12
Hneˉ DSAˉJØ̱Ø̱Hˈ kya̱a̱nꜙ lä̱ä̱ˋ jnäꜘ,jëëhꜘ moꜙsoꜙ cha̱a̱ˉ dsaˉ hi̱ˉ jmeeꜗ lluꜗ,
saꜙ cha̱a̱ˉ niꜙ ja̱a̱ˉ hi̱ˉ miˉteꜗ juuˈ kihꜗ.
2 Läꜙjë̱ë̱ꜙ baˊ miˉga̱a̱yꜙ dsaˉkya̱a̱yhˊ,
hlëëyhꜙ juuˈ naˊhñaahꜗ kya̱a̱hˊ waˊhooyˊ,
hiꜙ läꜙko̱hꜘ hi̱ˉ lluꜗ dsëꜗ baˊ hlëëyhꜙ.
3 Dio jneꜗ hooˊ läꜙjë̱ë̱ꜙ hi̱ˉ hlëëhꜙ naˊhñaahꜗ,
hiꜙ läꜙja̱ˉ jmeeyꜗ kihꜗ hi̱ˉ hlëëhꜙ juuˈ kaahˊ kaˉlähꜘ.
4 Jneyꜗ hooˊ hi̱ˉ jähꜘ:
“Maꜙraꜙ heˉ le̱hꜙ baˊ jneˊ kya̱a̱hˊ maꜙlaꜙ juuˈ jmahꜗ.
Jëëhꜘ leꜘ baˊ hlëëhnˊ läꜙ hnøøˉ jneˊ hñaanˈ.
Haˉ taꜙ jäꜙ hi̱ˉ la̱a̱ꜗ dsaˉjʉʉˊ jneˊ.”
5 “Naꜗ gaˊ naꜙ noonˋ nëˊ kihˈ hi̱ˉ täˉñeeꜘ hi̱ˉ jëë˜ wɨɨꜘ
hiꜙ läꜙja̱ˉ kihꜗ hi̱ˉ moꜙsoꜙ jmääꜗ kihꜗ dsaˉ.
Peerꜙ tä̱ä̱yhˊ kɨˉhooyh˜”, jähꜘ Dio.
“Kwa̱a̱nˋ beꜘ kiyhꜗ,
jëëhꜘ läꜙja̱ˉ kuhˉngɨɨꜙ tuhˉdsëyꜗ jmeenˋ.”
6 Juuˈ kihꜗ Dio laꜗ naˉjngɨɨˈ goˉte˜, laꜗ läꜙko̱hꜘ kuuˊ tøøˉ
heˉ jë̱ˉ dsaˉ gyiiꜗ ji̱i̱h˜ nëˊ jeˉ jeeˊ miˉlluyꜗ.
7 Hneˉ DSAˉJØ̱Ø̱Hˈ kya̱a̱nꜙ, hneˉ baˊ hä̱ä̱hꜗ jnäähˈ.
Gaꜙläꜙjëꜙ jmɨɨˊ baˊ hä̱ä̱hꜗ jnäähˈ kihꜗ hi̱ˉ hñaaˉ dsëꜗ,
8 maꜙkeꜙ hi̱ˉ hñaaˉ dsëꜗ heꜘ gaꜙnääˊ taꜙ laꜙ taꜙ jnøꜙ,
hiꜙ maꜙkeꜙ läꜙka̱a̱ˉ jmɨˉgyʉʉꜙ hlëëyhꜙ lluꜗ kihꜗ heˉ hlɨɨhˈ.