47
Läꜙjë̱ë̱ꜙ hnähꜘ dsaˉ, jnooˋ hnähꜘ jaˊgooˉ.Häˊ hnähꜘ kihꜗ Dio jnänˋ ki̱ˉga̱a̱ˉ
kihꜗ heˉ cha̱a̱ˉ hnähꜘ lluꜗ.
2 Jëëhꜘ DSAˉJØ̱Ø̱Hˈ jnänˋ hi̱ˉ gyaꜗ gyʉʉhˈ peerꜙ ga̱hꜗ jneˊ kiyhˈ.
Hiꜙ la̱a̱yꜗ dsaˉtaˊ jø̱ø̱hˈ kihꜗ gaꜙläꜙka̱a̱ˉ läꜙjʉhꜗ jmɨˉgyʉʉꜙ.
3 Gaꜙmiꜙhwa̱a̱yꜘ läꜙjë̱ë̱ꜙ nääꜗ dsaˉ,
mahꜗ gaꜙtooyhˉ gooˉ jnäähˈ jmeeˊ jnäähˈ hihꜙ kiyhꜗ.
4 Dio gaꜙlleˉ ko̱o̱ˉ hwaꜗ jeeˊ laˈ he̱e̱ꜚ jnäähꜗ.
Peerꜙ naˊhñaahꜗ laꜗ he̱e̱ꜚ Jacob hi̱ˉ gaꜙläꜙhnääyꜗ.
5 Jeeˊ baˊ mɨɨhˊ gaꜙgyaˉ Dio hø̱ø̱ˈ jeeˊ jmeeyꜙ hihꜙ,
hiꜙ läꜙja̱ˉ jeeˊ hi̱i̱ˊ luuꜘ hooˊ kaˉlähꜘ.
6 Häˊ hnähꜘ kihꜗ Dio,
häˊ hnähꜘ su̱ꜚ kihꜗ Dsaˉtaˊ jø̱ø̱hˈ jnänˋ.
7 Jëëhꜘ Dio la̱a̱ꜗ Dsaˉtaˊ jø̱ø̱hˈ kihꜗ gaꜙläꜙka̱a̱ˉ jmɨˉgyʉʉꜙ.
Häˊ hnähꜘ kiyhꜗ kya̱a̱hˊ ko̱o̱ˉ juuˈ heˉ laꜗ naˊhñaahꜗ.
8 Dio la̱a̱ꜗ Dsaˉtaˊ jø̱ø̱hˈ hi̱ˉ jmeeꜙ hihꜙ kihꜗ läꜙka̱a̱ˉ jmɨˉgyʉʉꜙ.
Gyayꜗ jeeˊ naˉjngɨɨˈ goˉte˜ jmeeyꜙ hihꜙ.
9 Läꜙjë̱ë̱ꜙ dsaˉka̱a̱hˊ kya̱a̱ˈ läꜙjëꜙ jeeˊ jwɨɨˉ
gaꜙku̱hꜗ kya̱a̱hˊ läꜙjë̱ë̱ꜙ dsaˉ kya̱a̱ꜗ Dio, hi̱ˉ la̱a̱ꜗ Dio kya̱a̱ꜗ Abraham.
10 Jëëhꜘ kya̱a̱ꜗ Dio baˊ la̱a̱ˈ läꜙjë̱ë̱ꜙ hi̱ˉ ka̱a̱hˊ hi̱ˉ cha̱a̱ˉ jmɨˉgyʉʉꜙ laˉ.
Ja̱a̱ˉ hi̱ˉ heꜘ baˊ jø̱ø̱hˈ kihꜗ jeeˊ läꜙjë̱ë̱ꜙ.