3 jawen yunua jancha ninkakin chibankatsi ikama Jehová anua paxai Tarsis anu kanun ika ianenwan ewapa kexa anu bai butua mae jawen kena Jope anu Jonás ka xaxu ewapa Tarsiskidi kai bechitushitan jawen paxai kanun ixun peiwen pakatan Jehová ninkama patapakaini chaijaida Tarsis anu kanun ika xaxu ewapa medan inatan ma kaya 4 jakia niwe kushipajaida Jehován yunua bekin ianenwan bechuduwanbidankin jene buspu tsaubidankin xaxu ewapa jaxka jaxka akaitun besuaya 5 jabu xaxu bunikabu datejaidakin jatun mekenika yushin tibibun jau jatu medabewanunbun yukakin januxun xaxu xankawakin mabu ichapa buaibu ianenwan medan udenkin puku keyuaibun jabiatiandi xaxu uke medan janu mabu aduti anu jikikain Jonás uxa chakayama dakaken 6 januxun xaxu bunikabun xanen ibu Jonás anu kaxun bestenwantan yuikin:

—¿Miadan, jaskai min janu jua dakamen, uxabuun? Benitan jau nuku medabewakin mekenun min mekenika yushin nuku yukaxunwen. Nukuwen nuitidumenkain, nun jasayamanunan— aka

7 jabiatiandi xaxu bunikabu yuinamei:

—Tsua chakabukidani juawen taexun nuku akimenkain. Jawen jamapai unanti xau mexte númeroya putanankanwen, ¿tsuki taxnimenkainan?— iwanan, unanti putabu Jonás chakabukidana jaki taxniai jatu unanma 8 jabun Jonás yukakin:

—¿Min jaskakidanxun niwe chakabu nuku anu bemaxumen? ¡Nuku yuiwe! ¿Min jawa daya jaya kai ikai? ¿Jania min juamen? ¿Min maedan, jadatumen? ¿Min tsua nawamen?— akabu

9 Jonásin jatu kemakin yuikin:

—En Hebreo nawaki. Nai anu jiwea Dios Jehován ianenwan ewapa inun mai jidabi dami wanitun ea tsumawani dayaxunkin en kenwanmiski. 10-11 Ea jaska wabiani jawen yunua axuanma Jehová anua en paxai ikaii— jatu wa jawen jancha ninkaibun janua ianenwan ana tunkax tunkax ichakayamaya uin datechakayamakin Jonás yukakin:

—¿Jaskai jawen yunua chibanma min nuku jaska wamai ikai? ¿Ianenwan jau mainun nun mia jaska watidumen?— akabu

12 Jonásin jatu kemakin yuikin:

—Ianenwan medan man ea pukuaya ibubis mainkiki. En chakabuwen taea matu anu niwe bidenepa bexu en unanjaidaii— jatu wa

13 jawen jancha ninkama main xaxu keti anun, iwanan, jaimanwen tuen chakayamabiabu ianenwan ana tunkax tunkax ichakayamaiwen taea jawa keti atidubuma 14 januxun jabun Jehová yuka chakayamakin yuikin:

—Jehováan, ja junin chakabuwen taexun nun jasayamanun nuku tenanyamawe. Ja juni jawa chakabu jayamaken Jehováan, jaska min akatsis ikai min akubainmiswen taexun ja juni jasai mawaken nuku kupiyamaxanwen—

15 atan ianenwan anu Jonás putaibun samama ianenwan bechuduni maianyan 16 uintan xaxu bunikabu Jehováki datejaidakin jawen daewati inankuin inantan jaskai pe jiweti Jehová yubaibun

17 jakimamadi Jonás bakawan itamamajaida Jehován dami wani yunua juxun Jonás xeashina xaba dabe inun bestitian inun meshu dabe inun bestitian kaya Jonás dakaxun