72
Hneˉ Dio kya̱a̱nꜙ, kwaˊ beꜘ kihꜗ dsaˉtaˊ jø̱ø̱hꜗmahꜗ llayꜗ taˊ läꜙko̱hꜘ llahˉ hneˉ taˊ.
Kwaˊ beꜘ kihꜗ jo̱o̱yꜘ
mahꜗ jmeeyꜗ heˉ lluꜗ jmahꜗ läꜙko̱hꜘ jmeehˉ hñaahꜗ.
2 Mahꜗ läꜙja̱ˉ llayꜗ taˊ kihꜗ dsaˉ kya̱a̱hꜗ kya̱a̱hˊ juꜗdsooꜘ.
Ja̱ˉbaˊ läꜙja̱ˉ jmeeyꜗ kihꜗ hi̱ˉ täˉñeeꜘ kya̱a̱hꜗ.
3 Läꜙjëꜙ mohꜘ ñiiꜘ hiꜙ läꜙka̱a̱ˉ jeeˊ hwa̱a̱ˈ,
waˊ kwaꜘ mɨɨˈ heˉ kuhˉhɨ̱h˜ dsaˉ,
läꜙlluꜗ heˉ jmeeꜙ dsaˉtaˊ jø̱ø̱hꜗ läꜙko̱o̱ˉ lleˋ kihꜗ.
4 Waˊ nooyˉ nëˊ kihꜗ hi̱ˉ täˉñeeꜘ,
hiꜙ waˊ lä̱ä̱yhˈ hi̱ˉ llaˉkya̱a̱ꜗ,
mahꜗ hi̱ˉ hñaaˉ dsëꜗ waˊ hmääyhˉ taꜙ hwaꜗ.
5 Hi̱ˉ llaˉkya̱a̱ꜗ heꜘ, waˊ ga̱yhꜙ dsaˉtaˊ jø̱ø̱hꜗ ko̱o̱ˉ kyooˉ baˊ,
läꜙko̱o̱ˉ ngooꜗ jnä̱ä̱ꜘ hyooˉ kya̱a̱hˊ sɨhˉ, läꜙjëꜙ johꜘ jmɨɨˊ chaˉ.
6 Taˊ lluˈ heˉ jmeeꜗ dsaˉtaˊ jø̱ø̱hˈ ja̱ˉ,
leꜘ läꜙko̱hꜘ jmaꜗ heˉ dsaˉhuuꜗ nëˊ nuuˉ,
läꜙko̱hꜘ jmɨˉhmooˊ heˉ miˉgyʉhꜘ hwaꜗ.
7 Waˊ jmeeꜘ dsaˉ chaˉgaˊmiihˉ heˉ lluꜗ jmahꜗ,
taˊko̱ˉji̱i̱hˈ jmeeyꜙ hihꜙ,
läꜙja̱ˉ waˊ hiiꜘ tiiˊ chaˉgaˊmiihˉ kihꜗ hwaꜗ ja̱ˉ,
läꜙji̱i̱hˈ lloo˜ jmɨɨˊ ä̱ä̱hˈ sɨhˉ.
8 Läꜙka̱a̱ˉ jeeˊ laˈ taꜙ hngaahˋ jmɨˉñeehꜚ hiꜙ läꜙka̱a̱ˉ kihꜗ jmɨˉjʉʉhˉ,
läꜙkuˊ läꜙji̱i̱ꜗ kihꜗ jmɨˉgyʉʉꜙ jmeeyꜗ hihꜙ.
9 Läꜙjë̱ë̱ꜙ hi̱ˉ cha̱a̱ˉ hwaꜗ ki̱i̱ꜙ, ju̱hꜗ jnëꜗ chaˊnëyˊ,
läꜙja̱ˉ hi̱ˉ naˉhøøhˊ kiyhˈ jä̱yꜗ taꜙ hwaꜗ goˉte˜.
10 Dsaˉka̱a̱hˊ kya̱a̱ˈ Tarsis kya̱a̱hˊ hi̱ˉ cha̱a̱ˉ chaˊhooˊ jmɨˉñeehꜚ, hiꜙ dsaˉka̱a̱hˊ kya̱a̱ˈ Sabá hiꜙ Seba,
yaˉka̱yˉ kuuˊ, yaˉka̱yˉ løøˈ heˉ chaˉ kiyhꜗ.
11 Läꜙjë̱ë̱ꜙ dsaˉka̱a̱hˊ ju̱hꜗ jnëˊ chaˊnëyˊ,
läꜙ gaꜙdsaꜗ jmɨˉgyʉʉꜙ jmeeꜗ taˊheꜗ kiyhꜗ.
