80
Nʉʉˉ kinꜙ hneˉ Dio hi̱ˉ jä̱ä̱ꜙ dsaˉ Israel, hneˉ hi̱ˉ jä̱ä̱ꜙ José läꜙko̱hꜘ ja̱a̱ˉ hi̱ˉ jä̱ä̱ꜙ ko̱o̱ˉ nääꜗ borrego.Hneˉ hi̱ˉ gyaꜗ jeeˊ kihˈ ángele, miˉjnääˈ beꜘ kyahꜗ.
2 Nooˉ mahꜗ yaˉlä̱ä̱ˋ jnäähꜗ kya̱a̱hˊ beꜘ kyahꜗ, jnäähˈ hi̱ˉ la̱a̱ꜗ saˊju̱ˉ kya̱a̱ꜗ Efraín, kya̱a̱ꜗ Benjamín hiꜙ kya̱a̱ꜗ Manasés.
3 Hneˉ Dio,
jmeeˊ dsaˉje̱e̱h˜ jnäähꜗ kaˉlähꜘ läꜙhmëëꜘ kya̱a̱hˊ hneˉ.
Miˉjnääˈ heˉ lluꜗ hohꜘ kya̱a̱ꜗ jnäähˈ mahꜗ lä̱ä̱ˋ jnäähˈ.
4 Hneˉ DSAˉJØ̱Ø̱Hˈ kya̱a̱nꜙ hi̱ˉ la̱a̱ꜗ jʉʉˊ hløøꜘ,
haˉ ko̱hꜘ ji̱i̱hˈ läꜙhɨɨˊ heˉ lle̱e̱hꜘ kya̱a̱hˊ dsaˉ kya̱a̱hꜗ hi̱ˉ chu̱u̱ꜘ kya̱a̱hˊ hneˉ.
5 Gaꜙjmeehˊ gaꜙjnëꜗ dsëyꜗ kya̱a̱hˊ jmɨɨˉ heˉ gaꜙtu̱u̱ˉ mɨˈnëyˊ.
Gaꜙjmeehˊ saꜙ kya̱a̱hˊ hihꜙ gaꜙtu̱u̱ˉ jmɨɨˉ mɨˈnëyˊ.
6 Maˉjmäähˋ jnäähꜗ lëëˋ kihˈ dsaˉ hi̱ˉ tä̱ä̱hˊ kooꜘ kya̱a̱ꜗ jnäähꜗ.
Hiꜙ läꜙjë̱ë̱ꜙ hi̱ˉ naˉhøøhˊ, ngɨɨ˜ bihꜗ jë̱ë̱y˜ jnäähˈ.
7 Hneˉ Dio jʉʉˊ hløøꜘ, jmeeˊ dsaˉje̱e̱h˜ jnäähˈ kaˉlähꜘ läꜙhmëëꜘ kya̱a̱hˊ hneˉ.
Miˉjnääˈ heˉ lluꜗ hohꜘ kya̱a̱ꜗ jnäähˈ mahꜗ lä̱ä̱ˋ jnäähˈ.
8 Dsaˉ hi̱ˉ la̱a̱ꜗ läꜙko̱hꜘ chahˈ wɨ̱ɨ̱ˉ jëhˈ heˉ tɨh˜ hohꜘ,
hi̱ˉ heꜘ gaꜙhwë̱ë̱hˋ hwaˈ Egipto.
Gaꜙhëëhꜙ kihꜗ dsaˉ jñahꜘ hi̱ˉ maˊ tä̱ä̱hˊ hwaˈ kyahꜗ
mahꜗ gaꜙtä̱ä̱hˈ dsaˉ kya̱a̱hꜗ jeeˊ maˊ tä̱ä̱hˊ hi̱ˉ heꜘ.
9 Gaꜙhwë̱ë̱hˋ dsaˉ hi̱ˉ maˊ tä̱ä̱hˊ jä̱ä̱ˈ mahꜗ gaꜙjääˉ jeeˊ ja̱ˉ.
Läꜙko̱o̱ˉ dsaˉkwa̱a̱ꜙ chahˈ wɨ̱ɨ̱ˉ jëhˈ,
läꜙja̱ˉ gaꜙjmeehˊ gaꜙläꜙjwë̱ë̱ꜘ dsaˉ kya̱a̱hꜗ,
läꜙji̱i̱hˈ gaꜙlaꜗ ko̱o̱ˉ jwɨɨˉ jʉʉhˉ.
10 Läꜙkye̱ˉ mohꜘ gaꜙta̱a̱yhˋ maˊ gaꜙläꜙjwë̱ë̱yꜘ.
Saˊju̱ˉ kiyhꜗ gaꜙkwa̱a̱ꜗ läꜙko̱hꜘ dsaˉkwa̱a̱ꜙ chaahˈ hmaˉñihˊ.
