ jäꜘ hʉʉˊdsëˉ kinꜙ
mahꜗ jmeenˋ läꜙjëꜙ madaꜚ kyahꜗ,
mahꜗ saꜙ läꜙhe̱e̱ꜘ dsënꜙ kuuˊ.
37 Hä̱ä̱ˋ jnäꜘ mahꜗ saꜙ toohnꜚ llenꜙ jyohꜘ hʉʉˊdsëˉ
heˉ saꜙ jmääꜗ taˊ.
Jmeeˊ cha̱a̱nˉ lluꜗ läꜙko̱o̱ˉ heˉ naˉhi̱h˜ jeˉ tuhˉdsënꜙ
mahꜗ ngënˋ jwëꜘ kyahꜗ.
38 Jmeeˊ kihˈ hi̱ˉ miˉteꜗ juuˈ kyahꜗ läꜙko̱hꜘ hmoohˊ heˉ gaꜙjmeehˊ kya̱a̱yhˊ, mahꜗ waˊ ga̱yhꜙ hneˉ.
39 Kwaˊ beꜘ kinꜙ mahꜗ saꜙ llenˋ oˉhihꜙ kinꜙ, peerꜙ gohnꜙ waˊraˉ gaꜙta̱hnꜘ.
Jëëhꜘ lluꜗ laꜗ madaꜚ kyahꜗ.
40 Tɨh˜ dsënꜙ läꜙjëꜙ madaꜚ kyahꜗ.
Kwaˊ jwëꜘ waˊ cha̱a̱ˉ gaˊ jnäꜘ jmɨˉgyʉʉꜙ
läꜙ hnoohˉ hñaahꜗ.
w Vau
41 Hneˉ DSAˉJØ̱Ø̱Hˈ kya̱a̱nꜙ,
miˊjnääˈ kinꜙ haˉ läꜙko̱hꜘ hnaahꜙ jnäꜘ.
Lä̱ä̱ˋ jnäꜘ läꜙko̱hꜘ gaꜙbä̱ä̱hˋ hñaahˈ.
42 Mahꜗ läꜙja̱ˉ chaˉ heˉ jwɨɨnꜚ läꜙjë̱ë̱ꜙ hi̱ˉ hlëëhꜙ wɨɨꜘ kinꜙ.
Jëëhꜘ chaˉ oˉjø̱hꜙ dsëˉ kinꜙ kya̱a̱hˊ juuꜗ kyahꜗ.
43 Taꜙ jñuuhˋ kinꜙ juˈdsooꜘ kyahꜗ.
Jëëhꜘ jnäꜘ la̱a̱nꜙ, juuˈ kyahꜗ laꜗ juˈdsooꜘ jmahꜗ.
44 Høøꜙ baˊ jnäꜘ ley kyahꜗ läꜙjëꜙ jmɨɨˊ.
Läꜙja̱ˉ høønˋ läꜙjëꜙ johꜘ jmɨɨˊ chaˉ baˊ.
45 Läꜙja̱ˉ chaˉ jwëˈ kinꜙ ngënˋ jë̱ë̱ˉ dsënꜙ.
Jëëhꜘ høøꜙ baˊ jnäꜘ madaꜚ kyahꜗ.
46 Hlëëhnˊ kihˈ ley kyahꜗ chaˊnëˊ läꜙjë̱ë̱ꜙ dsaˉka̱a̱hˊ.
Niꜙ miihˉ saꜙ jäꜙ naˉhiihnˊ.
47 Tɨh˜ dsënꜙ madaꜚ kyahꜗ.
Haˉ ko̱hꜘ saꜙ jë̱ë̱ˉ dsënꜙ kya̱a̱hˊ kaˉlähꜘ.
48 Miˊteˋ baˊ jnäꜘ madaꜚ kyahꜗ.
Läꜙjëꜙ jmɨɨˊ baˊ jmeenꜙ hʉʉˊdsëˉ kihꜗ ley kyahꜗ.
z Zain
49 Miˉdsoohꜚ hohꜘ heˉ gaꜙbä̱ä̱hˋ hñaahˈ
kya̱a̱hˊ hi̱ˉ jmeeꜙ taˊheꜗ kyahꜗ.
Jëëhꜘ kya̱a̱hˊ juuˈ ja̱ˉ, maˉjmeeꜘ chaˉ oˉjø̱hꜙ dsëˉ kinꜙ.
50 Kya̱a̱hˊ heˉ naˉ dsaˉnøhꜗ dsënꜙ maˊ cha̱a̱nˉ tiˉmeehˉ dsëˉ.
Hiꜙ kya̱a̱hˊ heˉ gaꜙbä̱ä̱hˋ hñaahˈ jmeehˉ cha̱a̱nˉ lluꜗ.
51 Läꜙjë̱ë̱ꜙ hi̱ˉ jmää˜ hñiiꜘ ka̱a̱hˊ miˉkwa̱yhꜗ jnäꜘ.
Pero jnäꜘ saꜙ maˉjmeenꜗ taꜙ kooꜘ juuˈ kyahꜗ.
52 DSAˉJØ̱Ø̱Hˈ kya̱a̱nꜙ,
dsooh˜ baˊ dsënꜙ haˉ läꜙ laꜗ nʉʉhꜚ maˉgyu̱hˉ kyahꜗ.
Hiꜙ kya̱a̱hˊ heˉ ja̱ˉ maˉjë̱ë̱ꜘ dsënꜙ.
