MIQUÉIAS
Samaria inũ Jerusalém anu hiweabu Deusũ hatu kupishanikiaki, na hãtxarã
1
Miquéias Moresete anua Senhor Deus haki nukushũ namai keskawẽ hawẽ hãtxa hau hatuki txanikaũtãshanũ Samaria anuabu inũ Jerusalém anuabu Senhor Deusũ hawẽ hãtxa hatu yunukubainikiaki, eska hatu washanaikiri yuikinã, Judá enabu mai pakea anua Jotão shanẽ ibui inũ, ha katxu Acaz shanẽ ibui, inũ ana ha katxu Ezequias shanẽ ibuhairai bari itxapa ha dabe inũ bestitũ hatu yunukubainaibutianã.2 Mae tibi anu hiweabu inũ nukũ mai pakea hirabi anu hiwebaunabuũ,
na eska hãtxa matu yuinũ nĩka peirawakubaĩkãwẽ.
Senhor Jeová hanu haki nukuti Templo meribi anushũ
haska txakabuwakĩ mã kanekubaĩmis
matu txitekĩ matu yuikubaĩshanikiki.
3-4 Hawẽ hiwe anua kaĩkirani mati matipa mamaki
niakiranaya hawẽ tae paitã hutsekekainai anua
mati tibi payukui keyushanikiki,
yawa sheni bĩ txi dapi tsauã payukumis keskairã.
Napãpa pebia hene wakĩ mai tuash arabeshanikiki.
Ui itxakayamai bai matai kushibiranai keskakĩ
hawẽ kushipawẽ haska washanikiki.
5 Jacó enabũ Deusũ hãtxa txibãma danãkubainaibu inũ
Israelĩ enabu shanẽ ibubũ txakabuwakubainaibuwẽ taeshũ
hatu haska washanikiki.
Jacó enabũ Deusũ hãtxa danãkubainaiburã,
hania ikanimẽkaĩ?
Samaria maewã anushũ akanikiki.
Judá enabũ mai pakea anushunã,
hanishũ yushibu dami kẽwãmisbumẽ?
Habia Jerusalém maewã anushũ amisbuki.
6 Haskawẽ taeshũ Senhor Deusũ hatu yuikĩ:
“Samaria maewã mishki hiwe tibi inũ
hatũ kene tibi di akĩ keyutã
napaku anu hatũ mishki tibi ẽ hatu urẽmashanaii,
ha dukũ mishki buya ewapa wakĩ tsamabaunibu
bepẽmana shabakabi uĩtirubu wakinã.
Hanushũ maewã shaba washinabu anu
uva nishi banatirubu bai ẽ washanaii.
7 Hatũ yushibu mishki dami wanibu dasibi teke teke akĩ keyushũ
dasibi hatũ yushĩ hi dami meribi mapua kuakĩ keyushãkanikiki.
Hatũ kẽwãtirã, aĩbu hininipa keskawẽ taeshũ
hawẽ pei itxawamisbu
dami inũ hatũ yushĩ hi dami meribi wanibuwẽ taeshũ
betsa wakĩ ha aĩbu hininipabũ daya pei keska
ana pei betsa wakĩ dami washãkanikiki”, akimaki.
Hatuwẽ taea Miquéias huĩti nishmahaira inikiaki, na hãtxarã
8-9 Samaria anu yushibu dami kẽwaĩbu beya pae
tsuã nemakĩ hatũ txakabu hatu shusha watirubuma
Judá enabu hari hatũ mai pakea anu Jerusalém anu
hanu enabu hiweabu anuri na habũ atimapa hatu amaibu ma hikiriawẽ taea
huĩti nishmahaira ẽ kasha txakayamakũkaĩshanaii.
Haskawẽ taea nikauni bitxi taeuma inũ,
tariuma nia kamã inu keskai kashakũkauni inũ,
yuinaka peiya avestruz keumis keskai ẽ nia ketãshanaii.
10 Judá enabu Senhor Deusũ kupishanai
nawã maewã Gate anu hatu banabimayamakãwẽ,
hau matu nĩkai benimayamanũbũ
hatu uĩmai hatu bebunua kashamarã.
Hakia matũ mae Bete-Leafra anu
nui paewẽ isĩ teneai keskai
mai mishpu anu dakatã
tarame tarame ishãkãwẽ,
ibubis dake paepairã.
11 Safir anu hiweabuũ,
txaihaira matuki sinataibũ matu iyushãkanikiki,
tariuma matu dakehaira wabaĩkinã.
Zaanã anu hiweabu hawa kaĩbaini
pashama ishãkanikiki.
Bete-Ezel anu hiweabuũ, maturã,
tsuã matu merabewama habianu besti kashahairai
mã hani kama ishanaii.
12 Ha Jerusalém mae anuabu hatũ hikiti shui beputiya anu
Senhor Deusũ hatu txakabu hikimaima keska shinaĩ
Marote anu hiweabũ merabewati pepa manahairai
isĩ paepa tenehairai keskai
shau babuhaira mania uminakeakeshãkanikiki.
13 Laquis anu hiweabuũ, maturã,
Israelĩ enabu Samaria anu hiwenibu keskakĩ
Senhor Deusũ hãtxa danãkĩ yushibu dami hau kẽwanũbũ
Sião anu hiweabu mã hatu txakabuwakĩ taewaniwẽ taeshũ
pashanũ, iwanã, cavalo hawaira kaĩti
hawẽ tarãbaĩti itxapaki neshakĩ keyushãkãwẽ.
14 Moresete-Gate anu hiweabu
mã hatu ana uiãma ishanaiwẽ taeshũ
hawara pepa hatu inãkuĩtã
hatu nitxĩshãkãwẽ, hatu iyushãkanikikirã.
Ha maewã Aczibe hanu Israelĩ enabu shanẽ ibuhairabu hunei irubiaiburã,
harishũ hatu atxishãkanikiki,
hanu birũ keskawenã.
15 Eska Senhor Deusũ matu yuikiki. Nĩkakãwẽ:
“Hau matu atxinũbũ
matũ mae Maressa anu hiweabu
ẽ matuki sinataiwẽ taea
matu anu shanẽ ibu kushipa betsa ana ẽ matu yunushanaii.
Ẽ hatu haska waya uĩbaini
Israelĩ enabu anua shanẽ ibumisbu tibibũ enabu pashai
Adulão anu mai kini tãpe anu hunei
hikinũ ika bushãkanikiki.
16 Jerusalém uke merã Sião mishki kenebaunibu kushipa anu hiweabuũ,
ea nĩkakãwẽ.
Matũ bakebu mã hatu betxipaihairaiwẽ taea
matũ huĩti mã nishmahairai hatu unãmakĩ
matũ bu mashtekei mãkukãwẽ.
Matũ bakebu atxitã txaihaira anu hatu iyushũ
ana hatu txĩtuãbuma ishanaibuwẽ taea
ana matũ bu mawerẽ iki keyukãwẽ,
shetẽ bushka keskairã”, hatu wanikiaki.