25
Hneˉ DSAˉJØ̱Ø̱Hˈ kya̱a̱nꜙ, kya̱a̱hˊ hneˉ baˊ chu̱u̱nꜘ tä̱ä̱ꜘ.2 Jëëhꜘ maˉchaˉ baˊ oˉjø̱hꜙ dsëˉ kinꜙ kya̱a̱hˊ hneˉ Dio kya̱a̱nꜙ.
Taꜙ kwaˉ jwëˈ jä̱nˋ oˉhihꜙ,
niꜙ heˉ ngɨɨꜗ hi̱ˉ naˉhøøhˊ kinꜙ.
3 Dsooꜘ baˊ niꜙ ja̱a̱ˉ hi̱ˉ chaˉ oˉjø̱hꜙ dsëˉ kihꜗ kya̱a̱hˊ hneˉ
saꜙ jä̱ꜗ oˉhihꜙ ji̱hˊko̱hꜘ.
Pero läꜙjë̱ë̱ꜙ hi̱ˉ cha̱a̱hˉ kya̱a̱hˊ hneˉ mahꜗ saꜙ chaˉ heˉ kihꜗ jmeeyꜙ läꜙja̱ˉ, hi̱ˉ heꜘ baˊ jä̱ˈ oˉhihꜙ.
4 Heehˋ jnäꜘ haˉ läꜙ laꜗ jwëꜘ kyahꜗ, hneˉ DSAˉJØ̱Ø̱Hˈ kya̱a̱nꜙ.
Heehˋ jnäꜘ haˉ läꜙ hnoohˉ hñaahꜗ baˊ.
5 Jä̱ä̱ꜙ jnäꜘ läꜙ hnøøꜗ juˈdsooꜘ kyahꜗ mahꜗ läꜙngëënꜘ lluꜗ,
jëëhꜘ hneˉ baˊ la̱a̱hˈ Dio hi̱ˉ lä̱ä̱˜ jnäꜘ.
Läꜙta̱a̱ˈ jmɨɨˊ baˊ chaˉ oˉjø̱hꜙ dsëˉ kinꜙ kya̱a̱hˊ hneˉ.
6 Hneˉ DSAˉJØ̱Ø̱Hˈ kya̱a̱nꜙ,
waˊ läˉñihꜘ hohꜘ kiꜙ jnäꜘ kihꜗ heˉ lluꜗ hohꜘ.
Jëëhꜘ läꜙja̱ˉ jmahꜗ baˊ jmeehˉ läꜙjëꜙ johꜘ jmɨɨˊ chaˉ.
7 Pero dsoˊkyeˉ heˉ gaꜙjmeenꜗ läꜙ maˊ mähnˈ,
hiꜙ kihꜗ heˉ gaꜙjmeenꜗ cha̱a̱hnˉ, waˊ gaaꜘ hohꜘ.
Heˉja̱ˉ waˊraˉ gaꜙläꜙdsooh˜ hohꜘ jnäꜘ, waˊ läˉñihꜘ hohꜘ kinꜙ.
Jëëhꜘ maꜙraꜙ heˉ lluꜗ hohꜘ hneˉ DSAˉJØ̱Ø̱Hˈ kya̱a̱nꜙ.
8 Peerꜙ llu̱u̱ꜗ DSAˉJØ̱Ø̱Hˈ jnänˋ hi̱ˉ jmeeꜙ heˉ lluꜗ jmahꜗ.
Heˉja̱ˉ miˉjnääyꜙ kihꜗ dsaˉ hi̱ˉ jmeeꜙ heˉ hlɨɨhˈ haˉ läꜙ laꜗ jwëꜘ lluꜗ.
9 Jä̱ä̱yꜙ hi̱ˉ hwa̱a̱ˊ taꜙ jwëꜘ dsooꜘ baˊ.
Jä̱ä̱yꜙ taꜙ jwëꜘ kiyhꜗ hi̱ˉ saꜙ jmää˜ hñiiꜘ ka̱a̱hˊ.
10 Peerꜙ läˉñihꜘ dsëꜗ Dio jneˊ
hiꜙ maꜙraꜙ heˉ miˉteꜗ bihꜗ juuˈ kiyhꜗ.