53 Peerꜙ gaꜙläꜙlle̱e̱nꜘ jwërte kwa̱a̱t˜ kihꜗ hi̱ˉ hñaaˉ dsëꜗ,
hi̱ˉ maˉjmeeꜘ taꜙ kooꜘ juuˈ kyahꜗ.
54 Ley kyahꜗ laꜗ kinꜙ läꜙko̱hꜘ su̱ꜚ,
taˊko̱ˉji̱i̱hˈ gyanˊ jmɨˉgyʉʉꜙ laˉ läꜙko̱hꜘ ja̱a̱ˉ dsaˉ cha̱a̱ˉ ʉ̱ʉ̱ꜘ.
55 Läꜙjëꜙ hwëˈ dsooh˜ dsënꜙ hneˉ DSAˉJØ̱Ø̱Hˈ kya̱a̱nꜙ.
Hiꜙ høøꜙ baˊ jnäꜘ ley kyahꜗ.
56 Heˉ baˊ cheˉ jnaahˈ gaꜙlaꜗ kinꜙ
kwa̱a̱t˜ kihꜗ heˉ høønꜙ madaꜚ kyahꜗ.
x Chet
57 DSAˉJØ̱Ø̱Hˈ kya̱a̱nꜙ, saꜙ cha̱a̱ˉ gaˊ jñahꜘ hi̱ˉ cha̱a̱ˉ kya̱a̱nꜙ,
ja̱a̱ˉ hneˉ baˊ cha̱a̱hˉ kinꜙ.
Heˉja̱ˉ maˉbä̱ä̱hnˋ hñiinꜙ heˉ miˊtenˋ madaꜚ kyahꜗ.
58 Läꜙka̱a̱ˉ tuhˉdsënꜙ ngɨɨnˊ kyahˈ.
Jmeeˊ jø̱hˉ hohꜘ kinꜙ läꜙko̱hꜘ lleˋ juuˈ kyahꜗ.
59 Gaꜙjmeenꜗ hʉʉˊdsëˉ saꜙ ngënꜙ lluꜗ,
heˉja̱ˉ gaꜙløønꜗ jmeenꜙ heˈ nʉʉhꜚ kyahꜗ.
60 Moꜙsoꜙ gaꜙjø̱ø̱ˋ gaˊ jnäꜘ,
gaꜙmiꜙtenˋ läꜙjëꜙ madaꜚ kyahꜗ.
61 Jwë̱ë̱ꜘ dsaˉ hñaaˉ dsëꜗ gaꜙta̱a̱hˋ läꜙkuˊ läꜙji̱i̱ꜗ kinꜙ,
pero saꜙ gaꜙgaaꜘ dsënꜙ ley kyahꜗ.
62 Ko̱o̱ˉ llaꜙnʉʉˈ noonꜙ kwanꜙ tiˊhmaahˊ kyahˈ,
kwa̱a̱t˜ kihꜗ juˈdsooꜘ kyahꜗ.
63 Jnäꜘ la̱a̱nꜗ omeꜚ kya̱a̱ꜗ läꜙjë̱ë̱ꜙ hi̱ˉ ga̱hꜙ hneˉ.
La̱a̱nꜗ omeꜚ kya̱a̱ꜗ läꜙjë̱ë̱ꜙ hi̱ˉ miˉteꜗ juuˈ kyahꜗ.
64 DSAˉJØ̱Ø̱Hˈ kya̱a̱nꜙ, chaˉmiihˉ jø̱hˉ hohꜘ kya̱a̱hˊ dsaˉ.
Heehˋ jnäꜘ ley kyahꜗ.
X Tet
65 DSAˉJØ̱Ø̱Hˈ kya̱a̱nꜙ, gaꜙjmeehˊ lluꜗ kihꜗ hi̱ˉ jmeeꜙ taˊheꜗ kyahꜗ, läꜙko̱o̱ˉ lleˋ juuˈ kyahꜗ.
66 Kwëëhˋ jnäꜘ hʉʉˊdsëˉ lluꜗ mahꜗ ka̱nˋ kwa̱a̱t˜ läꜙko̱o̱ˉ lleˋ kihˈ.
Jëëhꜘ chaˉ oˉjø̱hꜙ dsëˉ kinꜙ kya̱a̱hˊ madaꜚ kyahꜗ.
67 Jä̱ä̱ꜗ saꜙ gaˊ maˉjëënꜗ wɨɨꜘ maˊ jmeenꜙ heˉ hlɨɨhˈ.
Pero naꜗ høønꜙ juuˈ kyahꜗ.
68 Peerꜙ llu̱u̱ꜗ hneˉ hi̱ˉ jmeeꜙ heˉ lluꜗ jmahꜗ.
Heehˋ jnäꜘ ley kyahꜗ.
69 Läꜙjë̱ë̱ꜙ hi̱ˉ jmää˜ hñiiꜘ ka̱a̱hˊ hnooyˉ juuˈ taˉjuuˈ kinꜙ.
Pero jnäꜘ läꜙka̱a̱ˉ tuhˉdsënꜙ høønꜙ madaꜚ kyahꜗ.
70 Läꜙjë̱ë̱ꜙ hi̱ˉ heꜘ naˉjlëˉ hʉʉˊdsëˉ kihꜗ.
Pero jnäꜘ jë̱ë̱ˉ dsënꜙ kya̱a̱hˊ ley kyahꜗ.
71 Lluꜗ gaˊ heˉ gaꜙheehˋ jnäꜘ wɨɨꜘ.
Mahꜗ läꜙja̱ˉ baˊ miˊtenˋ ley kyahꜗ.
