78
Hnähꜘ dsaˉ kya̱a̱nꜙ, jmeeˊ heꜗ kihꜗ heˉ jwë̱ë̱hn˜ hnähꜘ.Nʉʉˉ läꜙjëꜙ juuˈ heˉ hlë̱ë̱hnˊ hnähꜘ.
2 Hlë̱ë̱hnˊ hnähꜘ kihꜗ haˉ läꜙ gaꜙlaꜗ jä̱ä̱ꜗ,
hlë̱ë̱hnˊ hnähꜘ heˉ maˊ naˉhmääˊ lloꜘjooꜗ.
3 Hlëëhnˊ kihꜗ läꜙjëꜙ heˉ maˉnʉʉˊ jneˊ,
hiꜙ läꜙjëꜙ juuˈ heˉ gaꜙjmeehꜗ dsaˉ maˉgyu̱hˉ jnänˋ.
4 Saꜙ hmänˊ juuˈ laˉ kihꜗ gyʉ̱ʉ̱ˉ jnänˋ,
niꜙ kihꜗ hi̱ˉ naꜗ gaˊ yaˉnääꜘ taꜙ chaˊnëˊ.
Chiihˊ jnihꜘ läꜙjëꜙ heˉ jʉhˉga̱a̱ˉ heˉ gaꜙjmeeꜘ Dio,
hiꜙ haˉ läꜙ laꜗ beꜘ kiyhꜗ heˉ jmeeꜙ dsa̱a̱˜ dsëˉ jneˊ.
5 Gaꜙllayꜘ heˉ gaꜙtë̱ë̱ꜘ jmeeꜗ dsaˉ kya̱a̱ꜗ Jacob.
Gaꜙkwëëyhꜗ jneˊ ley heˉ høøˉ jneˊ dsaˉ Israel,
mahꜗ gaꜙjmeeyꜘ madaꜚ heˉ heehnˊ gyʉ̱ʉ̱ˉ jnänˋ.
6 Mahꜗ läꜙja̱ˉ läꜙkyʉʉh˜ hi̱ˉ naꜗ gaˊ yaˉnääꜘ taꜙ chaˊnëˊ.
Hiꜙ läꜙja̱ˉ hi̱ˉ heꜘ heeyhꜗ jo̱o̱ꜘsɨɨyhˊ kaˉlähꜘ.
7 Läꜙjwëꜘ ja̱ˉ baˊ ka̱yˈ oˉjø̱hꜙ dsëˉ kihꜗ Dio,
mahꜗ saꜙ gaaꜘ dsëyꜗ läꜙjëꜙ heˉ jmeeꜙ Dio kya̱a̱yhˊ.
Läꜙja̱ˉ miˉtë̱ë̱yꜙ heˉ høøyꜗ madaꜚ heˉ gaꜙjmeeꜘ Dio kiyhꜗ.
8 Läꜙja̱ˉ saꜙ jmeeyꜗ läꜙko̱hꜘ gaꜙjmeeꜘ dsaˉ maˉgyu̱hˉ kya̱a̱yꜗ,
heˉ gaꜙjmeeyꜘ cha̱a̱yhˉ hiꜙ hwehˉ dsëyꜗ.
Dsaˉ heꜘ, saꜙ gaꜙhnaayhˉ Dio läꜙka̱a̱ˉ tuhˉdsëyꜗ,
saꜙ gaꜙmiꜙteyꜗ kya̱a̱hˊ Dio.
9 Dsaˉ kya̱a̱ꜗ Efraín,
maꜙkeꜙ maˉnaˊllu̱u̱yˋ maˊ dsaˉnääyꜗ jeeˊ hniiˉ,
gaꜙtëëyˉ hñiiyꜘ taꜙ kaˊluuyˊ,
gaꜙkyʉ̱ʉ̱yꜗ maˊ gaꜙtëꜘ jmɨɨˊ heˉ gaꜙläꜙchaꜙ hniiˉ.
10 Saꜙ gaꜙhøøyꜘ hmoohˊ heˉ gaꜙjmeeꜘ Dio kya̱a̱yhˊ,
saꜙ gaꜙläꜙhnøøyꜗ maˊ jmeeyˈ heˈ ley kihꜗ Dio.
