ESDRAS
Jawen yunuti jancha Ciro chaninikiaki, na janchadan
(2 Cr 36.22-23)
1
Persia nawa xanen ibujaida Ciron jatu xanen ibuxuni taekainkin año bestichai yunukin taewabainkin jaska Diosun jancha yuixunika Jeremías Diosun yuimani keska jau Ciron axanun Diosun jawen shinan unanmaiwen taexun xanen ibujaida Ciron jawen yunuti jancha jau dasibibun ninkanunbun janchawen jatu yuitan kenedi jatu buma akeakekin Ciron jatu yuikin: 2 “Eadan, Persia nawa xanen ibujaida Ciro eska matuki chanikin en matu yuiai ea ninkakanwen. Nawa xukuabu tibi mai jidabi anua xanen ibubu en jatu yunukubainxanun Jehová mekenika Dios nai anu jiweatun ea katukin kushipa waimaki. Ea jaska watan Judán enabun mai pakea anu Jerusalén anu jawen kenwanti jiwe wanibu en jatu ana amaxanun Jehován ea yununiki. 3 Jaskaken man tsuabuda Jehová Diosun enabudan, jau Diosun matu medabewakubainxanunwen. Tsuada man Judán mai pakea anu jiwea junidan, Jerusalén anu butankanwen. Ja Jerusalén anudan, janu Israelin enabu mekenika Dios Jehová jiweaki. Jadixun jawen kenwanti jiwe bena jawendua waxuni budixankanwen. 4 Tsuabuda nenu benibu inun, jawen bakebu jiweyuabu inun, mae betsa tibi jiweabu jatun mae jenebaini Jerusalén anu ana chintunbain jatu medabewaibun man ja dapi jiwebaunabundi matun plata pei jexe inun, oro pei jexe inun, jawada mabu betsa betsapa inun, inabu jau jatu inankubainxanunbunwen. Ja dikabi Jerusalén anuxun mekenika Dios kenwanti jiwe jawendua waibu jatun inankuin yaushiama jau jatu inankubainxanunbunwen”, jatu waJerusalén anu Israelin enabu ana chintunbainibukiaki, na janchadan
5 Jerusalén anu buxun Jehová kenwanti jiwe jau ana benawai bununbun Diosun jatu shinan betsa wamakin benimawakubainaya kanun ika shinan chankain Judán enabu xanen ibu ichapa jawenabuya inun, Benjamínen enabu xanen ibu ichapa jawenabuyadi inun, jawenabu Diosbe janchaxunikabu inun, Levín enabu xanen ibu ichapa jawenabuyadi bunun, iwanan, dasibibu jiwebaunabun jatun mabu pewakubainaibun 6 janua jabu jatu dapi Babilonia anu nawabu jiwebaunabu jabu dayai buaibu jatu medabewakatsis ikin jawa yaushiama jatun mabu betsa betsapa inun, jatun plata pei jexe inun, jatun oro pei jexe inun, mabu pepa shadabu inun, mabu pepa kadujaida inun, jatun inabu jatu inanbidanbidanabu 7 jawen kenwanti jiwe Jerusalén anua mane oro mabu shadabu Nabucodonosorin bexun jawen yushibubu kenwanti jiwe anu aduni jau buxun jatu inanunbun jawen tsumabu Persia nawa xanen ibujaida Ciron jatu yunua ma buxuanbu 8 Jerusalén anu jau ana butanxanunbun Ciron jawen pei mekenika Mitrídates yunua chipu jatun jawen kenwanti mabu tanakin unaki kenekin keyuxun Judán enabun mai pakea anu jiweabu yunumis xanen ibu Sesbasar inanikiaki. 9 Jaska Mitrídatesin jati mabu unaki kenekin keyuni matu yuinun ninkakanwen. 30 oro mane kencha inun, 1,000 plata mane kencha inun, 29 nupe inun, 10 30 oro mane shika inun, 410 plata mane shika pepa bexmas shadabu inun, ana 1,000 jawen mabu betsa shadabu ichapajaidadan, 11 oro mane mabu inun plata mane mabu tanakin keyuabudan, 5,400 inikiaki. Yudabu Babilonia anu jatu iwenibu inun jawenabuya jatu jenebainkin jatube chintunkainkin Sesbasarin Jerusalén anu ja kenwanti mabu dasibi bunikiaki.
***************