12 Hñiiꜘ bihꜗ lä̱ä̱yꜗ hi̱ˉ täˉñeeꜘ hi̱ˉ chu̱u̱ꜘ kya̱a̱yhˊ,
hiꜙ läꜙja̱ˉ lä̱ä̱yꜗ hi̱ˉ llaˉkya̱a̱ꜗ hi̱ˉ saꜙ cha̱a̱ˉ hi̱ˉ kwaꜗ beꜘ kihꜗ.
13 Dsaˉtaˊ jø̱ø̱hꜗ jnänˋ läˉñihꜘ dsëyꜗ kihꜗ hi̱ˉ täˉñeeꜘ,
hiꜙ läˉñihꜘ dsëyꜗ kihꜗ hi̱ˉ llaˉkya̱a̱ꜗ, läꜙja̱ˉ lä̱ä̱yꜗ hi̱ˉ heꜘ.
14 Lä̱ä̱yꜗ kihꜗ dsaˉ hi̱ˉ miˉgooꜙ kiyhꜗ
hiꜙ lä̱ä̱yꜗ kihꜗ hi̱ˉ hñaaˉ dsëꜗ,
jëëhꜘ kuˈji̱i̱ꜙ kihꜗ dsaˉtaˊ jø̱ø̱hꜗ heˉ dsaˉtʉ̱ʉ̱ꜙ jmaˉ kihꜗ dsaˉ kya̱a̱yꜗ.
15 Waˊ laˈ jʉʉhˉ kihꜗ dsaˉtaˊ jø̱ø̱hꜗ.
Waˊ kwëëyhˈ kuˊnøøꜚ heˉ hwëëˉ taꜙ hwaꜗ Sabá.
Waˊ chu̱u̱ꜘ dsaˉ kya̱a̱hˊ Dio tä̱ä̱ꜘ
mahꜗ miˉjä̱ä̱yꜗ dsaˉtaˊ jø̱ø̱hꜗ.
16 Waˊ chaˉ chaˉmiihˉ mɨˈtrigo hwaꜗ laˉ.
Hiꜙ läꜙja̱ˉ jeeˊ laˈ mohꜘ kaˉlähꜘ.
Waˊ hyaˉ mɨɨˈ läꜙko̱hꜘ dsaˉhyaꜙ hmaˉ taꜙ hwaꜗ Líbano.
Waˊ läꜙjwë̱ë̱ꜘ dsaˉ hwaꜗ laˉ läꜙko̱o̱ˉ nuuˉ eehˉ.
17 Dsaˉtaˊ jø̱ø̱hꜗ hi̱ˉ jmeeꜙ hihꜙ
waˊ cha̱a̱yˉ tä̱ä̱ꜘ, läꜙko̱o̱ˉ cha̱a̱ˉ waˊhyooˉ.
Taꜙlaꜙ kihꜗ dsaˉtaˊ jø̱ø̱hꜗ heꜘ,
jä̱ꜗ naˉjä̱ä̱ꜚ läꜙjë̱ë̱ꜙ dsaˉ jmɨˉgyʉʉꜙ.
Läꜙjë̱ë̱ꜙ baˊ dsaˉ jmɨˉgyʉʉꜙ jähꜙ:
“Heˉ baˊ cheˉ llu̱u̱ꜗ dsaˉtaˊ jø̱ø̱hˈ jnänˋ.”
18 Peerꜙ jø̱hˈga̱a̱ˉ DSAˉJØ̱Ø̱Hˈ jnänˋ
hi̱ˉ la̱a̱ꜗ Dio kya̱a̱ꜗ jnäähˈ dsaˉ Israel.
Ja̱a̱ˉ hñiiꜘ bihꜗ jmeeyꜙ heˉ jʉhˉga̱a̱ˉ,
saꜙ cha̱a̱ˉ gaˊ jñahꜘ.
19 Waˊ nʉʉhꜘ tä̱ä̱ꜘ heˉ jø̱hˈga̱a̱ˉ Dio.
Läꜙka̱a̱ˉ hwaꜗ laˉ, waˊ läꜙjnäꜘ haˉ ko̱hꜘ jø̱ø̱hˈ saꜙ la̱a̱yꜗ.
Amén, waˊ laˈ läꜙja̱ˉ.
20 Jeeˊ laˉ dsaˉlla̱a̱ꜙ läꜙjëꜙ salmo heˉ gaꜙsɨɨꜘ David jo̱o̱ꜘ Isaí.