11 Gaꜙgaaꜘ dsëyꜗ läꜙjëꜙ heˉ gaꜙjmeeꜘ Dio kya̱a̱yhˊ,
hiꜙ läꜙja̱ˉ kihꜗ läꜙjëꜙ heˉ jʉhˉga̱a̱ˉ heˉ gaꜙjëëyꜗ.
12 Toꜙloꜙnëˊ dsaˉ maˉgyu̱hˉ heꜘ, gaꜙjmeeꜘ Dio heˉ jʉhˉga̱a̱ˉ,
taꜙ jeeˊ jwɨɨˉ heˉ che̱e̱ˉ Zoán heˉ nøøꜘ hwaꜗ Egipto.
13 Gaꜙjmeeyꜘ jwëˈ to̱ꜗdsaahˋ jmɨˉñeehꜚ
jeeˊ gaꜙngëëꜘ dsaˉ heꜘ.
Gaꜙjmeeyꜘ kihꜗ jmɨɨˉ
läꜙko̱hꜘ naˊhyahˉ heˉ naˉchihꜗ ko̱o̱ˉ hwehˉ.
14 Taꜙlaꜙ jmɨɨˈ gaꜙjä̱ä̱yꜗ kya̱a̱hˊ jniiꜘ
heˉ gaꜙjmeeꜘ hi̱i̱hˈ kiyhꜗ.
Hiꜙ taꜙlaꜙ hwëˈ gaꜙläꜙjnäꜘ jeˉ
heˉ maˊ chooyꜙ kya̱a̱hˊ jmëëꜗ kiyhꜗ.
15 Gaꜙjmeeyꜘ gaꜙhyaˉ jmɨɨˉ dsohꜘ ku̱u̱ˊ hlooˉ jeeˊ laˈ hwaꜗ ki̱i̱ꜙ.
Gaꜙjmeeyꜘ gaꜙhyaˉ chaˉmiihˉ jmɨɨˉ heˉ gaꜙhɨ̱yhꜗ.
16 Jmɨɨˉ heˉ gaꜙhwëëˉ dsohꜘ ku̱u̱ˊ hlooˉ ja̱ˉ,
gaꜙngëëꜘ läꜙko̱hꜘ jmɨˉjʉʉhˉ.
17 Pero dsaˉ heꜘ gaꜙjmeeꜘ gyihꜗ heˉ hlɨɨhˈ chaˊnëˊ Dio.
Jeeˊ laˈ hwaꜗ ki̱i̱ꜙ gaꜙläꜙcha̱a̱yhꜙ kihꜗ hi̱ˉ gyaꜗ gyʉʉhˈ.
18 Gaꜙka̱yꜗ dsëꜗ Dio kya̱a̱hˊ hʉʉˊdsëˉ hlɨɨhˈ kiyhꜗ,
gaꜙngɨɨyꜘ maꜗ läꜙ llaꜙ dsëyꜗ.
19 Gaꜙhlëëyhꜘ wɨɨꜘ kihꜗ Dio, gaꜙjäyhꜘ: “¿Cheˊ jwaꜚ kwëëyhꜗ jneˊ heˉ kihnˊhi̱hnˊ hehꜗ hwaꜗ ki̱i̱ꜙ laˉ?
20 Gaꜙjmeeyꜘ gaꜙhyaˉ jmɨɨˉ dsohꜘ ku̱u̱ˊ hlooˉ.
Gaꜙngëëꜘ läꜙko̱hꜘ jmɨˉjʉʉhˉ, läꜙji̱i̱hˈ gaꜙhmääˋ hwaˈ.
¿Cheˊ jwaꜚ kwëëyhꜗ jneˊ heˉ kihnˊhi̱hnˊ?
¿Cheˊ kwayˈ läꜙkye̱ˉ ngoꜗ heˉ kihˊ jneˊ hi̱ˉ la̱a̱ꜗ dsaˉ kya̱a̱yꜗ?”
