21
DSAˉJØ̱Ø̱Hˈ kya̱a̱nꜙ, jë̱ë̱ˉ dsëꜗ hi̱ˉ la̱a̱ꜗ dsaˉtaˊ,jëëhꜘ hneˉ maˉkwëëyhˋ beꜘ.
Cha̱a̱yˉ chaˉmiihˉ lluꜗ kihꜗ heˉ maˉlɨyh˜ llaˉdsëëyˋ.
2 Maˉkwëëyhˋ heˉ hyohˉ dsëyꜗ.
Saꜙ gaꜙjmeehˊ cha̱a̱hˉ kya̱a̱hˊ heˉ maˊ ngɨɨyꜙ kyahꜗ.
3 Gaꜙhe̱e̱hˋ baˊ hnihꜘ lluꜗ, gaꜙmiꜙjä̱ä̱yhꜚ chaˉmiihˉ.
Gaꜙllaꜙllehꜚ lleyˊ ko̱o̱ˉ coron heˉ naˉlaꜚ kya̱a̱hˊ ñeˈnøøꜚ jmahꜗ.
4 Gaꜙngɨɨyꜘ heˉ cha̱a̱yˉ tä̱ä̱ꜘ, hiꜙ gaꜙkwëëyhˋ baˊ.
Gaꜙjmeehˊ heˉ cha̱a̱yˉ gaꜙläꜙjëꜙ johꜘ jmɨɨˊ chaˉ.
5 Kihꜗ heˉ gaꜙlä̱ä̱hˋ hnihꜘ heˉja̱ˉ jʉʉhˉ laꜗ kiyhꜗ.
Peerꜙ hiiꜘ juuˈ kiyhꜗ, kihꜗ heˉ gaꜙlla̱a̱hˋ hnihꜘ jø̱ø̱hˈ.
6 Jëëhꜘ maˉmiˉjä̱ä̱hꜚ hnihꜘ kihꜗ gaꜙläꜙjëꜙ johꜘ jmɨɨˊ chaˉ.
Kihꜗ heˉ chehꜗ kooꜘ kiyhꜗ,
heˉja̱ˉ baˊ naˉ jë̱ë̱ˉ dsëyꜗ chaˉmiihˉ.
7 Hi̱ˉ la̱a̱ꜗ dsaˉtaˊ, saꜙ tä̱yhꜙ ji̱hˊko̱hꜘ,
jëëhꜘ kye̱yˉ oˉjø̱hꜙ dsëˉ kihꜗ DSAˉJØ̱Ø̱Hˈ jnänˋ.
Läꜙlaˉ baˊ ñeyˉ heˉ läˉñihꜘ dsëꜗ Dio kiyhꜗ.
8 Läꜙjë̱ë̱ꜙ hi̱ˉ naˉhøøhˊ kyahˈ tä̱yhꜙ jaˊgoohˉ.
Kya̱a̱hˊ beꜘ kyahꜗ llaˉdsëëhˋ kihˈ hi̱ˉ saꜙ jwa̱hꜘ kya̱a̱hˊ hneˉ.
9 Läꜙko̱o̱ˉ heˉ ka̱a̱ꜙ dsaˉ heꜘ nehꜙ hwɨ̱ɨ̱ˊ baˊ jmeehˈ,
waˊraˉ gaꜙtëꜘ jeeˊ ka̱hꜗ juˈdsooꜘ.
Waˊraˉ gaꜙtëꜘ jeeˊ läꜙlle̱e̱ꜘ DSAˉJØ̱Ø̱Hˈ jnänˋ,
miˉlla̱a̱yꜙ goˉte˜ dsaˉ heꜘ kya̱a̱hˊ jeˉ.
10 He̱e̱hˈ goˉte˜ saˊju̱ˉ kiyhꜗ nëˊ hwaˈ laˉ.
Saꜙ jä̱ꜗ niꜙ ja̱a̱ˉ jo̱o̱ꜘsɨɨyhˊ jmɨˉgyʉʉꜙ laˉ.
11 Jëëhꜘ maˊ hnøøyˈ maˊ jmeeyˈ heˉ hlɨɨhˈ kyahꜗ.
Maˊ hnoohˉ gyihꜗ jyohꜘ haˉ läꜙ jeeˊ maˊ te̱e̱yˈ kya̱a̱hˊ hneˉ, pero ji̱hˊko̱hꜘ saꜙ liyhꜙ.
12 Hneˉ jmeehˈ dsaˉje̱e̱yh˜ taꜙ kaˊluuyˊ waˊraˉ gaꜙcho̱o̱hˈ hmaˉ kyahꜗ mahꜗ tehˈ flecha kiyhˈ.
13 Nooˉ mahꜗ miˉjnäähˈ beꜘ kyahꜗ DSAˉJØ̱Ø̱Hˈ kya̱a̱nꜙ,
mahꜗ läꜙja̱ˉ jmeeˊ jnäähˈ jmɨɨˊ
hiꜙ häˊ jnäähˈ kyahꜗ hi̱ˉ lihꜙ llaˉdsëëˋ.