103
Häˊ hneˉ jmɨˉlleꜘ kinꜙ kihꜗ DSAˉJØ̱Ø̱Hˈ jnänˋ,läꜙka̱a̱ˉ tuhˉhohꜘ häˊ kihꜗ hi̱ˉ naˉjngëëˈ goˉte˜.
2 Häˊ hneˉ jmɨˉlleꜘ kinꜙ kihꜗ DSAˉJØ̱Ø̱Hˈ jnänˋ,
taꜙ waˊ gaaꜘ hohꜘ läꜙjëꜙ heˉ jʉhˉga̱a̱ˉ
heˉ maˉjmeeyꜘ kyahꜗ.
3 Ja̱a̱ˉ hñiiꜘ bihꜗ liyhꜙ cheyꜗ läꜙjëꜙ dsoˊkyeˉ kyahꜗ.
Ja̱a̱ˉ hñiiꜘ bihꜗ liyhꜙ jñuuyhꜗ läꜙjëꜙ lliꜘwɨɨꜘ
heˉ gwaꜘ nëˊ kyahˈ.
4 Ja̱a̱ˉ hñiiꜘ bihꜗ lä̱ä̱y˜ hneˉ kihꜗ chaˊjeˉ.
Läˉñihꜘ dsëyꜗ hneˉ chaˉmiihˉ
hiꜙ läꜙja̱ˉ hnääyꜗ hneˉ kaˉlähꜘ.
5 Ja̱a̱ˉ hñiiꜘ bihꜗ kwëëyh˜ hneˉ läꜙjëꜙ heˉ llaˉkya̱a̱hꜗ,
hiꜙ kwëëyhꜗ hneˉ beꜘ läˉhmëëꜘ
läꜙko̱hꜘ jmeeyꜗ kihꜗ chaˊmɨɨˉ.
6 DSAˉJØ̱Ø̱Hˈ jnänˋ baˊ llaꜗ taˊ kya̱a̱hˊ juꜗdsooꜘ jmahꜗ.
Nooyˉ nëˊ kihˈ läꜙjë̱ë̱ꜙ hi̱ˉ jëë˜ wɨɨꜘ.
7 Gaꜙmiꜙjnääyˉ kihꜗ Moisé haˉ läꜙ laꜗ jwëꜘ kiyhꜗ.
Hiꜙ gaꜙheeyhꜗ dsaˉ Israel
haˉ läꜙ laꜗ heˉ jʉhˉga̱a̱ˉ heˉ gaꜙjmeeyꜘ.
8 Chaˉmiihˉ dsaˉläˉñihꜘ dsëꜗ DSAˉJØ̱Ø̱Hˈ jnänˋ hiꜙ jø̱hˉ dsëyꜗ kaˉlähꜘ.
Saꜙ dsaˉläˉlle̱e̱yꜘ naꜗko̱hꜘ, haˉ ko̱hꜘ saꜙ hnääyꜗ jneˊ.
9 Ja̱ꜙ ko̱o̱ˉ kyooˉ te̱e̱˜ Dio kya̱a̱hˊ jneˊ.
Hiꜙ niꜙ saꜙ dsaˉläˉlle̱e̱yꜘ tä̱ä̱ꜘ kya̱a̱hˊ jneˊ.
10 Saꜙ maˉheeyhꜗ jneˊ wɨɨꜘ
läꜙko̱hꜘ lleˋ kihˈ heˉ hlɨɨhˈ heˉ jmeeˉ jneˊ.
Hiꜙ niꜙ saꜙ maˉjmeeyhꜙ jneˊ
läꜙko̱hꜘ lleˋ kihˈ dsoˊkyeˉ heˉ naˉbä̱ä̱hˋ jneˊ.
11 Jëëhꜘ läꜙko̱hꜘ ñiiꜘ gyʉʉhˈ jmɨˉgyʉʉꜙ läꜙ gaꜙtëꜘ hwaꜗ laˉ,
läꜙja̱ˉ jʉʉhˉ heˉ läˉñihꜘ dsëyꜗ kihꜗ läꜙjë̱ë̱ꜙ hi̱ˉ ga̱yhꜙ.