21 Maˊ gaꜙnuuꜘ Dio heˉ ja̱ˉ, gaꜙläꜙlle̱e̱yꜘ jwërte.
Gaꜙjyooꜗ heˉ yaˉjë̱ë̱ˈ dsëyꜗ läꜙko̱hꜘ jyooꜙ jeˉ, nëˊ kihˈ dsaˉ Israel hi̱ˉ la̱a̱ꜗ saˊju̱ˉ kihꜗ Jacob.
22 Läꜙja̱ˉ gaꜙlaꜗ kiyhꜗ,
kihꜗ heˉ saꜙ maˊ dsooꜘ dsëyꜗ kihꜗ Dio.
Hiꜙ niꜙ saꜙ maˊ kye̱yˉ oˉjø̱hꜙ dsëˉ kihꜗ hi̱ˉ maˊ kwaꜙ beꜘ kiyhꜗ.
23 Maꜙkeꜙ cha̱a̱hˉ dsaˉ heꜘ, maꜙraꜙ heˉ gaꜙjmeeꜘ baˊ Dio hihꜙ kihꜗ gyʉʉhˈ jmɨˉgyʉʉꜙ.
Hiꜙ läꜙcha̱hꜘ ja̱ˉ gaꜙnaꜘ gyʉʉhˈ jmɨˉgyʉʉꜙ.
24 Gaꜙjmeeyꜘ gaꜙhlaꜗ maná läꜙko̱hꜘ gwaꜘ jmaꜗ.
Gaꜙhlaꜗ mɨˈtrigo heˉ chaˉ gyʉʉhˈ heˉ gaꜙkuhˉ dsaˉ heꜘ.
25 Heˊñiihꜚ heˉ kuhˉ ángele baˊ ja̱ˉ heˉ gaꜙkuhˉ dsaˉ heꜘ.
Gaꜙläꜙchaꜙ heˉ gaꜙkuhˉ dsaˉ heꜘ läꜙji̱i̱hˈ maˊ dsaˉkë̱ë̱yꜗ.
26 Dio gaꜙche̱e̱ꜗ lleꜘ heˉ gwaꜘ taꜙ jeeˊ hyaˉ hyooˉ hiꜙ heˉ gwaꜘ taꜙ kye̱ꜗ,
gaꜙche̱e̱yꜗ kya̱a̱hˊ beꜘ kiyhꜗ taꜙ jeeˊ maˊ tä̱ä̱yhˊ ja̱ˉ.
27 Läꜙja̱ˉ gaꜙjmeeꜘ Dio gaꜙhlaꜗ chaˉmiihˉ ngoꜗ
läꜙko̱hꜘ dsaˉhlaꜗ tʉˊhløøˉ.
Gaꜙjmeeyꜘ gaꜙhla̱a̱ꜗ jwë̱ë̱ꜘ ta̱ˈ
läꜙko̱hꜘ mɨˈsɨɨˊ heˉ chaˉ chaˊhooˊ jmɨˉñeehꜚ.
28 Gaꜙjmeeyꜘ gaꜙhlaꜗ läꜙkuˊ läꜙji̱i̱ꜗ
jeeˊ maˊ tä̱ä̱hˊ dsaˉ heꜘ.
29 Gaꜙkuhˉ dsaˉ heꜘ läꜙji̱i̱hˈ gaꜙkë̱ë̱yꜗ,
gaꜙhyoyhꜗ baˊ läꜙko̱hꜘ gaꜙngɨɨyꜘ.
30 Saꜙ gaˊ maˉlaꜙ kiyhꜗ kuyhˉ,
naˉka̱hˈ gaˊ läꜙja̱ˉ toˊhooyˊ,
31 maˊ gaꜙjyooꜗ heˉ yaˉjë̱ë̱ˈ dsëꜗ Dio nëˊ kiyhˈ,
gaꜙjngëëyhꜗ läꜙjë̱ë̱ꜙ hi̱ˉ be̱e̱ꜘ gaˊ kya̱a̱ˈ dsaˉ Israel.
32 Maꜙkeꜙ gaꜙlaꜗ läꜙja̱ˉ kiyhꜗ
maꜙraꜙ heˉ gaꜙjmeeꜘ bihꜗ heˉ hlɨɨhˈ.