72 Kye̱e̱ꜘ chaˉgaˊmiihˉ kinꜙ juuˈ heˉ gaꜙhwëëˉ hoohˊ,
läꜙko̱hꜘ gaˊ chaˉmiihˉ mil kuˊnøøꜚ kuˊtøøˉ.
y Yod
73 Hneˉ hñaahꜗ gaꜙjmäähˋ jnäꜘ.
Heehˋ jnäꜘ mahꜗ läꜙngëënꜘ haˉ läꜙ laꜗ madaꜚ kyahꜗ.
74 Läꜙjë̱ë̱ꜙ hi̱ˉ ga̱hꜙ hneˉ jë̱ë̱ꜘ dsëyꜗ waˊraˉ gaꜙjë̱ë̱yꜗ jnäꜘ.
Jëëhꜘ chaˉ oˉjø̱hꜙ dsëˉ kinꜙ kya̱a̱hˊ juuꜗ kyahꜗ.
75 DSAˉJØ̱Ø̱Hˈ kya̱a̱nꜙ, maꜙ baˊ jnäꜘ madaꜚ kyahꜗ laꜗ dsooꜘ.
Hiꜙ ñehˊ baˊ hneˉ heˉ kihꜗ heˉ gaꜙheehˋ jnäꜘ wɨɨꜘ.
76 Naꜗ waˊ läˉñihꜘ hohꜘ jnäꜘ, jmeeˊ jë̱ë̱ˉ dsënꜙ
läꜙko̱hꜘ gaꜙbä̱ä̱hˋ hñaahˈ kya̱a̱hˊ hi̱ˉ jmeeꜙ taˊheꜗ kyahꜗ.
77 Waˊ läˉñihꜘ hohꜘ jnäꜘ mahꜗ jëëˋ gaˊ jnäꜘ jmɨˉgyʉʉꜙ.
Jëëhꜘ cha̱a̱nˉ lluꜗ kya̱a̱hˊ ley kyahꜗ.
78 Waˊ jäꜘ oˉhihꜙ kihꜗ läꜙjë̱ë̱ꜙ hi̱ˉ jmää˜ hñiiꜘ ka̱a̱hˊ,
jëëhꜘ saꜙ chaˉ heˉ kihꜗ heˉ heeyhꜗ jnäꜘ wɨɨꜘ.
Pero jnäꜘ,
läꜙjëꜙ jmɨɨˊ baˊ jmeenꜙ hʉʉˊdsëˉ kihꜗ madaꜚ kyahꜗ.
79 Waˊ jmeeyꜘ ko̱ˉjø̱hꜘ kya̱a̱hˊ jnäꜘ läꜙjë̱ë̱ꜙ hi̱ˉ ga̱hꜙ hneˉ,
hiꜙ läꜙja̱ˉ hi̱ˉ kyʉʉh˜ juuˈ kyahꜗ kaˉlähꜘ.
80 Waˊ laˈ ko̱o̱ˉ nëëˈ baˊ hʉʉˊdsëˉ kinꜙ kya̱a̱hˊ ley kyahꜗ,
mahꜗ saꜙ jäꜙ oˉhihꜙ kinꜙ.
k Caf
81 Dsaˉhwa̱a̱ꜘ jmɨˉlleꜘ kinꜙ heˉ jø̱ø̱nˊ lä̱ä̱hˊ jnäꜘ.
Haˉ ko̱hꜘ saꜙ jø̱ø̱nˊ nuunˋ juuˈ kyahꜗ.
82 Ngooꜗ dsaˉhwa̱a̱ꜘ mɨˈnënꜙ heˉ jø̱ø̱nˊ juuˈ kyahꜗ.
Jwahnꜙ: “¿Lɨhꜘ baˊ jmeehˈ jë̱ë̱ˉ dsënꜙ?”
83 Maꜙkeꜙ la̱a̱nꜗ ja̱a̱ˉ hi̱ˉ saꜙ jmääꜗ taˊ,
pero saꜙ maˉgaaꜘ dsënꜙ ley kyahꜗ.
84 Jnäꜘ hi̱ˉ jmeeꜙ taˊheꜗ kyahꜗ ¿johꜘ jmɨɨˊ naˉ jø̱ø̱nˊ?
¿Lɨhꜘ baˊ llahꜗ taˊ kihˈ hi̱ˉ cha̱a̱ˈ kaahˋ kinꜙ?
85 Läꜙjë̱ë̱ꜙ hi̱ˉ jmää˜ hñiiꜘ ka̱a̱hˊ heꜘ jneyꜙ jwëˈ kinꜙ,
mahꜗ niꜙ hñiiyꜘ saꜙ jmeeyꜙ läꜙko̱hꜘ lleˋ ley kyahꜗ.
86 Läꜙjëꜙ madaꜚ kyahꜗ laꜗ dsooꜘ.
Kwaˊ beꜘ kinꜙ,
jëëhꜘ saꜙ chaˉ heˉ kihꜗ yaꜙlleꜗ kaahˋ hi̱ˉ naˉhøøhˊ kinꜙ.
87 Miihˉ gaˊ saꜙ gaꜙhmääyhˉ jnäꜘ taꜙ hwaꜗ.
Pero jnäꜘ saꜙ gaꜙbenꜗ madaꜚ kyahꜗ.
