Jatuki sinataibu Judío nawabun jatu maemanibukiaki, na janchadan
9
Uxe 12tian jawen kena Adar inun xaba 13tian xanen ibujaidatun yunuti jancha dabe jau anunbun Judío nawabuki sinataibun jatu maemakatsi ibiaibun jatu jaska wamama Judío nawabu jatuki sinataibu jatu maemanibukiaki. 2 Provincia tibi janu xanen ibujaida Asueron jatu yunumis anu jabun jatu chakabuwakatsis ikaibu jatube detenamenun ika mae tibi Judío nawabu jiwea anu ichabu yuda xukuabu tibi jatuwen datejaidakin jatu medabewakatsis ikaibuwen taea jadatuda jatu bedukubauntidubu ma mesea dakanibukiaki. 3-4 Xanen ibujaidatun jiwe anu Mardoqueo xanen ibu bexmas ikunkaini xaba tibi yununikai kushipakunkainaya provincia tibi anu jakidi chaniakeakebaunaibu xanen ibu Mardoqueon kushipawen datekin maewan yununikabu tibi inun, provincia yununikabu tibi inun, provincia yununika bexmasbu tibi inun, Asueron xanen ibu bexmasbun Judío nawabu medabewakubainaibun 5 jatuki sinataibu machatu chaipawen Judío nawabun jatuki sinataibu jatu detekubainkin jaska wakatsis ikin ma jatu yamawakin keyubaunaibun 6-10 xanen ibujaidatun maewan Susa anuxun Judíobun 500 junibu tenantan jakia jatun mabu jawa meabuma ja dikabi Judío nawabuki sinatamis Amánen juni bakebu Parsandata inun, Dalfón inun, Aspata inun, Porata inun, Adalías inun, Aridata inun, Parmasta inun, Arisai inun, Aridai inun, Vaizata jati juni bakebu jatu tenankin keyudiabu11 jabias xabatiandi jawen maewan Susa anu jati junibu tenankanxu Asuero banabimabu ninkatan 12 Ester yuikin:
—Nenu Susa anua besti 500 junibu inun Amánen 10 juni bakebudi minabu Judío nawabun tenankanxukiaki. En provincia tibi janu en yunubaunmis anuxun jatida tenankanxuki. Midimajaidamenkain. Jakia ana jawa betsa en mia axuntidu min bechipaiai ea ana yuiwe. Jawada min ea yuai en mia axunxanaii— aka
13 kemakin Esterin yuikin:
—Jaska pe min shinain jawen yunuti jancha chibankin jabias akanxu keska meshukidi Susa anuxun jabias watidubu min ea jatu yunuxuntiduki. Ja inun, dasibibun jau uinkubainunbun janu tenextidubu anu Amánen 10 juni bakebun yuda jatu duntanbainbainunbun min ea jatu amaxuntiduki— aka
14 jaska Esterin ana yuixu xanen ibujaidatun jabias jatu yunua jawen yunuti jancha bena Susa anuxun jatu banabimabaunabu Amánen 10 juni bakebu tenanshinabu jatun yuda duntanibukiaki.
15 Uxe Adartian inun 14 xabatian Susa anu jiweabu Judío nawabu ana ichaxun ana 300 junibu tenantan jakia jatun mabu jawa meabuma inibukiaki. 16-17 Ja dikabi provincia betsa tibi anu jiweabu jatun jiwea mekei jabias uxe Adartian inun 13 xabatian Judío nawabu ichaxun jatuki sinataibu maemakin 75,000 yudabu tenantan jakia jatun mabu jawa bianma uxashini xaba 14tian juindukuin benimakin piti midima pewatan pi besiaibun
18 janua Susa anu Judío nawabun xaba 13 inun xaba 14tian jatu tenanshinabuwen taea xaba 15tian juindukuin benimakin piti midima pewatan pi besidiaibun 19 jakia mae jatiubuma inun mae kenekauana jayabuma anu Judío nawabu jiweabu uxe Adartian xaba 14tian benimakin piti midima pewatan pi besikin jatun jamapai inanananbukunibukiaki.
