17
Hneˉ DSAˉJØ̱Ø̱Hˈ kya̱a̱nꜙ, nʉʉˉ kihꜗ läꜙjëꜙ heˉ cha̱a̱nˉ,jëëhꜘ saꜙ chaˉ heˉ hlɨɨhˈ maˉjmeenꜗ.
Jmeeˊ heꜗ heˉ hlë̱ë̱hnˊ hneˉ,
nʉʉˉ kinꜙ heˉ chu̱u̱nꜘ kya̱a̱hˊ hneˉ,
ja̱ꜙ heˉ laꜗ juuˈ taˉjuuˈ heˉ jwahnꜙ.
2 Kyahꜗ hneˉ jø̱ø̱nˊ heeˉ naˉ jwahˈ,
jëëhꜘ hneˉ ka̱hˉ kwa̱a̱t˜ kya̱a̱hˊ juꜗdsooꜘ jmahꜗ baˊ.
3 Maˉkye̱hˊ kwa̱a̱t˜ haˉ läꜙ laꜗ tuhˉdsënꜙ,
läꜙkye̱ˉ hwëˈ maˉñehꜗ kinꜙ.
Maˉjë̱ë̱hˋ jnäꜘ niꜙ läꜙja̱ˉ saꜙ chaˉ heˉ hlɨɨhˈ maˉjnääh˜ kinꜙ.
Maˉllaꜙ dsënꜙ moꜙsoꜙ hlëëhnˊ juuˈ heˉ saꜙ jmääꜗ taˊ.
4 Kya̱a̱hˊ juuˈ kyahꜗ maˉhä̱ä̱nꜙ hñiinꜙ
mahꜗ saꜙ jmeenˋ läꜙko̱o̱ˉ të̱ë̱ˈ jmeeꜙ hi̱ˉ hñaaˉ dsëꜗ.
5 Kwaˊ beꜘ kinꜙ heˉ hä̱ä̱nˊ jwëꜘ kyahꜗ, mahꜗ saꜙ tä̱hnꜙ.
6 Taꜙ kyahꜗ hneˉ baˊ chu̱u̱nꜘ,
jëëhꜘ ja̱a̱ˉ hneˉ baˊ nuuhˉ kinꜙ.
Nʉʉˉ läꜙjëꜙ heˉ hlë̱ë̱hnˊ hneˉ Dio kya̱a̱nꜙ.
7 Miˉjnääˈ kinꜙ jë̱ë̱ˉ goˉte˜ haˉ ko̱hꜘ läˉñihꜘ hohꜘ jnäꜘ,
hneˉ hi̱ˉ lä̱ä̱˜ dsaˉ hi̱ˉ hnøøꜗ dsaˉta̱a̱hˋ kooꜘ kyahꜗ
jeeˊ saꜙ hiiꜘ gooˉ kiyhꜗ mahꜗ lä̱ä̱yꜘ kihꜗ hi̱ˉ naˉhøøhˊ.
8 Hä̱ä̱ˋ jnäꜘ läꜙko̱hꜘ høøhˉ mɨˊnëhˊ, hmääˋ jnäꜘ kooꜘ kyahꜗ,
9 mahꜗ saꜙ jë̱ë̱yꜗ jnäꜘ hi̱ˉ hñaaˉ dsëꜗ hi̱ˉ jmeehꜙ jnäꜘ.
Hmääˋ jnäꜘ kihꜗ hi̱ˉ naˉhøøhˊ kinꜙ hi̱ˉ hnøøꜗ jngëëhꜗ jnäꜘ.
10 Hi̱ˉ hñaaˉ dsëꜗ jmääy˜ hñiiꜘ ka̱a̱hˊ, hlëëyhꜙ juuˈ ta̱a̱hꜗ.
11 Jä̱hꜙ goˉte˜ baˊ maˉcha̱a̱yˈ kaahˋ kinꜙ,
maˉtä̱ä̱yhˊ jø̱ø̱y˜ haˉ läꜙ jwä̱ä̱yꜗ jnäꜘ taꜙ hwaꜗ.
12 Jmeeyꜙ läꜙko̱hꜘ ja̱a̱ˉ león hi̱ˉ hnoohˉ heˉ kuhˉ,
hiꜙ läꜙko̱hꜘ ja̱a̱ˉ león mähꜗ hi̱ˉ ko̱ˉdsu̱hˉ hñiiꜘ jeeˊ hli̱i̱yꜗ.
13 Hneˉ DSAˉJØ̱Ø̱Hˈ kya̱a̱nꜙ, nooˉ nëˊ kinꜙ.
Goˉte̱e̱ꜘ kya̱a̱hˊ hi̱ˉ hñaaˉ dsëꜗ
mahꜗ waˊ tä̱yhˉ jeeˊ gaꜙnääyˊ.
Lä̱ä̱ˋ jnäꜘ kihꜗ dsaˉ hlë̱ë̱hˈ kya̱a̱hˊ ñeˈtuuhꜚ kyahꜗ.
14 Kya̱a̱hˊ beꜘ kyahꜗ lä̱ä̱ˋ jnäꜘ kihꜗ läꜙjë̱ë̱ꜙ hi̱ˉ heꜘ.
Heˉ chaˉ jmɨˉgyʉʉꜙ baˊ laˈ he̱e̱yꜚ.
Chaˉ chaˉmiihˉ kiyhꜗ heˉ gaꜙhyoyhꜗ kyahꜗ.
Jmeeꜙ dsaˉcha̱a̱ꜘ kihꜗ gyʉ̱ʉ̱ˉ kya̱a̱yꜗ läꜙkye̱ˉ kihꜗ gyʉ̱ʉ̱ˉ llooyˋ.
15 Pero jnäꜘ, lloo˜ ko̱o̱ˉ jmɨɨˊ jë̱ë̱nꜚ hneˉ
kihꜗ heˉ jmeenꜙ heˉ lluꜗ jmahꜗ.
Jë̱ë̱ꜘ dsënꜙ heˉ jë̱ë̱nꜚ hneˉ
waˊraˉ gaꜙlla̱a̱hnꜗ yaꜙjwɨɨꜗ kyahꜗ.