Yudabu patapabun Dios danankanikiaki, na nawati janchadan
Davidin kanta kenenikiaki
14
Juni unainsma patapabun Dioskidi shinankin yuikin:“Dios jayamaki”, imisbuki. Jabudan, padananain atimapai jiweabuki.
¡Tsua betsan jatunmebi jawa pepa wamis jayamaki!
2 Naiudixun Jehová Diosun yudabu uinkin shinankin:
“¿Tsuabu pepakin ea en Dios ea benabaunkanimenkain?” ibiaya
3 jakia tsuan Dios benama dasibibu padananan bestimisbuki.
Janixun juni pepa bestichai tsuan bechitiduma jayamajaidaki.
4 Jabun chakabuwakubainaibudan,
jawa Dioskidi ninkabumaki.
Jabiabundi enabu jatu pikin itsa wakanikiki, misi pia keska wakinan.
Jabun Jehová Dios ikunwanbuman jatu jaska wakanikiki.
5 Jabun Dios ninkakin chibainbu Diosun jatu pe mekekubainmiski.
Jamen jabun jawen jancha chibainsbumadan,
Dioski datechakayamai saki saki ixankanikiki.
6 Jabu nuitapabiakin Dioskidi shinankin chibainbu
jatuki kaxebiaibun jakia Jehová Diosun jatu pe mekekubainmiski.
7 ¡Ja Israelbun mekenikadan,
Jerusalén anu xanen ibunun ika jau juxanunwen!
Jehová Diosun nun jawenabu nuku ana pe mekekin duawaya
Jacobun enabu, ja Israelbudan,
dasibibu mae tibi anuabu benimai shinan chankanxankanikiki.