88 Kwaˊ jwëˈ jëëˋ gaˊ jnäꜘ jmɨˉgyʉʉꜙ läꜙlluꜗ heˉ läˉñihꜘ hohꜘ jnäꜘ mahꜗ miˉtenˋ läꜙjëꜙ madaꜚ kyahꜗ.
l Lámed
89 DSAˉJØ̱Ø̱Hˈ kya̱a̱nꜙ, juuˈ kyahꜗ chaˉ läꜙjëꜙ johꜘ jmɨɨˊ chaˉ.
Ji̱hˊko̱hꜘ saꜙ lla̱a̱ꜙ juuˈ kyahꜗ gyʉʉhˈ jmɨˉgyʉʉꜙ.
90 Läꜙ maˉngooꜗ ja̱ˉbaˊ miˉtehˋ juuˈ kyahꜗ läꜙjëꜙ johꜘ jmɨɨˊ chaˉ.
Hneˉ gaꜙjmeehˊ hwaˈ hiꜙ gaꜙjä̱ꜘ ko̱o̱ˉ hwehˉ.
91 Läꜙjëꜙ heˉ chaˉ nëˊ kihˈ ngooꜗ baˊ chaˉ läꜙji̱i̱hˈ naꜗ
läꜙko̱o̱ˉ laꜗ madaꜚ kyahꜗ, jëëhꜘ läꜙjëꜙ baˊ nʉʉhˊ kyahˈ.
92 Waˊraˉ jähꜘ kihꜗ saꜙ gaꜙläꜙhe̱e̱ꜘ dsënꜙ maˊ hnoohnꜚ ley kyahꜗ
heˉ tiˉmeehˉ dsënꜙ baˊ maˊ miˉlla̱a̱ꜙ jnäꜘ.
93 Ji̱hˊko̱hꜘ saꜙ gaaꜘ dsënꜙ läꜙjëꜙ madaꜚ kyahꜗ.
Jëëhꜘ kya̱a̱hˊ heˉ naˉ maˉjmeehˊ jëën˜ jmɨˉgyʉʉꜙ.
94 Lä̱ä̱ˋ jnäꜘ hi̱ˉ la̱a̱ꜗ kya̱a̱hꜗ.
Jëëhꜘ hnoohꜙ baˊ jnäꜘ läꜙjëꜙ madaꜚ kyahꜗ.
95 Läꜙjë̱ë̱ꜙ dsaˉ hñaaˉ dsëꜗ jø̱ø̱y˜
lɨhꜘ baˊ tëꜗ jmɨɨˊ heˉ jngëëyhꜗ jnäꜘ.
Pero jnäꜘ ngooꜗ baˊ kye̱nˊ hʉʉˊdsëˉ kihꜗ juˈdsooꜘ kyahꜗ.
96 Maꜙkeꜙ heˉ gaˊ naˊhñaahꜗ jnäꜘ heˉ chaˉ jmɨˉgyʉʉꜙ,
maꜙraꜙ heˉ dsaˉngëëꜘ baˊ heˉ ja̱ˉ.
Pero madaꜚ kyahꜗ ji̱hˊko̱hꜘ saꜙ dsaˉngëëꜘ.
m Mem
97 Haˉ ko̱hꜘ saꜙ tɨh˜ dsënꜙ ley kyahꜗ.
Läꜙta̱a̱ˈ jmɨɨˉ baˊ kye̱nˊ hʉʉˊdsëˉ kihꜗ.
98 Nʉʉhꜚ kyahꜗ maˉjmeeꜘ kyʉʉh˜ gaˊ jnäꜘ
läꜙko̱hꜘ gaˊ hi̱ˉ naˉhøøhˊ kinꜙ,
jëëhꜘ heˉ naˉ baˊ kya̱a̱hnˊ tä̱ä̱ꜘ.
99 Ngëëꜘ gaˊ jnäꜘ chaˉgaˊmiihˉ
läꜙko̱hꜘ gaˊ jeeˊ läꜙjë̱ë̱ꜙ hi̱ˉ miˉtë̱ë̱ꜙ jnäꜘ.
Jëëhꜘ ngooꜗ baˊ jmeenꜙ hʉʉˊdsëˉ kihꜗ madaꜚ kyahꜗ.
100 Ngëëꜘ gaˊ jnäꜘ läꜙko̱hꜘ gaˊ dsaˉ maˉgyu̱hˉ.
Jëëhꜘ ngooꜗ baˊ jnäꜘ høønꜙ madaꜚ kyahꜗ.
101 Hä̱ä̱nꜙ hñiinꜙ kihꜗ heˉ hlɨɨhˈ,
mahꜗ saꜙ chaˉ heˉ jmeeꜗ jwɨɨhˋ kinꜙ heˉ høønˋ juuˈ kyahꜗ.
102 Saꜙ maˉjmeenꜗ taꜙ kooꜘ kihꜗ hihꜙ kyahꜗ.
Jëëhꜘ hñaahꜗ baˊ hneˉ maˉmiˉtë̱ë̱hˈ jnäꜘ.
103 Haˉ ko̱hꜘ saꜙ øøꜘ laꜗ juuˈ kyahꜗ.
Øøꜘ gaˊ läꜙko̱hꜘ jmɨhꜗ tahꜗ.
104 Kihꜗ madaꜚ kyahꜗ gwaꜘ hʉʉˊdsëˉ lluꜗ kinꜙ.
Heˉ ja̱ˉ naˉhøøhnˊ kihˈ hi̱ˉ hlëëhꜙ juuˈ taˉjuuˈ.
n Nun
105 Nʉʉhꜚ kyahꜗ laꜗ läꜙko̱hꜘ jeˉ heˉ jøøꜙ kinꜙ,
heˉ miˉjnääꜙ kinꜙ läꜙ häˊ jwëꜘ.