12 Läꜙko̱hꜘ ʉ̱ʉ̱ꜘ jeeˊ gwaꜘ hyooˉ
hiꜙ läꜙ gaꜙtëꜘ jeeˊ dsaˉhmääˋ hyooˉ,
ko̱o̱ˉ ja̱ˉ ji̱i̱hˈ ʉ̱ʉ̱ꜘ gaꜙbeyꜗ heˉ hlɨɨhˈ heˉ maˉjmeeˊ jneˊ.
13 Läꜙko̱hꜘ dsaˉläˉñihꜘ dsëꜗ ja̱a̱ˉ tääˋ kihˈ jo̱o̱ꜘ,
läꜙja̱ˉ dsaˉläˉñihꜘ dsëꜗ Dio kihꜗ läꜙjë̱ë̱ꜙ hi̱ˉ ga̱yhꜙ.
14 Jëëhꜘ, ñeˉ bihꜗ hñiiyꜘ heeˉ kya̱a̱hˊ naˉla̱a̱ꜚ jneˊ.
Läꜙja̱ˉ dsooh˜ baˊ dsëyˈ heˉ naˉla̱a̱ꜚ jneˊ kya̱a̱hˊ gwaahˊ.
15 Jneˊ hi̱ˉ naˉla̱a̱ꜚ, saꜙ miˉheeꜙ jneˊ chaˉmiihˉ jmɨɨˊ.
La̱a̱ꜗ jneˊ läꜙko̱hꜘ waˊnuuˉ, läꜙko̱o̱ˉ mɨˈleꜗ baˊ la̱a̱ˈ jneˊ.
16 Waˊraˉ gaꜙjnohˈ lleꜘ nëˊ kihˈ, sɨ̱hꜘ goˉte˜.
Moꜙsoꜙ jnøøꜙ gaˊ jeeˊ maˊ hiiꜘ.
17 Pero heˉ läˉñihꜘ dsëꜗ Dio,
chaˉ gaꜙläꜙjëꜙ johꜘ jmɨɨˊ kya̱a̱hˊ läꜙjë̱ë̱ꜙ hi̱ˉ ga̱yhꜙ.
Läꜙ maˉngooꜗ ja̱ˉbaˊ lä̱ä̱y˜ läꜙ gaꜙtëꜘ jo̱o̱ꜘsɨɨhnˊ.
18 Läꜙja̱ˉ jmeeyꜗ kihꜗ hi̱ˉ høøꜙ hmoohˊ heˉ gaꜙjmeeyꜘ
hiꜙ kihꜗ hi̱ˉ saꜙ dsaˉgaaꜘ dsëꜗ
miˉteꜗ läꜙjëꜙ madaꜚ heˉ gaꜙhyoyhꜗ.
19 Gyʉʉhˈ jmɨˉgyʉʉꜙ baˊ laˈ
jeeˊ gyaˈ DSAˉJØ̱Ø̱Hˈ jnänˋ jmeeꜙ hihꜙ.
Läꜙka̱a̱ˉ läꜙjʉhꜗ baˊ jmeeyꜙ hihꜙ.
20 Hnähꜘ ángele, häˊ hnähꜘ kihꜗ DSAˉJØ̱Ø̱Hˈ jnänˋ,
hnähꜘ hi̱ˉ be̱e̱ꜘ hi̱ˉ miˉteꜗ juuˈ kiyhꜗ,
hnähꜘ hi̱ˉ nʉʉhˊ kya̱a̱hˊ juuˈ kiyhꜗ.
21 Läꜙjë̱ë̱ꜙ hnähꜘ ángele hi̱ˉ tä̱ä̱hˊ nëˊ,
häˊ hnähꜘ kihꜗ DSAˉJØ̱Ø̱Hˈ jnänˋ,
hnähꜘ hi̱ˉ jmeeꜙ taˊheꜗ kiyhꜗ läꜙko̱hꜘ hyohˉ dsëyꜗ.
22 Häˊ hnähꜘ kihꜗ DSAˉJØ̱Ø̱Hˈ jnänˋ läꜙjë̱ë̱ꜙ hnähꜘ hi̱ˉ tä̱ä̱hˊ läꜙka̱a̱ˉ läꜙjʉhꜗ jmɨˉgyʉʉꜙ jeeˊ jmeeyꜙ hihꜙ.
Läꜙja̱ˉ häˊ hneˉ jmɨˉlleꜘ kinꜙ kihꜗ DSAˉJØ̱Ø̱Hˈ jnänˋ.