Bakawã hatu anushũ Jonasĩ Senhor Deus yukanikiaki, na hãtxarã
“Senhor Deusuũ, bika tenehairakĩ ẽ mia yuka
mĩ ea kemashuki.
Ianẽwã ewapa uke merã mawa keska dakashũ mia yukakĩ:
‘Ea merabewawe!’ iki ẽ mibe hãtxai
mĩ ea nĩkashuki.
3 Ianẽwã nuahaira anu ea pukuabu
hene kushibaĩkĩ ea dabe dabe abaĩkĩ
hene buspu tsaubainai mĩ yunua
ea nũtã nũtã abaĩshinaki.
4 Mia bebũshũ ea putabu
kakĩ ẽ kanebirãshina ibubis ẽ unãshinaki.
Miki nukuti hiwe meribi ẽ ana uĩtiruma dabanẽ ẽ shinãshinaki.
5 Ma ẽ hene merã ka ea atxi keyushũ
ianẽwã nuahaira merã ea bepuaya
ianẽwã merã basi hawẽ tapũ nishi keskawẽ
ẽ bushka ea yabushinaki.
6 Ianẽwã nuahaira merã tsumabaĩ ma hari ea bitxia
ana haria ẽ kaĩtiruma dabanẽ ẽ ishiãki.
Hakia Senhor Deusuũ, miarã, mĩ ẽ Mekenika Deuski.
Ẽ mawabiapanã mĩ ea ana hiwemakĩ piskumashinaki,
bakawã merã nanetã ea mekekinã.
7 Ẽ yushĩ ea anua kaĩkainaya unãkĩ
Senhor Deusuũ, mia shinãkĩ ẽ mia yuka mĩ Templo meribi anu
mianu ẽ hãtxa tashnishinaki.
8 Tsuabũra yushibu dami kẽwãkubaĩkĩ
mia txibãkĩ henebaĩmisbuki.
9 Hakia eanã, ẽ huiwẽ benimakĩ mia kẽwãkĩ
Jerusalém anushũ inabu sheni kuakĩ ẽ mia menushũkubaĩshanaii.
Hawara ẽ mia yubaima ana hakimama mia ashũkĩ ẽ mia meneshũshanaii.
Senhor Deusuũ, hiwemakĩ miã besti hunibu mĩ piskumatiruki”, ikaya
10 Senhor Deusũ hawẽ hãtxa betxipaikĩ hau mashi anua bakawã Jonas hanãtanũ Senhor Deusũ yunua mashi kesha ka bakawã hananikiaki.