106 Läꜙko̱hꜘ gaꜙtä̱ä̱nˋ hñiinꜙ,
läꜙja̱ˉ miˉtehnˋ kaˉlähꜘ heˉ høønˋ juˈdsooꜘ kyahꜗ.
107 DSAˉJØ̱Ø̱Hˈ kya̱a̱nꜙ, peerꜙ kuˈji̱i̱ꜙ kinꜙ.
Kwaˊ beꜘ kinꜙ läꜙko̱hꜘ gaꜙbä̱ä̱hˋ hñaahˈ.
108 Chu̱u̱nꜘ kya̱a̱hˊ hneˉ DSAˉJØ̱Ø̱Hˈ kya̱a̱nꜙ,
waˊ tɨh˜ hohꜘ heˉ kwanꜙ tiˊhmaahˊ kyahˈ.
Hiꜙ heehˋ jnäꜘ madaꜚ kyahꜗ.
109 Läꜙjëꜙ jmɨɨˊ baˊ hiiꜘ gooˉ kinꜙ heˉ ju̱u̱nꜘ.
Pero jnäꜘ saꜙ gaaꜘ dsënꜙ madaꜚ kyahꜗ.
110 Dsaˉ hñaaˉ dsëꜗ heꜘ hɨɨˉ cheꜘ kinꜙ,
pero jnäꜘ saꜙ jmeenˋ taꜙ kooꜘ juuˈ kyahꜗ.
111 He̱e̱ꜚ baˊ jnäꜘ laꜗ madaꜚ kyahꜗ läꜙjëꜙ johꜘ jmɨɨˊ chaˉ.
Jëëhꜘ heˉ naˉ jmeeꜙ jë̱ë̱ˉ dsënꜙ.
112 Läꜙka̱a̱ˉ tuhˉdsënꜙ maˉjmeenꜗ hʉʉˊdsëˉ høønˋ madaꜚ kyahꜗ.
Läꜙja̱ˉ jmeenꜙ läꜙjëꜙ jmɨɨˊ läꜙji̱i̱hˈ ju̱u̱nꜘ.
s Sámec
113 Läˉhä̱ä̱hnˊ dsaˉ hi̱ˉ jmeeꜙ to̱ꜗ dsëꜗ.
Pero madaꜚ kyahꜗ tɨh˜ dsënꜙ.
114 Hneˉ hi̱ˉ hmää˜ jnäꜘ,
hneˉ hi̱ˉ la̱a̱ꜗ läꜙko̱o̱ˉ ñeˈ heˉ hɨɨˉ dsaˉ jeeˊ lä̱ä̱˜ hñiiꜘ,
chaˉ oˉjø̱hꜙ dsëˉ kinꜙ kya̱a̱hˊ juuˈ kyahꜗ.
115 Hnähꜘ hi̱ˉ hñaaˉ dsëꜗ jmeeˊ hnähꜘ taꜙ kooꜘ kinꜙ.
Jëëhꜘ jnäꜘ hnoonꜗ høønˋ madaꜚ kihꜗ Dio kya̱a̱nꜙ.
116 Kwaˊ beꜘ kinꜙ läꜙko̱hꜘ gaꜙbä̱ä̱hˋ hñaahˈ,
mahꜗ jëë˜ gaˊ jnäꜘ jmɨˉgyʉʉꜙ.
Taꜙ kwaˉ jwëˈ jä̱nˋ oˉhihꜙ kya̱a̱hˊ oˉjø̱hꜙ dsëˉ heˉ chaˉ kinꜙ kya̱a̱hˊ hneˉ.
117 Kwaˊ beꜘ kinꜙ mahꜗ lä̱ä̱nꜘ.
Hiꜙ läꜙja̱ˉ ngooꜗ baˊ jnäꜘ miˉtenˋ läꜙjëꜙ madaꜚ kyahꜗ.
118 Hneˉ moꜙsoꜙ hnaahꜙ hi̱ˉ jmeeꜙ taꜙ kooꜘ kihꜗ nʉʉhꜚ kyahꜗ.
Jëëhꜘ hʉʉˊdsëˉ kiyhꜗ laꜗ kya̱a̱hˊ juuˈ taꜙjmahꜗ.
119 Läꜙjë̱ë̱ꜙ hi̱ˉ hñaaˉ dsëꜗ hi̱ˉ cha̱a̱ˉ jmɨˉgyʉʉꜙ laˉ,
jmäähꜙ hnihꜘ läꜙko̱hꜘ tʉˊhløøˉ.
Heˉja̱ˉ tɨh˜ dsënꜙ madaꜚ kyahꜗ.
120 Peerꜙ gohˉjlä̱ä̱nꜙ kihꜗ heˉ ga̱hnꜙ hneˉ,
hiꜙ gohnꜙ kihꜗ madaꜚ kyahꜗ kaˉlähꜘ.
v Ayin
121 Ji̱hˊko̱hꜘ saꜙ maˉtʉnꜗ jmeenꜙ läꜙjëꜙ heˉ lluꜗ.
Taꜙ ngëëˋ jnäꜘ jaˊgooˉ hi̱ˉ hñaaˉ dsëꜗ.
122 Bä̱ä̱hˋ hñaahˈ heˉ miˉjä̱ä̱hꜚ jnäꜘ tä̱ä̱ꜘ,
mahꜗ saꜙ jmeehꜙ hi̱ˉ hñaaˉ dsëꜗ jnäꜘ.