Saꜙ gaꜙjmeeyꜘ kwa̱a̱t˜ heˉ jʉhˉga̱a̱ˉ heˉ gaꜙjmeeꜘ Dio.
33 Heˉja̱ˉ gaꜙjngɨɨhꜗ Dio kihꜗ dsaˉ heꜘ,
gaꜙlaꜗ kiyhꜗ läꜙko̱hꜘ heˉ cha̱a̱h˜ dsëyꜗ baˊ.
Niꜙ saꜙ liihꜚ gyihꜗ jaꜗ heˉ wɨɨꜘ nëˊ kiyhˈ.
34 Maˊ gaꜙheehꜗ Dio wɨɨꜘ dsaˉ heꜘ,
ja̱ˉgaˊ naꜙ gaꜙhnaayhˉ Dio tääꜘ saꜙ tä̱ä̱yhˊ tiiˊ.
35 Gaꜙläꜙdsooh˜ dsëyꜗ kihꜗ Dio
hi̱ˉ la̱a̱ꜗ läꜙko̱hꜘ ku̱u̱ˊ hlooˉ jeeˊ leꜘ maˊ hmääyhꜗ.
Dio hi̱ˉ gyaꜗ gyʉʉhˈ baˊ heꜘ hi̱ˉ maˊ lä̱ä̱yˈ.
36 Ji̱i̱hˈ nëˊ waˊhooyˊ baˊ maˊ hnaayhˉ Dio,
pero taˉju̱u̱yꜗ baˊ ja̱ˉ.
37 Saꜙ maˊ laˈ ko̱o̱ˉ baˊ dsëyˈ kya̱a̱hˊ Dio,
niꜙ saꜙ maˊ miˉteyꜗ hmoohˊ heˉ gaꜙjmeeyꜘ kya̱a̱hˊ Dio.
38 Pero taꜙlaꜙ kihꜗ heˉ lluꜗ dsëꜗ Dio kya̱a̱yhˊ,
maˊ ko̱o̱yꜗ dsëyꜗ kihꜗ dsoˊkyeˉ heˉ maˊ jmeeyꜙ.
Saꜙ maˊ jngëëyhꜙ goˉte˜,
hlä̱ä̱ꜘ ji̱i̱h˜ saꜙ gaꜙläˉlle̱e̱yꜘ chaˉmiihˉ kya̱a̱yhˊ.
39 Gaꜙläꜙdsooh˜ dsëꜗ Dio heˉ maˊ la̱a̱yˈ dsaˉ jmɨˉgyʉʉꜙ baˊ.
Maˊ la̱a̱yˈ läꜙko̱hꜘ lleꜘ heˉ dsoo˜ hiꜙ moꜙsoꜙ gohˈ kaˉlähꜘ.
40 Johꜘ ji̱i̱h˜ saꜙ gaꜙjmeeyꜘ heˉ hlɨɨhˈ jeeˊ laˈ hwaꜗ ki̱i̱ꜙ ja̱ˉ.
Peerꜙ cha̱a̱hˉ dsaˉ heꜘ, heˉja̱ˉ gaꜙläꜙmeehꜙ dsëꜗ Dio.
41 Ko̱ˉllaˉji̱i̱h˜ maˊ ka̱y˜ dsëꜗ Dio,
heꜘ baˊ dsaˉ Israel heꜘ maˊ miˉlle̱e̱yꜘ hi̱ˉ naˉjngëëˈ kya̱a̱yꜗ.
42 Gaꜙgaaꜘ dsëyꜗ heˉ gaꜙla̱a̱yꜘ kya̱a̱hˊ beꜘ kihꜗ Dio
jeeˊ kihˈ hi̱ˉ maˊ naˉhøøhˊ kiyhˈ.
43 Gaꜙgaaꜘ dsëyꜗ heˉ jʉhˉga̱a̱ˉ heˉ gaꜙjmeeꜘ Dio,
jeeˊ che̱e̱ˉ Soán heˉ hlaˉ hwaꜗ Egipto.
