LIJEꞌE SAN PABLO AL TEꞌA LINIȽꞌEPOLAꞌ LAPIMAYE LEFOTꞌȽEPOȽTSI LIȽYAꞌ CORINTO
1
Iyaꞌ ninPablo, Jesucristo aƚjocꞌipa caꞌeƚaꞌ lanicꞌ lalapiꞌipa. Toƚiya iyaꞌ ninꞌapóstol, epaluc Jesucristo. Toƚtaꞌa lixpicꞌepa ȽanDios. 2 Iyaꞌ joucꞌa ƚaipima Sóstenes liniƚꞌelhuoꞌ, aƚnonilhuoꞌ imancꞌ lefotꞌƚepolhuoꞌ ȽanDios jiƚpe liƚyaꞌ Corinto. Imancꞌ joupa epenufpolhuoꞌ Jesucristo. Toƚiya iꞌipolhuoꞌ ixanucꞌ ȽanDios. Iƚque joupa imetsaicopolhuoꞌ iꞌhuexi. Jahuay laƚpimaye nojocꞌipá Jesucristo, ni petsi lomanaꞌ, aƚnonilaꞌ joucꞌa. Maƚque Jesucristo aƚPoujna, illancꞌ iƚniya.3 ¡CaƚꞌAilliꞌ ȽanDios joucꞌa ƚaƚPoujna Jesucristo titocꞌitsolhuoꞌ, tipacꞌeꞌetsolhuoꞌ loƚpicuejmaꞌ!
4 Itine itine caxꞌnajtsiꞌi ƚainenDios acuecaꞌ itocꞌipolhuoꞌ, ipaxnepolhuoꞌ imancꞌ lepenufpolhuoꞌ Jesucristo. 5 Caxꞌnajtsiꞌi xonca acꞌa loluyalaicopa imancꞌ lepenufpolhuoꞌ Cristo. Juaiconapa acꞌa loluyaꞌapa litaiquiꞌ. Acꞌa olapenufꞌme iƚe lataiquiꞌ, oƚcuejpá. 6 Toƚtaꞌa liꞌipolhuoꞌ lijoupa lolapenufpa laƚtaiquiꞌ laƚpalaicopa Cristo. 7 ȽanDios ipaxnepolhuoꞌ acuecaꞌ. Jahuay lapiꞌipolaꞌ lixanucꞌ joupa epiꞌipolhuoꞌ imancꞌ. Itsiya oƚꞌhuaijma ticuaiconanni ƚaƚPoujna Jesucristo. 8 Iƚque tiꞌhua titocꞌiꞌmolhuoꞌ aimolanajyacoƚtsi al cꞌa cane. Ticuaiconanni ƚaƚPoujna Jesucristo aimitacꞌuinyacolhuoꞌ cajunacꞌ. 9 Toƚtaꞌa tiꞌeꞌma ȽanDios. Iƚque tenantꞌƚi litaiquiꞌ, aimifelƚaique. Joupa ijocꞌipolhuoꞌ tonƚejmaleꞌme ƚiꞌHua, ƚaƚPoujna Jesucristo.
10 Uncꞌaipimaye, caxahueꞌelhuoꞌ toƚspicꞌeƚe tiꞌiƚaꞌ acꞌa loƚꞌejmaꞌ, tetenƚcocoƚaꞌ Jesucristo. Camilhuoꞌ: Aimoƚfuliꞌiꞌmoƚtsi cataiquiꞌ, aimolixtucꞌoꞌmoƚtsi. Toƚꞌetsoƚtsi anuli loƚpicuejmaꞌ, anuli loƚtaiquiꞌ. Aimolanajconaꞌmoƚtsi ocuena ocuena lipicuejmaꞌ. 11 Uncꞌaipimaye, lapimaye nomanaꞌ lejutꞌƚ Cloé tinescolhuoꞌ imancꞌ, ticuayi toƚfuliꞌiyoƚtsi cataiquiꞌ. 12 Joupa aicuejpa loƚꞌejmaꞌ. Hualca imancꞌ toƚcuayi: “Illancꞌ aƚcuxengaꞌ Pablo, iƚque lihuejyi”. Ocuenaye ticuayi: “Lihuejyi Apolos”. Ocuenaye ticuayi: “Lihuejyi Cefas”. (Iƚque aPedro.) Locuenaye ticuayi: “Illancꞌ lihuejyi Cristo”.
