—Ja miki sinatamis mian dukun min taewaxanun Jehován mia yubaima ikis min jaska shinain keska adiwe— iwanan, yunu yunu akabu David benitan unanxubida Saúl anu kematan june Saúlun sanpu tadi kexa mextebaini ana chixtekidi kakain juneken 5 jakia jaska waxuwen taea jawen juinti nishmai keyuxun 6 Davidin jawenabu jatu yuikin:

—En xanen ibujaida en chakabuwai Jehován ea nemaxuki. Jehován Saúl katuniwen taea ja xanen ibuki— akin

7 jawen tsumabu niti akin jau Saúl deteyamanunbun Davidin jatu nemaken kini anua Saúl taxnikaini kaya 8 ja kachu David taxnikidan jui kushipawen Saúl kenakin:

—En xanen ibuun, en xanen ibuun— aka

ninkatan nasukekauan Saúlun uianyan jaki mesei David danti iki maiki beti itan ana benixun 9 Saúl yuikin:

—Tsuanda ea mia chakabuwamanun ixun min xanen ibu mia yuiabu ¿min jatu ninkamismen? 10 Mishki kini anu ea dapi Jehován mia yunuxuki, min unanunan. Jehován ea jaska wamabiaya mia min en xanen ibudan, en mia tenankatsi ikama en ibubis shinaiin:

“Jehován min Saúl mia katuniwen taea xanen ibu min ikunkainmiski.” Jehován mia katuniwen taexun min jiweyunun en mia jenexuki— iwanan,

11 Saúlun tadi kexa mextexu sananxun uinmakin ana yuikin:

—Uinjaidawe, en xanen ibun, min sanpu tadi kexa en mia mextenxu en mekenen en tsumadan. En mia tenanti pe ixuki. Min tadi kexa besti en mia mextenxuki. En mia jaska besti waxuwen taexun en mia chakabuwakatsi ikama inun en mia achitidubia emebi chakabukin en mia jawa padanma min unandiaii. En mikidi jaskabiaken mian ea tenanun, iwanan, benakin min ea chibankubainmiski. 12 En mia jaska waxunwen taexun nuku dabe Jehován besti jau nuku unanti wanunwen. En jawa miki sinatakaun en jashi en jawa mikidi beniamajaida ikunkainxanaii, min xanen ibukenan. Jaskawen taexun jau Jehován besti mia kupixanunwen. 13 Nukun xenipabun yuikin: “Chakabu kainan, juni chakabu anua taxnimiski”, ipaunibuwen taea jaska shinankin min en xanen ibuki sinatakin en jawa miki jashi metaskama ikunkainxanaii. 14 ¿Tsua benai Israelin enabu xanen ibujaida taxnikidanxumen? ¿Min tsua chibanbidanxumen? ¿Eadan, en kaman mawa keskamenkain? ¿En masan keska daka, min ea benakin chibankin nati akaidan? 15 Jaskawen taexun nuku dabe shinanjaidakin jau Jehován nuku unanti wanunwen. En jawa chakabuma Jehován unankin jau min en xanen ibu ea nemaxunkubainunwen— akin

16 David janchai meneaya Saúlun jui kushipawen yuikin:

—¡Min ea peidawawa! min en bake Davidin ea jaska jancha waidan— iwanan, kaxa chakayamakin 17 Saúlun jantsidi yuikin:

—En mikidi chakabu shinanbiabidanken en shinan keska ekidi shinanma min pewen min ea binumaii. 18 Natian jaska min ekidi shinankin bechipaiai min ea uinmaxuki. Jehován mia anu ea yunubia min jawa ea tenanma ixuki. 19 Chanimajaida tsuan taska jaki sinataiki nukutan unanuma jiwemakin nichintidumabiaken min jawa ea meama ixuki. Min ma ea atimapa binumaxunwen taexun jau Jehován mia pepawen manakukubainxanunwen. 20 Chanima Israelin enabu min xanen ibuxanai janu en tapinjaidaii. Min jaska jatu mekekin yunuaya jawa chakabuama dasibi Israelin enabu beni kushipabainxankanikiki. Jaska natian en mikidi unanjaidaii. 21 Min xanen ibuaitianan, enabu dasibi ea jatu tenananyamaxanwen. Ja inun, dasibi en epan enabu ea jatu jakimawakin min yamawayamaxanun Jehován nuku ninkaya ebe yubakawe— aka

22 jaska wa Davidin Saúl yuba ninkabaini Saúl jawen jiwe jawenduajaidakidi chintunkainaya David inun jawen tsumabu mishki mananan juneti kushipa anu buaibun