Davĩ enabu anua besti Messias tashninũbarikiaki, na hãtxarã
5
Hakia detenamenikabũ matu keshebaũshinabũIsraelĩ enabu shanẽ ibuhaira nuitapawakĩ kupihairashanaibuwẽ taeshũ
mã Jerusalém anu hiweabuũ,
hawẽ hatu nemashanũ, iwanã,
dasibi matũ detenameti mabu pewakãwẽ.
2 Haskabiaibũ mã Belém Efrata anu hiweabuũ,
na hãtxa nĩkakãwẽ.
Judá enabũ mai pakea anu mĩ mae peshepishtabiakẽ
mia anua shanẽ ibu tashnitã
Israelĩ enabu dasibi yununika kushipa ishanikiki,
bawakĩ Deusũ taewariama hiwenirã.
3 Haskabiashanaya natiã nawabũ matu itxakawakĩ
hau matu kupinũbũ
Senhor Deusũ ana matu mekeama
Israelĩ enabu Senhor Deusũ matu ma heneaki.
Hakia aĩbu tuyakẽ hawẽ huni bake kaiaĩ manaibũ
Israelĩ enabu txaihaira anu hatu iyunibu
hatũ matu txĩtũwãbirã ana matunabube matu dasiwashanikiki.
4 Ha huni kaini ewatã shanẽ ibu kaĩkĩ
hawenabu mekekatsi
hawẽ mekenika Senhor Deusũ kushipawẽ
hawenabu mekekubaĩshanikiki,
nuku unanuma hiwemakinã.
Mai hirabi kesua anushũ
Senhor Deus kẽwãkubainaibuwẽ taeshũ
5 shanẽ ibuhaira pepatũ hatu
unanuma hiwemai hukẽ
Assíria nawabũ nukũ mai pakea atxinũ ika beshũ
nukũ shanẽ ibubũ hiwe hawẽrua tibi anu ma hikiaibũ
hau hatu nemakĩ nitxĩtanũbũ 7 shanẽ ibu unanepabu
inũ 8 huni mẽtsisipabu hatunabube
nũ hatu yunushanaii.
6 Habũ Assíria nawabu hatũ shenipabu Ninrode ini anua
nupe txaipa kenuhairawẽ hatu nitxĩkubaĩkĩ
detekĩ keyushãkanikiki,
nukũ mai pakea atxi keyunũ ika beimabu
Assíria nawabu nuku hatu nemashũkinã.
Hatuki sinataibu Israelbũ hatu tenãkĩ keyushanikiaki, na hãtxarã
7 Yura shukuabu betsa betsapa mirima anu
Jacó enabu hatube hiwebaunaburã, eskashãkanikiki.
Ha haskaiburã, basnũ Senhor Deusũ yunumis inũ,
basi anu ui ikai
tsuã haskai hawẽ shinanẽ nematiruma keskai
Jacó enabu keyukubaini eskarabes tesheshãkanikiki.
8 Haskabiaibũ yuinaka shukua inu betsa leãonẽ hatu atxitiruki.
Ina txashuwã shukuaburi hatu atxiriakĩ hawa betsa heneama
tetsã akĩ tenãmisbu keskai
yurabu shukuabu betsa betsapa mirima anu
Jacó enabu hiwebaunabu habiaskariai kushipariashãkanikiki.
9 Senhor Deusuũ, haska keska wakĩ
miki sinataibu detekĩ hatu yamawakĩ keyushãwẽ.
Yushibu dami inũ detenamenikabu hawẽ henekĩ Senhor Deusũ hatu yamawashanikiaki, na hãtxarã
10 Yura dasibibu Senhor Deusũ banabimakĩ
hawẽ hãtxa mestẽwãkĩ hatu yuikĩ:
“Shaba hatiãra matũ detenameti cavalo detekĩ tenãshũ
matũ detenameti tarãbaĩti txakabuwakĩ ẽ yamawashanaii.
11 Matũ maewã txakabuwakĩ betsa wakĩ
matũ mae mishki kenebaunibu kushipa tibi
berãkĩ ẽ keyushanaii.
12 Mukayabu yamawakĩ keyutã
hawara unanikabuma habu ẽ matu heneshanaii.
13 Hawara matũ mekẽwẽ
ha kẽwãti dami ibubis mã amis
mã ana kẽwãpakeyamashanũbũ
yushibubu dami dasibi inũ mishki meribi nitxinibu
dasibi txakabuwakĩ ẽ yamawashanaii.
14 Matũ kẽwãti hi meribi meshte txibu nia inũ
hi betsa peiya dasibi betse keyushũ
matũ maewã dasibi txakabuwakĩ ẽ keyushanaii.
15 Yura shukuabu tibitũ ẽ hãtxa nĩkakĩ
txibãkatsi isbuma hatuki sinata paepakĩ
ẽ hatu kupihairashanaii.