19
Läꜙjëꜙ heˉ jëëˉ jneˊ gyʉʉhˈ jmɨˉgyʉʉꜙ miˉjnääꜙ haˉ ko̱hꜘ saꜙ jø̱ø̱hˈ la̱a̱ꜗ Dio.Läꜙjëꜙ heˉja̱ˉ miˉjnääꜙ läꜙko̱o̱ˉ laꜗ taˊ heˉ gaꜙjmeeyꜘ.
2 Läꜙjëꜙ jmɨɨˊ baˊ miˉjnääyꜙ haˉ läꜙ la̱a̱ꜗ Dio.
Läꜙkye̱ˉ hwëˈ miˉjnääyꜙ ja̱ˉbaˊ heˉ ja̱ˉ.
3 Läꜙja̱ˉ jmeeyꜙ maꜙkeꜙ saꜙ hlëëyhꜙ,
maꜙkeꜙ saꜙ jmeeyh˜ juuˈ heˉ nʉʉˉ jneˊ.
4 Pero kwa̱a̱t˜ kihꜗ hi̱ˉ heꜘ läꜙka̱a̱ˉ jmɨˉgyʉʉꜙ maˉläˉngëëꜘ dsaˉ haˉ läꜙ laꜗ taˊ kihꜗ Dio.
Niꜙ ja̱a̱ˉ saꜙ cha̱a̱ˉ hi̱ˉ leꜘ jähꜘ saꜙ maˉläˉngëëyꜘ.
Läꜙ gaꜙdsaꜗ jmɨˉgyʉʉꜙ laꜗ läꜙko̱o̱ˉ hneꜗ kihꜗ hyooˉ.
5 Läꜙjëꜙ jmɨɨˊ baˊ kwaꜙ hyooˉ jmëëꜗ kihꜗ.
Laꜗ kiyhꜗ läꜙko̱o̱ˉ ja̱a̱ˉ dsaˉñʉʉhˉ hi̱ˉ dsaˉkya̱a̱ꜘ mëꜘ,
hiꜙ läꜙko̱o̱ˉ ja̱a̱ˉ hi̱ˉ hli̱i̱ꜙ maˊ jë̱ë̱ˉ dsëyꜗ chaˉmiihˉ.
6 Läꜙ gaꜙtëꜘ jeeˊ hyaˉ, läꜙji̱i̱hˈ jeeˊ dsaˉhmääˋ,
niꜙ ja̱a̱ˉ saꜙ lä̱ä̱ꜘ kihꜗ heˉ lliiꜘ hyooˉ.
7 Juuˈ kihꜗ Dio laꜗ lluꜗ goˉte˜, heˉ jmeeꜙ dsaˉnøhꜗ dsëˉ jneˊ.
Dsaˉläˉteꜗ baˊ läꜙjëꜙ madaꜚ kiyhꜗ, hiꜙ juuˈ kiyhꜗ jmeeꜙ dsaˉläˉkyʉʉh˜ dsaˉ hi̱ˉ saꜙ ngëëꜘ.
8 Läꜙjëꜙ madaꜚ kiyhꜗ laꜗ lluꜗ goˉte˜,
heˉ jmeeꜙ jë̱ë̱ˉ tuhˉdsëꜗ dsaˉ.
Naˉjngɨɨˈ baˊ laˈ madaꜚ kiyhꜗ
heˉ jmeeꜙ dsaˉläˉngëëꜘ dsaˉ.
9 Heˉ ga̱hꜙ jneˊ Dio, heˉ ja̱ˉ baˊ laˈ naˉjngɨɨˈ jnänˋ,
hiꜙ jmeeꜙ cha̱a̱ˉ jneˊ tä̱ä̱ꜘ.
Läꜙjëꜙ hihꜙ kiyhꜗ laꜗ juˈdsooꜘ jmahꜗ baˊ,
hiꜙ kweeˉ baˊ laˈ lluꜗ kihꜗ läꜙjë̱ë̱ꜙ.
10 Tɨh˜ gaˊ dsëˉ jneˊ juuˈ kihˈ Dio,
läꜙko̱hꜘ gaˊ chaˉmiihˉ kuˊnøøꜚ,
hiꜙ øøꜘ gaˊ läꜙko̱hꜘ tahꜗ heˉ tu̱u̱ˉ jeeˊ hiiꜘ hneꜗ kihꜗ.
11 Heˉ naˉ naˉ hlë̱ë̱h˜ hi̱ˉ jmeeꜙ taˊheꜗ kyahꜗ.
Lluꜗ laꜗ kihꜗ hi̱ˉ miˉteꜗ, läꜙja̱ˉ hyohꜙ bihꜗ jñeeyˈ.
12 ¿Hi̱i̱ˉ baˊ ñeˉ haˉ ko̱hꜘ teꜗ heˉ maˉhlä̱ä̱yhˉ?
Jmeeˊ jø̱hˉ hohꜘ kihꜗ heˉ maˉhlä̱ä̱hnˉ jeeˊ saꜙ manꜙ.
13 Jñuuhˊ kihˈ hi̱ˉ jmeeꜙ taˊheꜗ kyahꜗ
heˉ jmääy˜ hñiiyꜘ jø̱ø̱hˈ.
Taꜙ kwaˉ jwëˈ kihꜗ heˉ naˉ mahꜗ jmeeꜗ hihꜙ kinꜙ,
ja̱ˉgaˊ naꜙ le̱e̱nꜘ naˉjngëëˈ kihꜗ dsoˊkyeˉ heˉ jʉʉhˉ gaˊ.
14 Waˊ jäˉ hlëëhnˋ heˉ lluꜗ jmahꜗ baˊ,
hiꜙ waˊ lluˈ läꜙkye̱ˉ hʉʉˊdsëˉ kinꜙ
mahꜗ tɨh˜ hohꜘ hneˉ DSAˉJØ̱Ø̱Hˈ kya̱a̱nꜙ
hi̱ˉ la̱a̱ꜗ läꜙko̱o̱ˉ ku̱u̱ˊ hlooˉ hi̱ˉ lä̱ä̱˜ jnäꜘ.