123 Ngooꜗ gaꜙhwa̱a̱ꜘ mɨˈnënꜙ heˉ jø̱ø̱˜ lä̱ä̱hˊ jnäꜘ,
läꜙko̱hꜘ gaꜙbä̱ä̱hˋ hñaahˈ.
124 Kiꜙ jnäꜘ hi̱ˉ nʉʉhˊ kyahˈ, jmeeˊ kinꜙ läꜙko̱hꜘ läˉñihꜘ hohꜘ,
mahꜗ heehˋ jnäꜘ madaꜚ kyahꜗ.
125 Jnäꜘ la̱a̱nꜗ ja̱a̱ˉ hi̱ˉ jmeeꜙ taˊheꜗ kyahꜗ,
kwëëhˋ jnäꜘ hʉʉˊdsëˉ lluꜗ
mahꜗ läꜙkyʉʉhn˜ läꜙjëꜙ madaꜚ kyahꜗ.
126 DSAˉJØ̱Ø̱Hˈ kya̱a̱nꜙ,
maˉtëꜘ jmɨɨˊ heˉ llahˈ taˊ kihꜗ hi̱ˉ saꜙ miˉteꜗ juuˈ kyahꜗ.
127 Kihꜗ heˉ ja̱ˉ tɨh˜ dsënꜙ madaꜚ kyahꜗ
chaˉgaˊmiihˉ läꜙko̱hꜘ gaˊ heˉ laꜗ kuˊnøøꜚ jmahꜗ.
128 Läꜙjëꜙ madaꜚ kyahꜗ laꜗ juˈdsooꜘ jmahꜗ,
heˉja̱ˉ gaꜙläꜙhøøhnˋ kihˈ hi̱ˉ hlëëhꜙ juuˈ taˉjuuˈ.
p Pe
129 Peerꜙ naˊhñaahꜗ laꜗ madaꜚ kyahꜗ,
heˉ ja̱ˉ høøꜙ baˊ jnäꜘ.
130 Jeeˊ ji̱i̱˜ dsaˉ juuˈ kyahꜗ laꜗ läꜙko̱o̱ˉ heˉ naˉhi̱h˜ jeˉ
heˉ miˉtë̱ë̱ꜙ dsaˉ hi̱ˉ saꜙ ngëëꜘ.
131 Läꜙko̱o̱ˉ heˉ naˉja̱a̱ꜚ hoonꜙ baˊ laˈ
heˉ tɨh˜ dsënꜙ chaˉmiihˉ nʉʉhꜚ kyahꜗ.
132 Jë̱ë̱ˋ daˊ jnäꜘ, waˊ läˉñihꜘ hohꜘ kinꜙ
läꜙko̱hꜘ të̱ë̱hˈ jmeehˉ kihꜗ hi̱ˉ hnääꜗ hneˉ.
133 Jä̱ä̱ꜙ jnäꜘ läꜙ hyohˉ hohꜘ hñaahꜗ,
taꜙ kwaˉ jwëˈ kihꜗ heˉ hlɨɨhˈ jlëꜗ nëˊ kinꜙ.
134 Lä̱ä̱ˋ jnäꜘ kihꜗ dsaˉ hi̱ˉ hnøøꜗ jmeehꜙ jnäꜘ,
mahꜗ høønˋ läꜙjëꜙ madaꜚ kyahꜗ.
135 Jmeeˊ waˊ läꜙjnäꜘ jmëëꜗ kyahꜗ nëˊ kiꜙ jnäꜘ
hi̱ˉ jmeeꜙ taˊheꜗ kyahꜗ,
heehˋ jnäꜘ madaꜚ kyahꜗ.
136 Ko̱o̱ˉ jmɨˉjʉʉhˉ naˉ gaꜙtu̱u̱ˉ mɨˈnënꜙ,
kihꜗ heˉ saꜙ høøꜙ dsaˉ madaꜚ kyahꜗ.
c Tsade
137 DSAˉJØ̱Ø̱Hˈ kya̱a̱nꜙ, peerꜙ llu̱u̱ꜗ hneˉ,
madaꜚ kyahꜗ laꜗ maꜙraꜙ juˈdsooꜘ.
138 Läꜙjëꜙ madaꜚ kyahꜗ laꜗ lluꜗ goˉte˜
hiꜙ maꜙraꜙ heˉ miˉtehˋ baˊ hneˉ juuˈ kyahꜗ.
139 Ngooꜗ dsaˉlla̱a̱ꜙ beꜘ kinꜙ heˉ llihnꜙ
kihꜗ heˉ gaꜙjmeeꜘ hi̱ˉ naˉhøøhˊ kinꜙ taꜙ kooꜘ juuˈ kyahꜗ.
140 Johꜘ ji̱i̱h˜ saꜙ maˉjëë˜ dsaˉ maꜙraꜙ heˉ lluꜗ baˊ juuˈ kyahꜗ,
heˉja̱ˉ tɨh˜ dsëꜗ hi̱ˉ jmeeꜙ taˊheꜗ kyahꜗ.
141 Jnäꜘ saꜙ hä̱ä̱nˊ taˊ niꜙ miihˉ, naˉhä̱ä̱hˊ baˊ dsaˉ jnäꜘ,
pero ngooꜗ baˊ jnäꜘ høønꜙ läꜙjëꜙ madaꜚ kyahꜗ.
142 Juˈdsooꜘ kyahꜗ chaˉ gaꜙläꜙjëꜙ johꜘ jmɨɨˊ chaˉ,
hiꜙ ley kyahꜗ laꜗ juˈdsooꜘ jmahꜗ.
