Dios inun jawen Katuakidikiaki, na nawati janchadan
2
¿Jaskai yudabu Dios ikunwanbuma mae tibi anua jawa unanmajawen jawatima bestiwen yubakai shinan betsa betsapa wai itimaskakanimenkain?
2 Mai anua xanen ibu kushipabu xanen ibu betsabube
Dios inun jawen Katuaki sinatai jatu maemanun ika
yubakai jatuki ja ikanikiki.
3 Jui kushipawen jabun yuikin:
“¡Ja Diosun jatun nuku mekea ana en bechipaiamaki!
¡Jawen mane dispiwen nuku menexa keska wani pekenankanwen!” ikaibun
4 jaskaibu Jehová Dios naiudia xanen ibumistun ninkatan
jatukidi shinain jawa unanbumawen taea jatu usanmiski.
5 Janua jau jaki datejaidaxanunbun jatuki sinatajaidakin jatu yuikin:
6 “Ja Xanen Ibu en katuni en yunuxanai
ja medibi mae pepa mati Sión anu xanen ibuxanikiki”,
7 Jehová Diosun jaska wani ekidi shinain matu yuinun ninkakanwen:
“En jawen Katua ea yuikin:
‘Min en bakedan, natian en jiwea mia inankin en mia yunuaii.
8 Min ea ea akaya mai pakea jidabi anu dasibi jiweabu
en mia yunukin mina en mia wamaxanaii,
jatun Xanen Ibu kayabi mia wakinan.
9 Mane mestenti tsumaxun
xanen ibu kushipa dasibibu min jatu yamawaxanaii,
jaska mai kenti wanikatun jawen kenti chakabuken ibuan pusamis keska wakinan’ ”,
10 jaska wani matu yuinun ninkakanwen:
“Man mai anu xanen ibu kushipabuun,
¡na jancha nukun Xanen Ibu kayabikidi ninkakin tapinjaidakanwen!”
11 Jehová Dios duawai dayaxunidan,
jaki mesei datekin benima besti wakubainkanwen.
12 Ja inun, jawen bake kenwankin pepawakubainkanwen,
man ninkamawen taea jawaida matuki sinataya jau bai namakixun matu tenanyamanunan.
Jamen tsuabunda Diosun Katua bechipaikin mekemakubainmisbudan,
jabu besti benimakubainmisbuki.