Diosun nuku mekekin idumamiskiaki, na nawati janchadan
91
Tsuada Dios dasibi kushipa binuatunjatu meke pewaxun utawa pe jiwemisbun
2 jabun Dios yuikin:
“Mianan, min ea idumamiski.
Min en jiwe ewapa kushipaki.
Min en Dios pepaki chiti ikin en mia ikunwaiin.”
3 Diosun besti bidun junea tibi inun isin atimapa tibi
nuku mekekin nemaxunmiski.
4 Takadan jawen bake mekekin nuxamis keska wakin
min nuku mekekin nuxa nun dateismaki.
Shinan betsa wama nuku putama
min nuku mekekubainmiski,
jawen pia nemati keskawenan.
5 Meshu medan kai jawada meseki dateyamakanwen.
Badidi matukidi pia bishku bishku abiaibun dateyamakanwen.
6 Meshu medan isin atimapa
matuki jikitiduki dateyamakanwen.
Badidi isin betsa tibi matuki jikitan
yamawatiduki dateyamakanwen.
7 Mia dapike min yusmaudia
1,000 mawai di itidubuki.
Ja inun, min yusiudia
10,000 jabiaskadiai di idiatibubuki.
Jakia miadan, min jawa isin betsa teneama pe jiwekunkainxanaii.
8 Jaska ja juni chakabubun
jaska bechipaimis jatun kupiti mei ikaibu
chanima ibubis min jatu uinxanaii.
9 Jehová Dios kushipa dasibi binuatun
jau mia kexebaunun inun
jau mia mekekubainun
min ma jaibuwawen taea
10 jawa chakabu mia anu beama inun
jawa isin betsa tibi min jiwe anu jikiama ixanikiki.
11 Diosun jawen nai tsumabu mia anu yunuxanikiki,
jabuan janida min kai jau mia mekekubainunbunan.
12 Maxax anu min nia min jawa juti iyamanun
jawen nai tsumabun mia mekekubainxankanikiki.
13 Inu betsa león anu inun, yuinaka mese atimapa anu inun,
dunu piananbu anu min nibiakauanai mia jabun meama ixankanikiki.
14 Diosun yuikin:
“Jau juni chakabubun meyamanunbun
ja en tsuma pepatun ea bechipaikin ea unainwen taexun
ean ja mekekin en paxawaxanaii.
15 Jatun ea kenaya en kemaxanaii.
Ea kayabis en jabes ixanaii.
Jawada bika teneai binumatan
bechipaijaidakin duawakin yudabu en kenwanmaxanaii.
16 Jau jawen taea benimawakunkainun jawen jiwea chaipa en inanxanaii.
En mekenan pepawen taea jawen piskui paxani jabu benimaxanikiki”, anikiaki.