44 Heꜘ baˊ hñiiꜘ Dio gaꜙjmeeꜘ gaꜙlɨɨꜗ jmaˉ jmɨˉjʉʉhˉ läꜙkye̱ˉ jmɨɨˉ mähˉ.
Hiꜙ niꜙ ja̱a̱ˉ moꜙsoꜙ gaꜙläꜙhnøøꜗ maˊ hɨ̱hˈ jmɨɨˉ ja̱ˉ.
45 Gaꜙche̱e̱yꜗ jëëˊ läꜙko̱o̱ˉ jniiꜘ jeeˊ kihˈ dsaˉ heꜘ,
hiꜙ gaꜙche̱e̱yꜗ jehꜗ hi̱ˉ maˊ jmeeꜙ chaˉmiihˉ jwɨɨhˋ kiyhˈ.
46 Gaꜙkuhˉ ha̱a̱ˈ mɨˈhmaˉ kiyhꜗ.
Hiꜙ chaˊi̱i̱hˉ gaꜙmiꜙllaˉ läꜙjëꜙ taˊ kiyhˈ.
47 Chahˈ wɨ̱ɨ̱ˉ jëhˈ kiyhꜗ gaꜙhe̱e̱ꜗ kya̱a̱hˊ mɨˈdsëꜗ.
Läꜙjëꜙ chahˈhmaˉ higo kiyhꜗ gaꜙløøˉ goˉte˜ kya̱a̱hˊ tʉˊhmooˉ.
48 Gaꜙju̱u̱ꜗ jahꜘ kya̱a̱yꜗ kya̱a̱hˊ mɨˈdsëꜗ,
hiꜙ gaꜙjngɨɨhꜗ ñihꜗ kihꜗ kyaˊ kya̱a̱yˈ.
49 Gaꜙche̱e̱yꜗ nëˊ kihˈ dsaˉ heꜘ heˉ lliꜘwɨɨꜘ
kihꜗ heˉ yaˉjë̱ë̱ˈ dsëyꜗ.
Kihꜗ heˉ gaꜙläꜙlle̱e̱ꜘ Dio kya̱a̱yhˊ,
heˉja̱ˉ jaꜗ dsooˊ jmɨˊwɨɨꜘ nëˊ kiyhˈ.
Hiꜙ gaꜙche̱e̱yꜗ ko̱o̱ˉ nääꜗ ángele hi̱ˉ gaꜙjngɨɨhꜗ kiyhꜗ.
50 Ja̱ˉ ji̱i̱hˈ moꜙsoꜙ gaꜙläꜙjø̱hꜙ dsëꜗ Dio kya̱a̱yhˊ,
gaꜙche̱e̱yꜗ heˉ yaˉjë̱ë̱ˈ dsëyꜗ nëˊ kihˈ hi̱ˉ heꜘ.
Saꜙ gaꜙlä̱ä̱yꜗ dsaˉ heꜘ mahꜗ saꜙ maˊ ju̱u̱yꜘ,
maꜙraꜙ heˉ gaꜙjngëëhꜗ bihꜗ.
51 Gaꜙjngëëyhꜗ läꜙjë̱ë̱ꜙ jo̱o̱ꜘ dsaˉ Egipto hi̱ˉ la̱a̱ꜗ hi̱ˉ ñʉʉhˉ toˉnëˊ kya̱a̱yˈ.
Gaꜙjngëëyhꜗ heˉ gaˊ gyʉ̱ʉ̱ˉ hi̱ˉ maˊ kye̱yˉ oˉjø̱hꜙ dsëˉ kihꜗ hi̱ˉ maˊ la̱a̱ˈ saˊju̱ˉ kihꜗ Cam.
52 Gaꜙhwë̱ë̱ꜗ Dio dsaˉ kya̱a̱ꜗ jeeˊ kihˈ dsaˉ Egipto läꜙko̱hꜘ hwë̱ë̱˜ dsaˉ ko̱o̱ˉ nääꜗ borrego.
Gaꜙjä̱ä̱yꜗ dsaˉ kya̱a̱yꜗ taꜙ jeeˊ laˈ hwaꜗ ki̱i̱ꜙ.