143 Maˉjëënꜗ chaˉmiihˉ heˉ wɨɨꜘ hiꜙ läꜙja̱ˉ tiˉmeehˉ dsënꜙ jwërte,
pero madaꜚ kyahꜗ jmeeꜙ jë̱ë̱ˉ dsënꜙ.
144 Juˈdsooꜘ kyahꜗ chaˉ gaꜙläꜙjëꜙ johꜘ jmɨɨˊ chaˉ.
Kwaˊ jwëꜗ läꜙngëënꜘ mahꜗ jëëˋ gaˊ jnäꜘ jmɨˉgyʉʉꜙ.
q Cof
145 DSAˉJØ̱Ø̱Hˈ kya̱a̱nꜙ, läꜙka̱a̱ˉ tuhˉdsënꜙ chu̱u̱nꜘ kya̱a̱hˊ hneˉ,
ngëëhˋ kinꜙ mahꜗ høønˋ madaꜚ kyahꜗ.
146 Kyahꜗ baˊ chu̱u̱nꜘ Dio kya̱a̱nꜙ, kwaˊ beꜘ kinꜙ
mahꜗ miˉtenˋ madaꜚ kyahꜗ.
147 Jä̱ä̱ꜗ ja̱ˉgaˊ jnäꜙ, noonꜙ jeeˊ kya̱a̱nꜗ ngɨɨnˊ beꜘ kyahꜗ,
jëëhꜘ kyahꜗ baˊ hneˉ chaˉ oˉjø̱hꜙ dsëˉ kinꜙ.
148 Läꜙta̱a̱ˈ hwëꜗ saꜙ jäꜙ gwɨ̱ɨ̱nꜙ,
heˉ jmeenꜙ hʉʉˊdsëˉ kihꜗ juuˈ kyahꜗ.
149 Nʉʉˉ kinꜙ läꜙko̱hꜘ dsaˉläˉñihꜘ hohꜘ jnäꜘ.
Kwaˊ jwëˈ jëëˋ gaˊ jnäꜘ jmɨˉgyʉʉꜙ läꜙko̱hꜘ maˉbä̱ä̱hˋ hñaahˈ.
150 Gaꜙnääꜗ bihꜗ kya̱a̱hˊ heˉ hlɨɨhˈ läꜙjë̱ë̱ꜙ hi̱ˉ naˉhøøhˊ kinꜙ,
läꜙja̱ˉ maˉläˉø̱ø̱yꜘ kihꜗ nʉʉhꜚ kyahꜗ.
151 Hneˉ DSAˉJØ̱Ø̱Hˈ kya̱a̱nꜙ, jä̱hꜙ baˊ chehˈ kooꜘ kinꜙ,
hiꜙ läꜙjëꜙ madaꜚ kyahꜗ laꜗ juˈdsooꜘ jmahꜗ.
152 Läꜙji̱i̱hˈ maˉmähnꜗ gaꜙnuunꜗ madaꜚ kyahꜗ,
heˉ gaꜙllahˊ kya̱a̱hˊ ko̱o̱ˉ häˊ ja̱ˉ baˊ läꜙjëꜙ johꜘ jmɨɨˊ chaˉ.
r Resh
153 Jëëˋ daˊ haˉ ko̱hꜘ wɨɨꜘ saꜙ cha̱a̱nˉ.
Lä̱ä̱ˋ jnäꜘ, jëëhꜘ saꜙ maˉgaaꜘ dsënꜙ madaꜚ kyahꜗ.
154 Nooˉ nëˊ kwa̱a̱t˜ kinꜙ, hiꜙ lä̱ä̱ˋ jnäꜘ.
Kwaˊ jwëꜘ jëëˋ gaˊ jnäꜘ jmɨˉgyʉʉꜙ läꜙko̱hꜘ gaꜙbä̱ä̱hˋ hñaahˈ.
155 Beꜘ kyahꜗ saꜙ chaˉ jä̱hꜙ kihꜗ läꜙjë̱ë̱ꜙ hi̱ˉ hñaaˉ dsëꜗ,
jëëhꜘ saꜙ hnooyhˉ madaꜚ kyahꜗ.
156 DSAˉJØ̱Ø̱Hˈ kya̱a̱nꜙ, haˉ ko̱hꜘ saꜙ jʉʉhˉ heˉ läˉñihꜘ hohꜘ.
Kwaˊ jwëꜘ jëëˋ gaˊ jnäꜘ jmɨˉgyʉʉꜙ läꜙko̱o̱ˉ nøøꜘ juuˈ kyahꜗ.
157 Jwë̱ë̱ꜘ hi̱ˉ cha̱a̱ˈ kaahˋ kinꜙ, läꜙja̱ˉ hi̱ˉ naˉhøøhˊ kinꜙ.
Pero jnäꜘ saꜙ jmeenꜙ taꜙ kooꜘ kihꜗ juˈdsooꜘ kyahꜗ.
158 Moꜙsoꜙ läꜙbeꜘ dsënꜙ kya̱a̱hˊ dsaˉ hi̱ˉ taˉju̱u̱ˈ,
kihꜗ heˉ saꜙ høøyꜙ juuˈ kyahꜗ.
159 Jëëˋ daˊ DSAˉJØ̱Ø̱Hˈ kya̱a̱nꜙ, peerꜙ tɨh˜ dsënꜙ madaꜚ kyahꜗ.
Kwaˊ jwëꜘ jëëˋ gaˊ jnäꜘ jmɨˉgyʉʉꜙ läꜙko̱hꜘ läˉñihꜘ hohꜘ jnäꜘ.