Läꜙja̱ˉ baˊ jmeeyꜙ kya̱a̱hˊ hi̱ˉ miˉteꜗ hmoohˊ kiyhꜗ
hiꜙ kya̱a̱hˊ läꜙjë̱ë̱ꜙ hi̱ˉ miˉteꜗ madaꜚ kiyhꜗ.
11 Hneˉ DSAˉJØ̱Ø̱Hˈ kya̱a̱nꜙ, chaˉmiihˉ laꜗ dsoˊkyeˉ kinꜙ.
Jmeeˊ jø̱hˉ hohꜘ kinꜙ mahꜗ läꜙjnäꜘ la̱a̱hꜗ jø̱ø̱hˈ.
12 Hi̱hꜗ dsaˉñʉʉhˉ hi̱ˉ ga̱hꜙ Dio,
hi̱ˉ heꜘ baˊ heeyhˈ, heeˉ jwëꜘ naˉ ka̱yꜗ.
13 Jmeeꜗ Dio naˉjø̱ø̱ꜚ chaˉmiihˉ jeeˊ gyayꜙ,
hiꜙ jo̱o̱yꜘ hyohꜙ bihꜗ hwaꜗ heˉ kwaꜗ Dio.
14 DSAˉJØ̱Ø̱Hˈ jnänˋ la̱a̱ꜗ omeꜚ kya̱a̱ꜗ läꜙjë̱ë̱ꜙ hi̱ˉ ga̱yhꜙ.
Heˉja̱ˉ jmeeyꜗ läꜙngëëꜘ hi̱ˉ heꜘ haˉ läꜙ laꜗ hmoohˊ kiyhˈ.
15 Kihꜗ DSAˉJØ̱Ø̱Hˈ jnänˋ baˊ jø̱ø̱n˜ läꜙjëꜙ jmɨɨˊ,
jëëhꜘ hi̱ˉ heꜘ lä̱ä̱˜ jnäꜘ kihꜗ läꜙjëꜙ heˉ hiiꜘ gooˉ kinꜙ.
16 Jë̱ë̱ˋ jnäꜘ, waˊ läˉñihꜘ hohꜘ kinꜙ,
jëëhꜘ hñiiꜙ baˊ jnäꜘ jeeˊ dsaˉngëënꜘ wɨɨꜘ.
17 Chaˉgaˊmiihˉ cha̱a̱nˉ wɨɨꜘ ko̱o̱ˉ jmɨɨˊ ko̱o̱ˉ jmɨɨˊ.
Lä̱ä̱ˋ jnäꜘ kihꜗ läꜙjëꜙ heˉ naˉ.
18 Jëëˋ daˊ, haˉ ko̱hꜘ teꜗ heˉ wɨɨꜘ heˉ cha̱a̱nˉ,
hiꜙ lä̱ä̱ˋ jnäꜘ kihꜗ läꜙjëꜙ dsoˊkyeˉ kinꜙ.
19 Jëëˋ daˊ, ja̱hꜘ hi̱ˉ naˉhøøhˊ kinꜙ saꜙ cha̱a̱ˉ,
hiꜙ haˉ ko̱hꜘ saꜙ naˉhä̱ä̱yhˊ jnäꜘ.
20 Hä̱ä̱ˋ jnäꜘ, lä̱ä̱ˋ jnäꜘ, taꜙ kwaˉ jwëˈ jä̱nˋ kya̱a̱hˊ oˉhihꜙ,
jëëhꜘ chaˉ baˊ oˉjø̱hꜙ dsëˉ kinꜙ kya̱a̱hˊ hneˉ.
21 Heˉ ngënꜙ lluꜗ kya̱a̱hˊ hʉʉˊdsëˉ naˉjngɨɨˈ kinꜙ,
heˉ naˉ baˊ hä̱ä̱˜ jnäꜘ.
Jëëhꜘ kyahꜗ baˊ hneˉ chaˉ oˉjø̱hꜙ dsëˉ kinꜙ.
22 Hneˉ Dio kya̱a̱nꜙ,
lä̱ä̱ˋ dsaˉ Israel kihꜗ läꜙjëꜙ heˉ wɨɨꜘ heˉ cha̱a̱yˉ.