53 Gaꜙjä̱ä̱yꜗ naˉhä̱ä̱yˉ lluꜗ mahꜗ saꜙ chaˉ heˉ leꜘ kiyhꜗ,
taˊko̱ˉji̱i̱hˈ gaꜙhmäähꜗ hi̱ˉ naˉhøøhˊ kiyhˈ chaˊjmɨˉñeehꜚ.
54 Gaꜙjä̱ä̱yꜗ dsaˉ kya̱a̱yꜗ taꜙ hwaꜗ naˉjngɨɨˈ kiyhꜗ, taꜙ jeeˊ laˈ mohꜘ heˉ gaꜙlɨyhꜗ kya̱a̱hˊ beꜘ kiyhꜗ.
55 Gaꜙhëëyꜗ kihꜗ dsaˉ jñahꜘ hi̱ˉ maˊ tä̱ä̱hˊ jeeˊ ja̱ˉ
toꜙloꜙnëˊ dsaˉ kya̱a̱yꜗ,
mahꜗ gaꜙtiꜗ gaꜙllooyhꜗ hwaꜗ ja̱ˉ
kihꜗ läꜙjë̱ë̱ꜙ nääꜗ dsaˉ kya̱a̱yꜗ.
Jeeˊ ja̱ˉ baˊ gaꜙlaꜗ he̱e̱ꜚ dsaˉ Israel.
56 Pero dsaˉ heꜘ gaꜙka̱yꜗ dsëꜗ Dio hi̱ˉ gyaꜗ gyʉʉhˈ,
hiꜙ gaꜙjmeeyꜘ yaˉjë̱ë̱ˈ dsëyꜗ,
saꜙ gaꜙjmeeyꜘ heˈ madaꜚ kiyhꜗ.
57 Dsaˉ heꜘ gaꜙjmeeꜘ ja̱ˉbaˊ läꜙko̱hꜘ gaꜙjmeeꜘ dsaˉ maˉgyu̱hˉ kya̱a̱yꜗ.
Gaꜙtʉyꜗ jwëꜘ kihꜗ Dio hiꜙ saꜙ gaꜙmiꜙteyꜗ.
Gaꜙka̱yh˜ jwëˈ läꜙko̱hꜘ flecha heˉ dsoo˜ taꜙ kooꜘ.
58 Gaꜙjmeeyꜘ yaˉjë̱ë̱ˈ dsëꜗ Dio
kya̱a̱hˊ naˊhyooꜘ heˉ gaꜙjmeeyꜘ ja̱ˉ.
Gaꜙjmeeyꜘ gaꜙläꜙllihꜗ Dio,
heˉ gaꜙjmääyꜗ jñahꜘ dio hi̱ˉ gaꜙjmeeyꜘ jʉʉhˉ kihꜗ.
59 Maˊ gaꜙjëëꜗ Dio heˉ ja̱ˉ, gaꜙläꜙlle̱e̱yꜘ jwërte.
Peerꜙ gaꜙläꜙhä̱ä̱yhˋ dsaˉ Israel.
60 Moꜙsoꜙ gaꜙgyayˉ nehꜙ gwahꜙ kiyhꜗ heˉ maˊ chihˈ Silo.
Moꜙsoꜙ gaꜙläꜙjnääyꜘ nehꜙ gwahꜙ heˉ maˊ laˈ kya̱a̱hˊ looˉ jahꜘ heˉ maˊ chihˈ jeeˊ maˊ tä̱ä̱hˊ dsaˉ kya̱a̱yꜗ.
61 Gaꜙkwayꜘ jwëˈ gaꜙko̱o̱ˈ dsaˉ jñahꜘ waˊgooꜘ
heˉ maˊ chihˈ nehꜙ gwahꜙ heˉ maˊ miˉjnääꜙ beꜘ kiyhꜗ.
Gaꜙko̱o̱ˈ hi̱ˉ naˉhøøhˊ heꜘ,
heˉ maˊ miˉjnääꜙ haˉ ko̱hꜘ saꜙ jø̱ø̱hˈ la̱a̱ꜗ Dio.
62 Gaꜙngëëyꜗ dsaˉ kya̱a̱yꜗ gooˉ hi̱ˉ naˉhøøhˊ mahꜗ jngɨɨhꜗ kiyhˈ.
Gaꜙläꜙlle̱e̱yꜘ gaꜙngëëꜘ jwë̱ë̱ˈ kya̱a̱hˊ dsaˉ kya̱a̱yꜗ.