13 Itsiya quicuisꞌelhuoꞌ, camilhuoꞌ: ¿Te tipaꞌa axpelaꞌ lan Cristo? ¿Te iyaꞌ ninPablo lapaƚtsꞌingimpa lancruz? ¿Te iyaꞌ naiƚoncꞌeꞌepolhuoꞌ loƚjunacꞌ imancꞌ? ¿Te ma maƚꞌhuaiyinge iyaꞌ ninPablo epoꞌicompolhuoꞌ? 14 Caxꞌnajtsiꞌi ȽanDios iyaꞌ nij naitsi imancꞌ ƚainepoꞌipa. Ma leꞌa nepoꞌipolaꞌ Crispo y Gayo. Locuenaye imancꞌ aicainepoꞌilaꞌ iyaꞌ. 15 Toƚtaꞌa aimiꞌiya moƚnesyacu imancꞌ: “Iyaꞌ nihuequi Pablo, iƚque lapoꞌipa”. Aꞌi. Nij naitsi nonesya toƚtaꞌa.
16 Ƚinca nepoꞌipolaꞌ lapimaye nomanaꞌ lejutꞌƚ Estéfanas. Aicaixinaꞌ, aicaꞌnujuaitsi jaꞌni nepoꞌipolaꞌ ocuenaye o aꞌi. 17 Cristo lummecopa cuyaꞌatsi Lataiquiꞌ, iƚe loyaꞌapa al cꞌa lixpicꞌepa ȽanDios. Aicaluꞌicꞌ: “Tapoꞌiyaletsi”. Iyaꞌ aꞌi nincuecaꞌ comxi cataiquiꞌ. Cristo aicaƚꞌeꞌe toƚtaꞌa. Ipicꞌa tiꞌiƚaꞌ quiƚsinaꞌ te tsꞌiꞌicꞌ al cuecaj liꞌipa jiƚpe lancruz, tixingufcoƚe jiƚpe ƚilunxajmaꞌ.
18 Lan xanucꞌ tsꞌiƚtaicꞌ liƚjunacꞌ aiquiƚcueca liꞌipa jiƚpe lancruz. Ticuayi: “Amacꞌta cataiquiꞌ iƚiya”. Illancꞌ aꞌi. ȽanDios alunƚuꞌengaꞌ, toƚtaꞌa aƚsinyi acuecaꞌ cataiquiꞌ iƚiya, aƚsingufcoyi al cuecaꞌ laƚꞌepongaꞌ ȽanDios. 19 Al Paxi Liniƚingiya tuyaꞌeꞌ loꞌiya, ticua:
Timanaꞌ lan xanucꞌ nocuapá: “Acuecaꞌ laipicuejmaꞌ, iyaꞌ ƚinca aixinaꞌ”.
ȽanDios ticua: “Iyaꞌ camucꞌiꞌmolaꞌ te tsꞌiꞌicꞌ liƚpicuejmaꞌ, aiquiƚsinaꞌ”.
Joucꞌa timanaꞌ nocuapá: “Iyaꞌ ƚinca cacueca”.
ȽanDios ticua: “Iƚniya aiquiƚcueca, camucꞌiꞌmolaꞌ toƚtaꞌa”.
20 Itsiya, ¿te quiꞌipolaꞌ nocuapá: “Acuecaꞌ laƚpicuejmaꞌ”? ¿Te quiꞌipolaꞌ iƚniya nipaꞌacopá ƚiƚjuac lan tsilaj cataiquiꞌ, iƚne lomxiye cataiquiꞌ? ȽanDios joupa imujpa iƚne aiquiƚsinaꞌ. Ƚiƚtaiquí tipaꞌacoyi maƚpe liƚpicuejmaꞌ pangay camacꞌta cataiquiꞌ. 21 Jifaꞌa liꞌa ƚamatsꞌ lan xanucꞌ naihuejpá quiƚtucaꞌ liƚpicuejmaꞌ tama tocomma acuecaꞌ liƚpicuejmaꞌ iƚniya aiquilimetsaijma ȽanDios. Iƚque ƚinca acuecaꞌ lipicuejmaꞌ, toƚtaꞌa ixpicꞌepa tunƚuꞌetsolaꞌ lan xanucꞌ nepenufpá lataiquiꞌ laluyaꞌapa. Iƚe tocomma to lamacꞌta cataiquiꞌ, tinescojma liꞌipa jiƚpe lancruz.
