2 jabiatiandi Jacobun bake Dan enabun maiwan pakea anu mae betsa Sorá anu juni betsa jawen kena Manoa jiwea, jawen ainin jaskatan bake bitidumajaida jiweken 3 janua Jehován nai tsuma kushipa ja ainbu anu taxnixun yuikin: “Min bake bitidumabia natian min bake nanexanaii. Ja bake min biaidan, juni bake min kainxanaii. 4 Eskaxunkunkainxanwen. Vino inun jamapai nuxuti betsa paepa ana jamamaki ayamakubainxanwen. Ja inun, Diosun matu nemani ja pitima pidiayamakubainxanwen. 5 Min bake bitan kainxanaii. Min bake kaindiama medibi Diosuna ixanikiki, Nazareodan. Jaskawen taexun ja min bake kaian jawen bu mextetimaki. Janua ewai kushipakin Filisteo nawabun man Israelin enabu matu ichakawakubainaibu jatun matu medabewakin taewaxanikiki”, atan kaken

6 jaska wawana ainbu kaxun jawen bene yuikin:

“Dios anua juni betsa en nia anu taxnitushikin ea datea en juxuki. Jehován nai tsuma kushipa daki en uinxuki. Yukakin: ‘¿Min tsuamen?’ akin en yukama ixuki. Jatundi ea jaskadi ea yukama idiaxuki. 7 Jatun ea yuikinan: ‘Juni bake bitan min kainxanaii’, ea waxuki. Jawen taexunkiaki ana vino inun jamapai nuxuti betsa paepa natian en ana atidumakiaki. Ja inun, jawada Diosun nuku nemani ja piti pitima en ana pitidumakiaki. Ja en bake kaindiama inun janu mawaxanaitianan, medibi Diosuna Nazareo ipakexanikiaki. Jaska ea yuixuki”, aka

8 ninkatan janua Manoa Jehovábe janchakin: “Jehováan, en mia yukaii, ja juni iwanxu ana nuku anu yunuwe, ja bake kainxanaikidi nuku ana yuikin jau nuku mextanmayununan”, aka

9 jaska Manoan ea aka ninkatan Jehován axunkin jawen nai tsuma kushipa ana yunukin nichinxuna bai anu ana ainbu dayai kaki ana jaki nukui taxnia uintan jawen bene Manoa janumaken 10 janua ainbu jawaida kushikain jawen bene yuikin:

—Baa, ea ninkawe. Uatian juni eki nukushinadan, ua ma ana juaki. Ebe kaxun uin kawe— aka

11 Manoa benitan jawen ainbe kai juni juaki nukutan yukakin yuikin:

—¿Min miamen, uatian en ainbe min janchashinadan?— aka

ja junin kemakin yuikin:

—Jaa, en eaki— aka

12 januxun Manoan ana yukakin:

—¿Jaska min yuishina nukun bake kainxanai jaska waxun nun yume watidumen? ¿Nun jaska wakubainxanai?— aka

13 Jehován nai tsuma kushipatun kemakin yuikin:

—Jaska dasibi min ain en ma yuishina keska ixunkin jau akubainunwen. 14 Uva bimi jene paediama inun vino inun nuxuti buspui paeai jau ataskayamaxanunwen. Ja dikabi jawada Diosun matu nemani nami betsa betsapa min baken pidiatidumaki. Jaska min ain en yunushinaki— aka

15-16 ja juni Jehován nai tsuma kushipa unanma Manoan ana yuikin:

—Mia benimawakin cabra bake nami babupa detekin tesenxun nun mia bawaxuni kai, jabianu bashikuxun piyuwe— aka

jaska wa Jehován nai tsuma kushipatun kemakin yuikin:

—En bashikutiduki. Jakia mibetan en pitidumaki. Jakia Jehová kenwankin benimawakin cabra bake tesenxun min menukin keyuxuntiduki— aka

17 januxun Manoan ana nai tsuma kushipa yukakin yuikin:

—Jaska min nuku yuishina keska nukun bake ma kaianyan jawen taexun nun mia kenwanxanun min kena besti nuku yuiwe— aka

18 nai tsuma kushipatun kemakin:

—¿En kena jaskakin man unankatsis ikai? En kenadan, juneyua pepa jawenduajaidaki. En matu yuitidumaki— aka

19 Jehová kenwanun ixun kadu bixun mishki mamaki kadu pewakin manchinxun cabra bake tesenxun misiyabi manchintan chi keti waxun nami inun xeki bedu menuabu jede ji ikai bebun Manoa inun jawen ainen uiainbun jaska tsuan atiduma jawen dateti dami Jehován jatu uinma 20 chi jede ji ikai anu jawen kuin inai puebainai anu Jehován nai tsuma kushipa ja chi jede namakis nai anu inakainai uintan datei danti iki beti itan

21-23 —Ja junidan, Jehován nai tsuma kushipaki— ixun

atimas unantan Manoan jawen ain yuikin:

—Dios nun uinxuwen taea jawa teama chanima nun mawaii— aka jakia jawen ainen kemakin yuikin:

—Nuku tenankatsi ikinan, cabra bake nun menukin keyuxuna biama ikeanxuki. Chi kuin anudi juni inakainai nuku uinmama ikeanxuki. Juni bake en jayaxanai nuku yuiama idiakeanxuki. Jaskawen taexun nuku kupikin debu wamaki— aka Manoa inun jawen ain uinmai ja Jehován nai tsuma kushipa ana jatu anu taxniama inikiaki.

24 Jaska waima jiweatian Manoan ainin bake bi tuyatan juni bake kaian kenakin: “Sansónki”, akimabu Jehován duawakin pepa wakubainaya jatun bake ewai ma yumeken 25 xaba betsatian mae betsa Sorá inun mae betsa Estaol namakis Jacobun bake Danen enabube Sansón jiweyuken januxun Jehován Yushinen Sansón achitan kushipa wakin taewaya