Hanu Senhor Deusũ hatu ibuwamani anu Israelĩ enabu txĩtũbirãshãkanikiaki, na hãtxarã
31
10-11 “Nawa betsa betsa shukuabu tibibuũ,Senhor Deusũ hãtxa nĩkakãwẽ.
Ha inũ, ianẽwã kesha txaihairabiakẽ
hanu hiweabu hatu banabimakubaĩshãkãwẽ.
Nawa kushipahairabu anua
Jacó enabu tashnimakĩ
Senhor Deusũ hatu iwekubirãshanaiwẽ taeshũ
Israelĩ enabu txaihaira hatu nitxĩkĩ sa abianishũ
hatu ana itxawashũ Senhor Deusũ hatu mekekubaĩshanikiki,
txashuwã mekenikatũ hawẽ txashuwã mekemis keska wakinã.
12 Mati Sião anu bei benimai
Israelĩ enabu kãtakubirãshãkanikiki.
Senhor Deusũ hatu merabewa shekiwã trigo itxapa inũ,
uva vinho inũ, piti sheni itxapa inũ,
txashuwã nami itxapa inũ,
ina awa nami itxapa hayawẽ taea benimahairakubirãshãkanikiki.
Bai mibã bana uiã txa amis keska
Israelĩ enabu hatũ kushipa
hawa ana benuama ikubaĩshãkanikiki.
13 Txipashbu inũ, berunãbu inũ,
anibubu benimai besi nawakubirãshãkanikiki.
Nui kashabiaibũ hatu benimawakĩ
isĩ tenẽbiaibũ benima pae inãkĩ
nuitapabiaibũ ẽ hatu daewakubaĩshanaii.
14 Hawenabu Deusbe hãtxashunikabũ
piti pepa pikubaĩshãkanikiki.
Ẽ hatu duawaya piti hamẽ ikai
enabũ yaniwakubaĩshãkanikiki.
Ea ẽ Senhor Deusũ ẽ hãtxawẽ ẽ matu mestẽwaiĩ”, iwanã,
15 ana Senhor Deusũ yuikĩ:
“Nuihairai kashai bis bis ikaibu
ha mae Ramá anushũ nĩkashãkanikiki.
Jacó aĩ Raquelĩ enabu aĩbuaibu
hatũ bakebuwẽ taea kasha neseama
hatũ bakebu dasibi hayabumawẽ taea
hawenabũ hatu daewabiabu
nĩkama ishãkanikiki”, iwanã,
16 hanushũ Senhor Deusũ ana yuikĩ:
“Raquelĩ enabu aĩbuaibuũ,
ana hamẽ kashayamakãwẽ,
matũ beũ hene hamẽ txakawairã.
Matuki sinataibũ hatũ mai pakea anua
matũ bakebu ana txĩtũshanaiwẽ taeshũ
hatuwẽ nuihairai inũ mã hatuwẽ isĩ tenehairabiakũkainairã,
txipu matũ manakuti mã hayakũkaĩshanaii.
Haska ea ẽ Senhor Deusũ ẽ hãtxawẽ ẽ matu mestẽwaiĩ.
17 Haskashanai manakubaĩshãkãwẽ,
matũ bakebu hatũ mae anu ana txĩtũbirãshãkanikikirã.
Ea ẽ Senhor Deusũ ẽ hãtxawẽ ẽ matu mestẽwaiĩ”, itã,
Haska tashnimashanai yuba bena Senhor Deusũ Israelĩ enabukiri yuinikiaki, na hãtxarã
27 Senhor Deusũ ana hatu mestẽwãkĩ: “Uatiã Israel mai pakea anu inũ Judá mai pakea anu yurabu inũ hatũ inabu itxapa pakubaĩshãkanikiki. 28 Eã hatu uĩhairakubaĩkĩ hatunabu ẽ betseni inũ, ẽ hatu berani inũ, hatu putakĩ itxakawakĩ ẽ hatu yamawaniki. Eã hatu haska wabianishũ ẽ hatu uĩkubaĩmiski. Natiã hatu uĩriakĩ ẽ hatu merabewashanaii, benikĩ ana hatu kushipawakĩ hatũ mae ana inãkĩ hatu bana bena wakĩ ẽ akawashanaii. Ea ẽ Senhor Deusũ ẽ mestẽwaiĩ.
29 ‘Uva bimi bũkash pia keska wakĩ hatũ ibubũ txakabuwanibu hatũ sheta isĩ masheshkũkaini keskai hatũ bakebu nuitapai bika tenekubaĩmisbuki’, akĩ ana haska yuiama ishãkanikiki. 30 Hakia tsuãra uva bimi bũkash pia hatũ sheta masheshmis keskai ibubis hatũ txakabuwẽ taea mawashãkanikiki”, iwanã,
31 Senhor Deusũ ana hatu mestẽwãkĩ: “Hawatiãra Israelbu inũ Judá bababube ẽ hatube ana yubakai benashanaii. 32 Egito anua hatũ shenipabu iwekĩ ẽ hatu metsũshũ akawabirani ẽ hatube yubakani keska ẽ ana akama ishanaii. Ẽ yubakati hãtxa habũ ea txakabuwanibuki, ẽ hatũ ibu kayabibiakenã. Haskawẽ taea ẽ hatube ana yubakai ẽ benashanaii. Ea ẽ Senhor Deusũ ẽ hãtxa ẽ mestẽwaiĩ. 33 Hawatiãra Israelĩ enabube eska ana yubakai ẽ benashanaii. Ẽ yusĩti hãtxa hatũ huĩti anu mistua keska wakĩ hatũ shinã merã ẽ kenea keska washanaii. Hatũ mekenika Deus ẽ ikũkaĩshanaii. Haburã, enabu ikubaĩshãkanikiki. Ea ẽ Senhor Deusũ ẽ hãtxa ẽ mestẽwaiĩ. 34 Ẽ hatu haska waiwẽ taeshũ hatũ haibuaibu inũ hatunabu inũ yura betsabũ ma ea unaĩbuwẽ taeshũ: ‘Ikũwãkĩ Senhor Deus unãwẽ’, iwanã, hatu ana yusiãma ishãkanikiki. Ma yununika shanẽ ibubu inũ, yununika beshmasbu inũ, dasibibũ ea unaĩbuwẽ taeshũ eã hatũ txakabu ana shinãma hatu buashũtã ẽ ana hatukiri yuiama ikũkaĩshanaii. Ea ẽ Senhor Deusũ ẽ hãtxa ẽ mestẽwaiĩ”, akĩ hatu yuinikiaki.