8
Hneˉ Dio DSAˉJØ̱Ø̱Hˈ kya̱a̱nꜙ, haˉ ko̱hꜘ saꜙ jø̱ø̱hˈ hneˉhi̱ˉ jmeeꜙ hihꜙ kihꜗ läꜙka̱a̱ˉ jmɨˉgyʉʉꜙ,
hneˉ la̱a̱hꜗ jø̱ø̱hˈ ooꜙ gaˊ kihˈ gyʉʉhˈ jmɨˉgyʉʉꜙ.
2 Maˉheehˋ gyʉ̱ʉ̱ˉ mähꜗ haˉ läꜙ jmeeyꜗ jʉʉhˉ kyahꜗ.
Heˉ maˉløøyꜗ jmeeyꜙ läꜙja̱ˉ, jmääꜗ mahꜗ jä̱ꜗ oˉhihꜙ hiꜙ dsaˉta̱a̱hˋ tiiˊ läꜙjë̱ë̱ꜙ hi̱ˉ naˉhøøhˊ kyahˈ.
3 Waˊraˉ gaꜙjëënꜗ gyʉʉhˈ läꜙjëꜙ heˉ gaꜙjmeehˊ,
gaꜙjmäähˋ sɨhˉ hiꜙ nʉʉꜘ hi̱ˉ hë̱ë̱ˈ gyʉʉhˈ,
4 maˊja̱ˉ jmeenꜙ hʉʉˊdsëˉ, heeˉ la̱a̱ꜗ dsaˉ jmɨˉgyʉʉꜙ
mahꜗ läꜙ maˉdsooh˜ baˊ hohꜘ,
hiꜙ läꜙ maˉjmeehˉ baˊ hneˉ heˈ kiyhꜗ.
5 Gaꜙjmäähˋ hnihꜘ mähꜗ gaˊ miihˉ
läꜙko̱hꜘ gaˊ läꜙjë̱ë̱ꜙ ángel.
Gaꜙlla̱a̱yhˋ hø̱ø̱yˈ hiꜙ gaꜙjmäähˋ jø̱ø̱hˈ
mahꜗ läꜙja̱ˉ läꜙga̱hꜙ dsihꜘ.
6 Gaꜙläꜙjëꜙ heˉ chaˉ gaꜙtøøhˈ gooyˉ mahꜗ jmeeyꜗ hihꜙ kihꜗ.
7 Jmeeyꜗ hihꜙ kihꜗ borrego, kihꜗ kyaˊ,
kihꜗ läꜙjë̱ë̱ꜙ jahꜘ hi̱ˉ cha̱a̱ˉ mohꜘ.
8 Läꜙkye̱ˉ ta̱ˈjahꜘ hi̱ˉ hë̱ë̱ꜙ gyʉʉhˈ,
läꜙja̱ˉ jahꜘ hi̱ˉ tä̱ä̱hˊ nehꜙ jmɨˉñeehꜚ.
9 Hneˉ Dio DSAˉJØ̱Ø̱Hˈ kya̱a̱nꜙ, haˉ ko̱hꜘ saꜙ jø̱ø̱hˈ la̱a̱ꜗ hneˉ
hi̱ˉ jmeeꜙ hihꜙ kihꜗ gaꜙläꜙka̱a̱ˉ jmɨˉgyʉʉꜙ.