11
Hanushũ hawẽ mestẽti tanati tawa meshte nai tsumã ea inãshũ yuikĩ:
“Benikaini kashũ ha tanatiwẽ Deus kẽwãti Templo Jerusalém anu tanatã tapu hanu hawẽ inãkuĩti hanamisbu tanatãwẽ.
Hanushũ hatibũ hanushũ habũ Deus kẽwãkubaĩmisburi númerowẽ yuraburi tanariawe.
2 Hakia hawẽ kẽwãti Templo hemaĩtĩ Deusũ nawabu ma hatu yunuima hanushũ habũ 42 ushe Deus danãkĩ hawẽ mae pepa itxakawakubaĩshanaibu hemaĩtĩ anu tanayamawe.
3 Hanushũ ea Deusũ ẽ tsuma dabe ẽ kuxipa inãkĩ ẽ hatu yunua yurabuwẽ nuihairakĩ besha tari sawetã 1.260 shaba ẽ kakape yusĩ hãtxakubaĩshãkanikiki”,
ea washu
4 hatukiri matu yuinũ nĩkakãwẽ.
Na Deusũ hãtxa yuishunika daberã,
oliveira hi dabe inũ bĩ pehaira dabe keskabũ mai dasibi hatũ damiwani Ibu Deusũ yunua anũ ikaiburã,
hawẽ besuuri nia keskabuki.
5 Habu dabe tsuabũra hatu danãkĩ hatu txakabuwanũ ikaibu ha habu haki sinataibu hatũ hashpawẽ habuĩ shuũ akĩ txi here tashnimakĩ hatu kuakĩ tenãshãkanikiki.
6 Ha inũ,
Deusũ hawẽ kuxipa hatu yunua hawẽ hãtxa yusĩkubaĩkĩ hau ana ui iyamayunũ nai beputirubuki.
Ha inũ,
habũ hene dami wakĩ himi watirubuki.
Ha inũ,
hawatiãra hatu dasibi tenemakatsis ikĩ hamapai isĩ inũ hamapai betsa xarabu mai anu hiweabu hatu bika tenemakeaketirubuki,
Deusũ kuxipa hayabuwẽ taeshunã.
7 Hakia Deusũ hãtxa kakape hatu yunua yusĩkĩ keyuaibũ hawara atimapa pubenepa mai kini keyatapahaira anua mapekekirã hatube atxinamekĩ hatu maemakĩ tenãyã
8 Jerusalém bai kaya namaki habũ yura datãbu na haskairã,
hanushũ hatũ Shanẽ Ibu cruzki mastanibu anu ha mae ewapa Jerusalém anu yura hiweabũ Deusũ hãtxa danãkĩ nĩkaisbuma Sodoma inũ Egito anu hiwenibu keska ikubainaibu anu hatũ yura dakakẽ
9 shaba dabe inũ besti namakis mae tibi anu hiweabu inũ,
yura betsa shukuabu tibi inũ,
hãtxa betsa betsapawẽ yuiaibu inũ,
mai pakea betsa betsapa anuabũ ha mawa daka hau maiwayamanubũ hatu yunuabuma
10 Deusũ hãtxa yuikĩ habũ hatu ha akaibu ma mawabuwẽ taea mirimabu mai anu hiweabu benimai xinã txãkaĩ hatũ haibuaibube hatũ hamapai hamẽ inãnãnaĩbũ
11 hanua haskabiaibũ shaba dabe inũ besti namakis kaya hawẽ hãtxa yuishunikabu Deusũ ana hatu bestẽwã ana hiwei benirabebaunaibu dasibibũ hatu uĩ date paepaibũ
12 hanua nai anua hui kuxipawẽ Deusũ hãtxa yuishunika dabe Deusũ hatu kenakĩ:
“Neri inari bekãwẽ”,
hatu wa nĩkatã nai kuĩwẽ inaibu ha haki sinataxinabũ uĩaĩbũ
13 ha haskabaini nesebainaibũ patxa sakuaya ha mae décima parte pake betsa di akaya 7.000 yurabu debuaibũ dasibi yura betsabu habu hiweyuabu datehairai damapaikĩ Deus nai hirabi shanẽ ibu kuxipahaira ikũwãmabia kẽwaĩbu haskashanaibu nĩkakĩ ẽ uĩshuki.
14 Hanua ha segundo mesehaira atimapa keyukainaya hanua ana betsa terceiro tashniriama hawaira kaĩriaikiki.
Ha sete nai tsumabu hawẽ henea sétimo trombetayatũ hawẽ trombeta txã anikiaki, na hãtxarã
15 Ha sete nai tsumabu hawẽ heneatũ trombeta txã akai ẽ nĩkaya nai anua hui kuxipawẽ habũ kẽwãkĩ yuikĩ:
“Nukũ Shanẽ Ibu Deus inũ
hawẽ bake Messias Jesus Cristo besti
natiã mai hirabi anu ha besti shanẽ ibukĩ
hatu mekekubaĩshanikiki,
niti ikamarã”,
ikaibũ
16 ha 24 mekenikabu Deus shanẽ ibũ haki tsauti dapi hanu tsauwabũ habũ Deus kẽwaĩ hawẽ tae namã maiki dãti iki beti ishũ
17 yuikĩ:
“Yavé Deusuũ,
mĩ pehairaki.
Mai hayariama mĩ hiwenirã,
natiã betsama habias mĩ hiweaki.
Shanẽ ibu betsa yamawatã
mĩ kuxipa mĩ hayakũkaĩmiswẽ yura dasibibu mekei
mia besti mĩ ma shanẽ ibui taeaii.
Mia besti kuxipa dasibi binu keyua mĩ pepa nũ mia kẽwaiĩ.
18 Ha dukũ mai hirabi anuabũ mia abuama
mia danã paepawai miki sinatakubainimabuki.
Hakia miari natiã hatuki sinatariai
hanu hatu kupinũ ika mĩ ma tashniaki.
Hanushũ mawabu bestẽwãtã hatu unãti wakĩ
mĩ tsumabu mĩ hãtxa yuishunikabu inũ,
minabu wakĩ meribi mĩ hatu wani
habu dasibi shanẽ ibubu inũ shanẽ ibubumã
mia txibãkĩ mia kẽwãkubaĩmisbu
habũ pepawẽ mĩ hatu manakushanaii.
Hakia habũ hawara mai anushũ pepa yamawakĩ
mia txibãkubainama mia danãmisbu
habũ txakabuwẽ hatu unãti watã manakuriakĩ
habũ txakabuwẽ miãri mĩ hatu yamawai kaii”,
akaibu ẽ nĩkaya
19 hanushũ Templo nai anua bepẽshũ ha hiwe meranua Deusũ nukũ shenipabu yubani kene hi bauki arua hatu uĩmaya kana baka baka iki tĩ ikaĩkainaya patxa sakuaya barush ui ewapabu niri iki haskai keyushanai ẽ uĩshuki.