160 Ko̱o̱ˉ juuˈ kyahꜗ baˊ hneˉ laꜗ maꜙraꜙ juˈdsooꜘ jmahꜗ.
Läꜙjëꜙ madaꜚ kyahꜗ chaˉ gaꜙläꜙjëꜙ johꜘ jmɨɨˊ chaˉ baˊ.
S Sin
161 Dsaˉtaˊ ka̱a̱hˊ cha̱a̱ˈ kaahˋ kinꜙ niꜙ saꜙ chaˉ heˉ kihꜗ.
Pero jnäꜘ, kihꜗ juuˈ kyahꜗ baˊ hneˉ gaꜙläꜙgohnꜙ.
162 Jnäꜘ cha̱a̱nˉ lluꜗ kya̱a̱hˊ juuˈ kyahꜗ.
Laꜗ kinꜙ läꜙko̱hꜘ laꜗ kihꜗ ja̱a̱ˉ hi̱ˉ jnøøhˈ chaˉmiihˉ kuuˊ.
163 Naˉhøøhnˊ kihˈ juuˈ taˉjuuˈ, moꜙsoꜙ läꜙbeꜘ dsënꜙ kya̱a̱hˊ,
pero ley kyahꜗ tɨh˜ dsënꜙ.
164 Gyiiꜗ ji̱i̱h˜ ko̱o̱ˉ jmɨɨˉ jmeenꜙ jʉʉhˉ kyahꜗ,
kwa̱a̱t˜ kihꜗ läꜙjëꜙ ley kyahꜗ heˉ laꜗ juˈdsooꜘ jmahꜗ.
165 Chaˉmiihˉ hiiꜘ tiiˊ kihˈ läꜙjë̱ë̱ꜙ hi̱ˉ tɨh˜ dsëꜗ ley kyahꜗ,
niꜙ ko̱o̱ˉ saꜙ chaˉ heˉ jmeeꜗ tä̱yhꜙ.
166 DSAˉJØ̱Ø̱Hˈ kya̱a̱nꜙ, kyahꜗ hneˉ baˊ jø̱ø̱nˊ heˉ lä̱ä̱hˊ jnäꜘ.
Jëëhꜘ jmeeꜙ baˊ jnäꜘ läꜙko̱o̱ˉ lleˋ madaꜚ kyahꜗ.
167 Høøꜙ baˊ jnäꜘ madaꜚ kyahꜗ.
Peerꜙ tɨh˜ dsënꜙ kaˉlähꜘ.
168 Høøꜙ baˊ jnäꜘ läꜙjëꜙ madaꜚ heˉ jmeehˉ kihꜗ dsaꜙ.
Jëëhꜘ hneˉ baˊ kyu̱u̱h˜ haˉ läꜙ laꜗ tuhˉdsënꜙ.
t Tau
169 Waˊ llooꜘ läꜙ gaꜙtëꜘ chaˊnëhˊ
heˉ chu̱u̱nꜘ kya̱a̱hˊ hneˉ DSAˉJØ̱Ø̱Hˈ kya̱a̱nꜙ.
Jmeeˊ waˊ läꜙngëënꜘ läꜙko̱hꜘ gaꜙbä̱ä̱hˋ hñaahˈ.
170 Waˊ llooꜘ heˉ ngɨɨnˊ kyahˈ läꜙ gaꜙtëꜘ chaˊnëhˊ,
lä̱ä̱ˋ jnäꜘ läꜙko̱o̱ˉ gaꜙbä̱ä̱hˋ hñaahˈ.
171 Chaˉmiihˉ su̱ꜚ hwëëˉ nehꜙ hoonꜙ,
waˊraˉ gaꜙheehˋ jnäꜘ madaꜚ kyahꜗ.
172 Hänˋ ko̱o̱ˉ su̱ꜚ kihꜗ hmoohˊ kyahˈ,
jëëhꜘ läꜙjëꜙ madaꜚ kyahꜗ laꜗ juˈdsooꜘ jmahꜗ baˊ.
173 Waˊ ñehꜘ hneˉ naˊllu̱u̱hˋ mahꜗ kwahˈ beꜘ kinꜙ.
Jëëhꜘ maˉllaꜙ dsënꜙ høønˋ läꜙjëꜙ madaꜚ kyahꜗ.
174 DSAˉJØ̱Ø̱Hˈ kya̱a̱nꜙ hnoonꜗ lä̱ä̱hˊ jnäꜘ,
hiꜙ he̱e̱ꜘ dsënꜙ nuunˋ juuˈ kyahꜗ.
175 Hnoonꜗ jëëˋ gaˊ jnäꜘ jmɨˉgyʉʉꜙ mahꜗ hänˋ kyahˈ,
Kya̱a̱hˊ juꜗdsooꜘ kyahꜗ kwaˊ beꜘ kinꜙ.
176 Jnäꜘ maˊ ngënꜙ naˉhë̱ë̱nˈ
läꜙko̱hꜘ ja̱a̱ˉ borrego hi̱ˉ maˉka̱h˜ jwëˈ.
Ñaˉ mahꜗ yaˉhnäähˈ jnäꜘ hi̱ˉ nʉʉhˊ kyahˈ,
jëëhꜘ jnäꜘ saꜙ maˉgaaꜘ dsënꜙ läꜙjëꜙ madaꜚ kyahꜗ.