63 Jwë̱ë̱ꜘ chihˉñʉʉhˉ gaꜙka̱a̱ꜘ kya̱a̱hˊ jeˉ.
Hiꜙ chihˉmëꜘ kya̱a̱ꜗ dsaˉ heꜘ gaꜙjä̱ꜘ kihꜗ hñiiꜘ,
moꜙsoꜙ gaꜙje̱e̱ꜘ gooyˉ.
64 Läꜙkye̱ˉ jmiˉdsaˉ kya̱a̱yꜗ, gaꜙju̱u̱ꜗ kya̱a̱hˊ ñeˈtuuhꜚ.
Dsaˉmëꜘ hi̱ˉ gaꜙjä̱ꜘ hnëëꜘ kya̱a̱ꜗ jmiˉdsaˉ,
moꜙsoꜙ gaꜙlaꜗ maˊ hooyhˈ.
65 Läꜙko̱hꜘ heˉ maˊ naˉgwɨ̱ɨ̱ˉ baˊ Dio maˊ jmeeꜙ kiyhꜗ.
Ja̱ˉgaˊ gaꜙnooyˉ gaꜙjmeeyꜘ heˈ kihꜗ dsaˉ kya̱a̱yꜗ,
läꜙko̱hꜘ jmeeꜙ ja̱a̱ˉ hi̱ˉ hä̱ä̱ˈ maˊ dsaˉnøhꜗ dsëꜗ maˉhe̱e̱ꜘ.
66 Gaꜙjmääyhˉ dsooˊ hi̱ˉ naˉhøøhˊ hi̱ˉ gaꜙjmeehꜙ dsaˉ kya̱a̱yꜗ.
Gaꜙjmeeyꜘ gaꜙkyʉ̱ʉ̱ꜗ hi̱ˉ heꜘ kya̱a̱hˊ oˉhihꜙ läꜙjëꜙ johꜘ jmɨɨˊ chaˉ.
67 Gaꜙjmääyꜗ taꜙ kooꜘ dsaˉ kya̱a̱ꜗ José.
Saꜙ gaꜙläꜙhnääyꜗ saˊju̱ˉ kya̱a̱ꜗ Efraín.
68 Maꜙlaꜙ saˊju̱ˉ kya̱a̱ꜗ Judá baˊ gaꜙlle̱e̱yhˉ.
Läꜙja̱ˉ gaꜙjmeeyꜘ kihꜗ mohꜘ Sión heˉ tɨh˜ dsëyꜗ chaˉmiihˉ.
69 Jeeˊ ja̱ˉ gaꜙjmeeyꜘ ko̱o̱ˉ gwahꜙ jʉhˉga̱a̱ˉ,
heˉ chihꜗ ko̱o̱ˉ hwehˉ läꜙko̱hꜘ kyeˉ ko̱o̱ˉ hwehˉ hwaꜗ laˉ.
70 Gaꜙlle̱e̱yhˉ David hi̱ˉ jmeeꜙ taˊheꜗ kiyhꜗ,
hi̱ˉ maˊ hä̱ä̱˜ ko̱o̱ˉ nääꜗ borrego.
71 Gaꜙtëëyˉ jeeˊ maˊ jä̱ä̱yꜙ ko̱o̱ˉ nääꜗ jahꜘ,
mahꜗ le̱e̱yꜘ ja̱a̱ˉ hi̱ˉ ka̱ꜗ nëˊ kihˈ saˊju̱ˉ kya̱a̱ꜗ Jacob,
le̱e̱yꜘ jʉʉˊ dsaˉ Israel hi̱ˉ naˉlle̱e̱hˊ kya̱a̱ꜗ Dio.
72 Gaꜙjä̱ä̱yꜗ dsaˉ kya̱a̱ꜗ Dio kya̱a̱hˊ ko̱o̱ˉ nëëˈ baˊ hʉʉˊdsëˉ,
gaꜙhä̱ä̱yꜗ kweeˉ läꜙjëꜙ jmɨɨˊ baˊ.