JOEL
Mibã shinĩ txakabu wakĩ yamawashanikiaki, na hãtxarã
1
Petuelĩ huni bake ẽ Joel na kaka Senhor Deusũ ea hatu yusĩmaniki.2 Anibu unanepabu inũ nukũ mai pakea anu mã dasibi hiwebaunabuũ,
na hãtxa ẽ matu yuiai nĩka peirawakãwẽ.
Na txakabu haska huai tenekĩ mã memis keskama ma hayaki.
Habias matũ epabu inũ matũ shenipabũ haska ikai uiãma ipaunibuki.
3 Haska ẽ matu yuiai natiã ikairã,
matũ bakebu dukũ hatu yuikubaĩkãwẽ.
Hanushũ habũri hatũ bakebu haska mã tenekubaini
hau matukiri yuiriakubaĩshanũbũwẽ.
Hanushũ txipu hatũ bakeri kaĩriaiburi
hau habias hatu yui heneyamanũbarinũbũwẽ.
4 Shini beshũ yunu inũ,
basi inũ, mibã sharabu pei pikĩ keyukĩ henebainaibũ
hatiri shini betsa ana bekĩ
ha teshe wabaĩshinabu keyuhairakĩ ma yamawashinabuki.
5 Mã paenawãbuũ, bestẽtã uĩkãwẽ.
Uva bimi hene ma pema pema akaibu
matu mebĩshanaibuwẽ taea
vinho anikabuũ, kasharikãwẽ.
6 Detenamenikabu kushipa mirima keska
shiniwanã, inu betsa leão bene sheta keska inũ
leão yushã makushpia keskayatũ
dasibi ẽ mai pakea hirabi ma atxi keyuabuki.
7 Nukũ uva bai nishi txakabuwakĩ keyukĩ
nukũ mibã hi figueira senu senu akĩ
hawẽ pei inũ hawẽ bitxi daxpikĩ
hawẽ mebi metash wakĩ
hushu datãbaĩshinabuki.
8 Hamẽ betsarã, beneyakatsi habe yubakaima ma mawakẽ
nui tari besha sawea bis bis iki
kashakũkaini keskai
9 ẽ kẽwãti hiwe Templo anushũ Senhor Deus kẽwãkĩ
inãkuĩti shekiwã trigo duru inũ
uva vinho ana hayamawẽ taea
nukunabu Deusbe nuku hãtxashunikabu ma kashakubaĩkanikiki.
10 Yunu bai dasibi hawa hayama shaba besti dakaki,
mai besti pes daka kashai keskarã.
Shekiwã trigo shiniwanẽ pikĩ ma keyukĩ benuabuki.
Uva nishi bana ma shanai keyuaki,
hawa betsa taska besheamarã.
Oliva hi pei dasibi ma pashĩ keyua dakariaki.
11 Mã dayakapa bai anu dayanikabuũ,
matũ uva bana inũ matũ shekiwã trigo inũ cevada bai anu
mã banamis matũ mibã dasibi
ma benui keyukẽ
mã hania ana tsekatimawẽ taea
punu nuka kashakubaĩkãwẽ.
12 Uva nishi dasibi shanai keyua
figueira mibã hi shanai hawẽ pei niri iki keyui
hawẽ bimi ma benuaki.
Bimi batapa maçã inũ, banĩ inũ,
bimi betsa bai anua hi bimiya dasibi
ma shanai keyuawẽ taea
haska keskariai yura dasibibũ hatũ benima pae
ma benukĩ keyuriabuki.
13 Matu mã nukunabu Deusbe hãtxashunikabuũ,
Senhor Deus kẽwãti hiwe Templo anu dayakĩ
shekiwã trigo duru inũ
uva vinhowẽ nukũ mekenika Deus
hawẽ txi tapu anushũ
mã ana inãkuĩtirubumaki.
Haskawẽ taea matũ tari pepa pekatã
nui tari besha sawetã
nuitxakayamai kasharikubaĩkãwẽ.
14 Anibu unanepabu inũ
nukũ mai pakea anu hiwebaunabu hatu yuikãwẽ.
Nukũ mekenika Senhor Deus kẽwãti hiwe Templo hemaĩtĩ anu itxatã
samakekĩ hanushũ merabe Senhor Deus yukashãkãwẽ.
15 Ma pemahaira huaya nũ peirakãwã!
Senhor Deusũ hanu kupishanai ma kemaikiki.
Shaba mesehairatiã nuku dasibibu unãti wakĩ
kushipa dasibi binu keyuatũ
hawẽ kupitiwẽ yamawabaũshanikiki.
16 Nukũ berubi nukũ piti dasibi nuku mebiaĩbũ
nukũ mekenika Deus kẽwãti Templo hemaĩtĩ anua
hawa benimati hayama ma keyukũkainikiki.
17 Mai sheshakĩ kerãwãbaĩshũ
ha shekiwã trigo heshe banakĩ sa abiabu
beneama mawai benui keyuaya
hanu aruti dĩtu tibi di akĩ ma keyuabuki.
18 Hamẽ ina awã hatũ basi benai maã maã ikaibũ
habiaskariai txashuwã shukuabu mawakubaĩkanikiki.
19 Senhor Deusuũ, pemakĩ hui kushipawẽ mĩ merabe ẽ mia yukaii.
Hanu tsua hiweabuma anua basi inũ
nukũ bai anua txiwẽ hi kuakĩ ma keyuabuki.
20 Ha dikabi pashku ma netsui tashkai keyukẽ
txiwẽ hatũ basi menui keyukẽ
yuinaka inabumã mia yukariakanikiki,
hau mĩ hatu merabewanunã.