Besi Purim año tibi jau akubainxanunbun Mardoqueon jatu yununikiaki, na janchadan
20 Jaska jatuki sinataibu Judío nawabun jatu maemashinabukidi Mardoqueon jawen kenenikabu unaki jatu kenematan janu Asueron yunubaunai anu provincia tibi inun xanen ibu benanta jiweabu inun chaima jiweabu jatu bumanikiaki, 21 año tibi uxe Adartian xaba 14 inun xaba 15tian jau besikubainxanunbun jatu yunukinan. 22 Ja xaba dabetian jatuki sinataibu Judío nawabun jatu maemakin yamawatan jabias uxe punu nuka datei kaxa chakayamabiashinabu main bexteketan jabu benimakin besi taewabainibukiaki, ja xaba dabetian inanananbukunkin ja dikabi nuitapaibu medabewakin jatu inain benimai Judío nawabu dasibi jau besikin pikubainxanunbun jawa jenetima wakinan. 23 Jatu yunukin Mardoqueon jatu kenexunima bechipaikin Judío nawabu dasibibun ja besitian jatun beya wakin ja chibanpaketi wanibukiaki.
24 Janua Judío nawabu dasibiki sinatakin Amánen jatu keyukin yamawakatsis ikin: “Jadatu uxe inun jadatu xaba pemenkain”, iwanan, mukayabubetan xau mexte númeroya jawen kena Purim putakin Judío nawabu jau tenankin keyuxanunbun jawen unanti Purimwen katuimabu 25 jakia Esterin xanen ibujaida yuia Judío nawabu jau yamawakin keyuxanunbun Amánen yunuti jancha chakabu kenexuntan jatu bumabiaima jakia jawen shinan chakabuwen Amánen chakabuwaimawen taexun janu tenexti anu Amán inun jawen juni bakebu duntankin jatu tenexnibukiaki. 26 Jaskawen taexun ja xabatian jatu maematan benimanibu shinankin janu besiti beya kenakin: “Purimki”, anibukiaki.
Mardoqueo bika tenei jiwekunkainkin jawada uinmawen taexun Mardoqueon kene uin: “Chanimaki”, ixun 27 jamebi inun jawenabu pakubainxanaibu inun Judíomabia jatun beya chibankin ibubis chani: “Nun Judío nawabuki”, ikubainaibu año tibi ja xaba dabetian anu jaska Mardoqueon jatu yusinma chibankin jawa jakimama Purim besiti beya jau akubainxanunbun Judío nawa xanen ibu dasibibun jatu yusinikiaki. 28 Judío nawabu dasibi inun jatunabu pai jiwekubainxanaibu jau jatun shinan jakimayamanunbadinunbun Judío nawabu xukuabu tibi inun, provincia tibi inun, maewan tibi anu jiwebaunabu pakubainkin jabias xaba dabetian shinain Purim besikubainmisbuki. 29 Januxun xanen ibujaidatun ain kayabi Abihailin bake Ester inun Judío nawa Mardoqueon besiti Purimkidi jancha kushipa mesewen ja dukun keneima jau chibanpakexanunbun ana ja kachu kenekin 30-32 Judío nawabu dasibi inun jatunabu pakubainaibu jabias uxe inun xaba dabe Mardoqueo inun Esterin jatu yunuima anu Purim jau besikubainxanunbun unanuma shinanmati jancha pepawen jatu yunutan jabiatiandi kene betsa anu Purim besi taei juinti nishma kaxai samakekubaini keyutan benimakin pitidubu Esterin yunuti jancha jau chibankubainxanunbun jatu yunudiabu kenexunikabun jatu kenexunabu 127 provincia janu Asueron jatu yunubaunmis anu Judío nawabu xukuabu tibi anu jatun kene jatu bumabu jaska Amán inun, Ester inun, Mardoqueon akubidanima una anu xanen ibujaidatun kenexunikabun jatun miyui kenekin dasiwanibukiaki.