66
Jë̱ë̱ˉ hohꜘ hnähꜘ häˊ hnähꜘ kihꜗ Dio,läꜙjë̱ë̱ꜙ hnähꜘ dsaˉ jmɨˉgyʉʉꜙ.
2 Miˉjnäähˈ hnähꜘ kya̱a̱hˊ su̱ꜚ haˉ ko̱hꜘ saꜙ jø̱ø̱yhˈ,
jmeeˊ hnähꜘ jʉʉhˉ kiyhꜗ kya̱a̱hˊ su̱ꜚ.
3 Chiihˊ Dio:
“Haˉ ko̱hꜘ saꜙ dsa̱a̱˜ dsëˉ jnäähˈ läꜙko̱hꜘ laꜗ taˊ kyahꜗ,
haˉ ko̱hꜘ saꜙ chaˉ beꜘ kyahꜗ.
Heˉja̱ˉ lloo˜ ko̱o̱ˉ jmɨɨˊ
läꜙjë̱ë̱ꜙ hi̱ˉ naˉhøøhˊ kyahˈ ngëëyꜗ hñiiyꜘ jaˊgoohˉ.
4 Läꜙka̱a̱ˉ jmɨˉgyʉʉꜙ yaˉnääꜘ ju̱hꜗ jnëˊ chaˊnëhˊ,
häyꜗ kyahꜗ kya̱a̱hˊ su̱ꜚ mahꜗ jmeeyꜗ jʉʉhˉ kyahꜗ.”
5 Yaˉnääꜘ hnähꜘ, yaˉnʉʉˉ haˉ läꜙ laꜗ heˉ maˉjmeeꜘ Dio.
Heˉ baˊ cheˉ jʉhˉga̱a̱ˉ laꜗ heˉ maˉjmeeyꜘ jeeˊ kihꜗ dsaꜙ.
6 Gaꜙnaꜘ ko̱o̱ˉ jwëˈ jeeˊ jmɨˉñeehꜚ.
Dsaˉ maˉgyu̱hˉ jnänˋ, gaꜙha̱a̱yꜗ jmɨˉjʉʉhˉ jwëꜘ tɨɨyˊ.
Waˊ jë̱ë̱ˉ dsëˉ jneˊ kya̱a̱hˊ Dio.
7 Kya̱a̱hˊ beꜘ kiyhꜗ jmeeyꜙ hihꜙ tä̱ä̱ꜘ baˊ.
Ka̱y˜ kwa̱a̱t˜ haˉ läꜙ tä̱ä̱hˊha̱a̱ˊ dsaˉ jmɨˉgyʉʉꜙ.
Läꜙja̱ˉ läꜙjë̱ë̱ꜙ hi̱ˉ cha̱a̱hˉ
moꜙsoꜙ gwaꜘ dsëyꜗ te̱e̱yꜗ kya̱a̱yhˊ.
8 Läꜙka̱a̱ˉ jmɨˉgyʉʉꜙ, häˊ hnähꜘ kihꜗ Dio jnänˋ,
häˊ hnähꜘ ki̱ˉga̱a̱ˉ kiyhꜗ.
9 Läꜙ maˉjmeeꜙ bihꜗ cha̱a̱ˉ jneˊ,
saꜙ kwayꜗ jwëˈ tä̱hꜙ jneˊ.
10 Hneˉ Dio kya̱a̱nꜙ,
heˉ lluꜗ kya̱a̱ꜗ jnäähꜗ baˊ heˉ gaꜙheehˋ jnäähˈ wɨɨꜘ.
Heˉ ja̱ˉ laꜗ läꜙko̱hꜘ heˉ maˉgye̱e̱hˋ jnäähˈ
läꜙko̱hꜘ jmeeꜙ dsaˉ kihꜗ ñeˈtøøˉ heˉ miˉlluyꜗ kya̱a̱hˊ jeˉ.
11 Gaꜙtä̱ä̱hˈ jnäähˈ nehꜙ hmaꜗ,
gaꜙkya̱a̱hˋ jnäähˈ løøˈ hiiˉ.
12 Gaꜙkwahˊ jwëꜗ heˉ heˊsohꜗ waˊ hi̱ˉ chaˉ hi̱ˉ nëˊ kya̱a̱ˈ jnäähꜗ.
Laꜗ läꜙko̱o̱ˉ heˉ maˉngëëꜘ jnäähˈ jwëꜘ nëˊ jeˉ,
läꜙko̱o̱ˉ heˉ maˉngëëꜘ jnäähˈ jeeˊ juuhˉ chaˉmiihˉ jmɨɨˉ.
Pero naꜗ maˉjmeehˊ maˉtë̱ë̱hꜗ jnäähˈ chaˉmiihˉ beꜘ.
13 Heˉja̱ˉ dsaˉhenꜘ chaˊnehꜙ kyahꜗ kye̱nˊ heˉ kwëëhnꜚ hneˉ.
Miˊteˋ baˊ jnäꜘ heˉ gaꜙbä̱ä̱hnˋ hñiinꜙ kya̱a̱hˊ hneˉ.
14 Jmeeˋ baˊ jnäꜘ läꜙjëꜙ heˉ gaꜙjwë̱ë̱hnꜗ hneˉ,
läꜙ maˊ gaꜙjëënꜗ heˉ wɨɨꜘ.
15 Kwa̱a̱nꜚ jahꜘ hi̱ˉ ba̱a̱hˊ hi̱ˉ ka̱a̱ꜙ nëˊ naˊhyooꜘ kyahꜗ.
Kwa̱a̱nꜚ kyaˊ kya̱a̱hˊ chivo hi̱ˉ ka̱a̱ꜙ.
Kwa̱a̱nꜚ läꜙjë̱ë̱ꜙ nëëˈ jahꜘ läꜙko̱o̱ˉ lleˋ kihˈ jmeenˋ.
16 Yaˉnääꜘ hnähꜘ läꜙjë̱ë̱ꜙ hi̱ˉ ga̱hꜙ Dio,
mahꜗ nuuhˈ hnähꜘ haˉ läꜙ laꜗ heˉ maˉjmeeyꜘ kya̱a̱hˊ jnäꜘ.
17 Kya̱a̱hˊ waˊhoonꜙ gaꜙchu̱u̱nꜗ kya̱a̱yhˊ
mahꜗ gaꜙhänꜗ kiyhꜗ.
18 Waˊraˉ jähꜘ kihꜗ saꜙ gaꜙmiꜙjnäänˈ heˉ maˊ dsaˉhlä̱ä̱hnꜙ kya̱a̱yhˊ, saꜙ maˊ nuuˈ Dio kinꜙ.
19 Pero gaꜙnuuꜘ baˊ Dio kinꜙ,
gaꜙjmeeꜘ bihꜗ heˈ heˉ gaꜙchu̱u̱nꜗ kya̱a̱yhˊ.
20 ¡Heˉ baˊ cheˉ jø̱hˈga̱a̱ˉ Dio!
Saꜙ gaꜙjmeeyꜘ taꜙ kooꜘ heˉ gaꜙchu̱u̱nꜗ kya̱a̱yhˊ,
niꜙ saꜙ gaꜙjmeeyꜘ cha̱a̱yhˉ.
Maꜙraꜙ heˉ gaꜙläꜙñihꜘ baˊ dsëyˈ jnäꜘ.