22 Lan judío ticuayi: “Tiꞌeƚaꞌ al cuecaꞌ ȽanDios, aƚsinƚe illancꞌ, tijouƚaꞌ aƚꞌhuaiyijmꞌme”. Lan griego ticuayi: “Aƚsinƚe, aƚquimfꞌeƚe anuli tsꞌacuecaꞌ lipicuejmaꞌ, acuecaꞌ quitaiquiꞌ loyaꞌapa, tijouƚaꞌ aƚꞌhuaiyijmꞌme”. 23 Illancꞌ maꞌ aƚnescoyi Cristo, iƚque ƚummepa ȽanDios. Luyaꞌayi: “Iƚque ƚepaƚtsꞌingimpa lancruz”. Licuejpá toƚtaꞌa lan xanucꞌ judío ixtulenca. Ticuayi: “Jaꞌni ƚepaƚtsꞌingimpa lancruz aicummaicꞌ ȽanDios”. Petsi aꞌij judío, iƚne lan griego, tetetsꞌiyi laluyaꞌapa, ticuayi: “Amacꞌta cataiquiꞌ iƚiya”. 24 Petsi lojocꞌipolaꞌ ȽanDios, jaꞌni ajudío, jaꞌni agriego, iƚne ƚinca timetsaicoyi Cristo ƚummepa ȽanDios. Jiƚpe iximpá al cuecaꞌ loꞌepa ȽanDios, iximpá acuecaꞌ lipicuejmaꞌ. 25 Liximpá liꞌipa Cristo jiƚpe lancruz, lan xanucꞌ ticuayi: “ȽanDios ailopaꞌa quipicuejmaꞌ, ailopaꞌa coꞌeya”. Aꞌij ƚinca iƚtaꞌa locuapa. Xonca acuecaꞌ lipicuejmaꞌ ȽanDios, xonca acuecaꞌ loꞌepa.
26 Uncꞌaipimaye, imancꞌ lojocꞌipolhuoꞌ ȽanDios, tolimetsaicoyoƚtsi te tsꞌiꞌicꞌ moƚmanaꞌ. Imancꞌ aꞌi cuncꞌitsilaꞌ xanucꞌ. Ma leꞌa oquexiꞌ afantsi imancꞌ acuecaꞌ loƚpicuejmaꞌ. Ma leꞌa oquexiꞌ afantsi tiꞌhua loƚmane, toƚcuxeyi. Ma leꞌa oquexiꞌ afantsi loƚꞌaillí tsꞌiƚꞌhueca, acuecaꞌ quiƚꞌhuexi. 27 ȽanDios ixpicꞌepa tulijtsolaꞌ iƚniya nocuapá: “Iyaꞌ aixinaꞌ, acuecaꞌ laipicuejmaꞌ”. Toƚiya iꞌhuijfꞌepolhuoꞌ imancꞌ petsi aꞌij cuecaꞌ coƚpicuejmaꞌ, epiꞌipolhuoꞌ loƚpicuejmaꞌ tiꞌiƚaꞌ acuecaꞌ coƚsinaꞌ. Maꞌ anuli ixpicꞌepa tulijtsolaꞌ nocuapá: “Acuecaꞌ tiꞌhua laimane, acuecaꞌ laifꞌeya”. Iꞌhuijfꞌepolhuoꞌ imancꞌ petsi aimiꞌhua coƚmane, ailopaꞌa al cuecaꞌ loƚꞌeyacu. 28 Ixpicꞌepa tulijtsolaꞌ lan tsilaj xanucꞌ, iƚne limetsaiconnilaꞌ faꞌa liꞌa ƚamatsꞌ. Imancꞌ joupa tiꞌonƚcospolhuoꞌ to ninaitsi xanucꞌ, etetsꞌimpolhuoꞌ, tocomma aimoƚmanaꞌ faꞌa liꞌa ƚamatsꞌ, ȽanDios iꞌhuijfꞌepolhuoꞌ, timetsaicoꞌmolhuoꞌ. Iƚne lan tsilaj xanucꞌ aimimetsaiconyacolaꞌ toƚtaꞌa. Tejacꞌeꞌmolaꞌ.
29 Aimiꞌiya maƚnesyacu: “ȽanDios aƚsimpa nincuecaj xans, toƚiya lapenufpa”. Aꞌi. Nij naitsi nonesya toƚtaꞌa. 30 Imancꞌ coƚtucaꞌ aicoƚspicꞌe. Ma ȽanDios ixpicꞌepa tepenuftsolhuoꞌ Jesucristo. Maƚque ȽanDios ipoꞌnopa Cristo aƚmucꞌitsongaꞌ te tsꞌiꞌicꞌ al cuecaꞌ lipicuejmaꞌ ȽanDios. Jaꞌni aƚꞌhuaiyijnyi Cristo ȽanDios lapenufingaꞌ to ailopaꞌa caƚjunacꞌ. Iƚque Cristo aƚꞌeꞌepongaꞌ iꞌhuexi ȽanDios. Joupa iꞌnajtsepa laƚjunacꞌ. 31 Toƚtaꞌa tenantꞌƚi loyaꞌapa al Paxi Liniƚingiya, ticua: “Jaꞌni topalaiƚaꞌ al cꞌa liꞌipoꞌ, neꞌ, toyaꞌaƚaꞌ al cuecaꞌ liꞌepa ƚaƚPoujna”.