11 Läꜙko̱hꜘ dsaˉjooꜘ chahˈ wɨ̱ɨ̱ˉ jëhˈ,
läꜙja̱ˉ gaꜙläꜙjwë̱ë̱ꜘ dsaˉ heꜘ,
läꜙji̱i̱hˈ gaꜙta̱a̱yhˋ läꜙ gaꜙtëꜘ chaˊhooˊ jmɨˉñeehꜚ.
Hiꜙ saˊju̱ˉ kiyhꜗ
gaꜙllooꜗ läꜙ gaꜙtëꜘ chaˊhooˊ jmɨɨˉ Éufrates.
12 ¿Heˉlaˈ moꜙsoꜙ hä̱ä̱hꜙ dsaˉ kya̱a̱hꜗ?
¿Heˉlaˈ maˉjmeehˊ kiyhꜗ läꜙko̱hꜘ heˉ maˉhlahꜗ saˊjnëꜗ kihꜗ chahˈ wɨ̱ɨ̱ˉ jëhˈ kyahꜗ?
Mahꜗ maˉkwahˊ jwëˈ kihꜗ dsaˉ jñahꜘ dsaˉta̱a̱yhˋ jmeeyhꜙ dsaˉ kya̱a̱hꜗ läꜙko̱hꜘ heˉ kuyhꜙ mɨˈjëhꜗ.
13 Laꜗ läꜙko̱hꜘ heˉ gaꜙta̱a̱hˋ ñeꜗnuuꜙ he̱e̱y˜ jeeˊ naˉjnääˊ chahˈ wɨ̱ɨ̱ˉ jëhˈ kyahꜗ.
Laꜗ läꜙko̱hꜘ heˉ gaꜙta̱a̱hˋ jahꜘ hi̱ˉ cha̱a̱ˉ nehꜙ nuuꜙ heˉsoyh˜ jeeˊ naˉjnääˊ chahˈ wɨ̱ɨ̱ˉ jëhˈ.
14 Hneˉ Dio jʉʉˊ hløøꜘ,
ñaˉ läꜙ gaꜙtëꜘ gyʉʉhˈ jmɨˉgyʉʉꜙ yaˉjë̱ë̱ˋ jnäähˈ.
Jmääˋ jnäähꜗ heˈ hi̱ˉ la̱a̱ꜗ läꜙko̱hꜘ chahˈ jëhꜗ kyahꜗ.
15 Hä̱ä̱ˋ jnäähˈ hi̱ˉ la̱a̱ꜗ läꜙko̱hꜘ chahˈ jëhꜗ heˉ gaꜙtä̱ä̱hˊ hñaahˈ,
jnäähˈ hi̱ˉ la̱a̱ꜗ läꜙko̱hꜘ saˊji̱hꜘ heˉ høøhˉ lluꜗ.
16 Jnäähˈ hi̱ˉ tä̱ä̱hˊ jëë˜ wɨɨꜘ, laꜗ kya̱a̱ꜗ jnäähˈ läꜙko̱o̱ˉ heˉ miˉki̱i̱yꜘ hiꜙ jë̱yˉ chahˈ wɨ̱ɨ̱ˉ jëhˈ.
He̱e̱ꜙ goˉte˜ hi̱ˉ jmeehꜙ jnäähˈ kya̱a̱hˊ heˉ yaˉjë̱ë̱ˈ hohꜘ.
17 Kwaˊ beꜘ kihꜗ dsaˉñʉʉhˉ hi̱ˉ naˉlle̱e̱hˊ kya̱a̱hˈ.
Kwaˊ beꜘ kihꜗ hi̱ˉ la̱a̱ꜗ saˊju̱ˉ kihꜗ dsaˉ hi̱ˉ gaꜙlla̱a̱hˋ.
18 Mahꜗ läꜙja̱ˉ moꜙsoꜙ läꜙø̱ø̱ꜘ jnäähˈ kyahꜗ.
Hneˉ jmeehˈ cha̱a̱ˉ jnäähˈ,
heˉja̱ˉ ja̱a̱ˉ hneˉ baˊ chu̱u̱ꜘ jnäähˈ kya̱a̱hˊ.
19 Hneˉ DSAˉJØ̱Ø̱Hˈ kya̱a̱nꜙ, hneˉ Dio jʉʉˊ hløøꜘ,
jmeeˊ dsaˉje̱e̱h˜ jnäähˈ kaˉlähꜘ läꜙhmëëꜘ kya̱a̱hˊ hneˉ.
Miˉjnääˈ heˉ lluꜗ hohꜘ kya̱a̱hˊ jnäähˈ, mahꜗ lä̱ä̱ˋ jnäähˈ.