38
Hneˉ DSAˉJØ̱Ø̱Hˈ kya̱a̱nꜙ, taꜙ jʉʉhˋ kinꜙ läꜙ maˊ lle̱e̱hꜘ.Niꜙ taꜙ jmeehˋ jnäꜘ maˊ yaˉjë̱ë̱ˈ hohꜘ.
2 Flecha kyahꜗ gaꜙsa̱a̱ꜗ nëˊ kinꜙ,
hiꜙ nëˊ kinꜙ gwaꜘ heˉ yaˉjë̱ë̱ˈ hohꜘ.
3 Niꜙ ko̱o̱ˉ saꜙ chaˉ jeeˊ lluˈ kinꜙ, kwa̱a̱t˜ kihꜗ heˉ lle̱e̱hꜘ.
Läꜙka̱a̱ˉ jmɨˉngoꜗ kinꜙ kuˈji̱i̱ꜙ, kwa̱a̱t˜ kihꜗ dsoˊkyeˉ kinꜙ.
4 Dsoˊkyeˉ kinꜙ maˉllooꜗ läꜙ gaꜙtëꜘ gyʉʉhˈ llenꜙ,
laꜗ läꜙko̱hꜘ løøˈ hiiˉ heˉ saꜙ ø̱ø̱hnꜙ.
5 Kwa̱a̱t˜ kihꜗ heˉ cha̱a̱hnˉ, heˉja̱ˉ dsoˊkyeˉ kinꜙ laꜗ läꜙko̱o̱ˉ heˉ ngooꜗ dsaˉjyahꜙ jmɨˉngoꜗ kinꜙ hiꜙ jwä˜ miˉjuuˉ.
6 Laꜗ kinꜙ läꜙko̱o̱ˉ heˉ naˉjlu̱u̱nˈ tä̱ä̱ꜘ baˊ,
läꜙjëꜙ jmɨɨˊ baˊ tiˉmeehˉ dsënꜙ.
7 Läꜙ gaꜙdsaꜗ kaˊluunꜙ maˉläˉlliiꜘ,
niꜙ ko̱o̱ˉ saꜙ chaˉ jeeˊ lluˈ kinꜙ.
8 Niꜙ miihˉ saꜙ chaˉ beꜘ kinꜙ,
laꜗ läꜙko̱o̱ˉ heˉ naˉchiˊ naˉjøøˊ jmɨˉngoꜗ kinꜙ.
Läꜙ gaꜙtëꜘ nehꜙ tuhˉdsënꜙ kɨˉhooh˜.
9 Dsaˉjø̱ø̱hˈ kya̱a̱nꜙ, kyu̱u̱h˜ baˊ hneˉ läꜙjëꜙ heˉ he̱e̱ꜘ dsënꜙ.
Heˉ cha̱a̱h˜ dsënꜙ saꜙ naˉhmääˊ kyahˈ.
10 Mɨˈdsënꜙ maˉngooꜗ hli̱i̱ꜙ chaˉmiihˉ,
beꜘ kinꜙ maˉngooꜗ dsaˉlla̱a̱ꜙ.
Hiꜙ läꜙkye̱ˉ mɨˈnënꜙ maˉngooꜗ dsaˉløøꜙ.
11 Omeꜚ kya̱a̱nꜙ, kya̱a̱hˊ dsaˉkya̱a̱hnˊ hiꜙ kya̱a̱hˊ hi̱ˉ cha̱a̱ˉ kinꜙ, tä̱ä̱yhˊ ʉ̱ʉ̱ꜘ kwa̱a̱t˜ kihꜗ dsooˊ heˉ la̱a̱nꜗ.
12 Hi̱ˉ hnøøꜗ jngëëhꜗ jnäꜘ hɨɨˉ läꜘ kinꜙ.
Hi̱ˉ hnøøꜗ jmeeꜗ hlɨɨhˈ kinꜙ hɨɨyˉ juuˈ jngëëyhꜗ jnäꜘ.
Läꜙjëꜙ jmɨɨˊ baˊ hnooyhˉ haˉ läꜙ jmeeyꜗ kinꜙ.
13 Pero jnäꜘ läꜙko̱hꜘ hi̱ˉ gwɨɨˋ baˊ jmeenꜙ saꜙ nuunꜙ kiyhꜗ.
Hiꜙ läꜙko̱hꜘ hi̱ˉ kooˋ hi̱ˉ saꜙ hlëëhꜙ baˊ jmeenꜙ.
14 La̱a̱nꜗ läꜙko̱hꜘ dsaˉ hi̱ˉ saꜙ nuuˉ,
hi̱ˉ saꜙ leꜘ ji̱i̱hˊ kiyhˈ niꜙ miihˉ.
15 Jnäꜘ jø̱ø̱nˊ kyahˈ hneˉ DSAˉJØ̱Ø̱Hˈ kya̱a̱nꜙ.
Jëëhꜘ nuuhˈ baˊ hneˉ kinꜙ.
16 Jwë̱ë̱hnꜚ hneˉ:
“Saꜙ waˊ ngëëyˈ jnäꜘ, niꜙ saꜙ waˊ jmääyˈ hñiiꜘ jø̱ø̱yhˈ
waˊraˉ gaꜙjëëyꜗ maˉta̱hnꜘ.”
17 Maꜙraꜙ juˈdsooꜘ, gaꜙtiiꜗ heˉ tä̱hnꜙ.
Niꜙ ko̱ˉhwëëꜘ saꜙ tʉ˜ heˉ kuˈji̱i̱ꜙ kinꜙ.
18 Miˊjnääˈ baˊ jnäꜘ dsoˊkyeˉ kinꜙ.
Peerꜙ meehˉ dsënꜙ kihꜗ heˉ gaꜙjmeenꜗ heˉ hlɨɨhˈ.
19 Maˉku̱hꜗ gaˊ hi̱ˉ naˉhøøhˊ kinꜙ.
Hiꜙ jwë̱ë̱ꜘ maˉla̱a̱ꜗ hi̱ˉ saꜙ hnääꜗ jnäꜘ
niꜙ saꜙ chaˉ heˉ kihꜗ.
20 Maꜙkeꜙ jmeenꜙ heˉ lluꜗ,
miˊhmaayhˋ kinꜙ kya̱a̱hˊ heˉ hlɨɨhˈ.
Saꜙ hnääyꜗ jnäꜘ kihꜗ heˉ jmeenꜙ heˉ lluꜗ.
21 Hneˉ DSAˉJØ̱Ø̱Hˈ kya̱a̱nꜙ, taꜙ be̱e̱ꜙ jnäꜘ hñiinꜙ.
Dio kya̱a̱nꜙ, taꜙ waˊ läꜙø̱ø̱hꜘ hneˉ kinꜙ.
22 Naꜗko̱hꜘ kwaˊ beꜘ kinꜙ DSAˉJØ̱Ø̱Hˈ kya̱a̱nꜙ hi̱ˉ lä̱ä̱˜ jnäꜘ.