Israelbu hatu mekekĩ piskumakatsi hatuki Senhor Deus txaninikiaki, na hãtxarã
61
Haskaya Senhor Deusũ ea katukĩ sheniwẽ ea mauka keska wakĩhawẽ Yushĩ kushipa ea hikimatã ea yunukĩ:
“Nuitapaibu hatu shinã txãkãwaĩ
kaka pepa hatuki txanitãwẽ.
Bika teneaibu hatu merabewatãwẽ.
Hatu nãta iyukĩ tsuma wabainibu keska inũ hatu bitxinibu keska
haska wakĩ ẽ hatu unanuma hiwematiru hatuki txanitãwẽ,
haska wakĩ ẽ hatu pekatirurã.
2 Ea ẽ Senhor Deus ha baritiã ẽ hatuwẽ nuikĩ
ẽ hatu merabewashanai hatuki txanitãwẽ.
Ha shabatianã, nukũ Deus ha nukuki sinatamisbu
nuku hatu kupishũshanikiki, iki hatuki txanirã.
Dasibi punu nukabu hatu merabewakĩ
ea hatu daewashũtãwẽ.
3 Sião anu bika tenei hiweaburã,
ana txi mapu hatu mapu tukumama
maiti hawẽrua inãkĩ hatu sawematãwẽ.
Nui kashatxakayamisbu hatu nese watã
benimati sheni ininipa hatu inãtãwẽ.
Tsuabura hawawẽ haskatima merabewakĩ benimawakĩ
kãtati shinã txãkãti hatu yusĩtãwẽ.
Mĩ hatu haska wa yurabũ hatu kenakĩ:
‘Ha hi kushipa tekeisma Senhor Deusũ bananishũ hawẽ kushipa hatu unãmati hiki’, akĩ hatu kenashãkanikiki.
4 Hiwe tibi di ini sheni ana benishãkanikiki,
matũ shenipabũ hiwe txakabuwanibu pewakinã,
ha maewã tibi ana nawasãtã pewatã mã hiwebaũshãkanaii.
5 Nawa betsabu matunabumã matũ txashuwã shukua inũ,
matũ bai inũ, matũ uva bai
habũ matu dayashũkĩ mekeshũshãkanikiki.”
6 Habũ matu kenakinã: “Habu Senhor Deusũ tsumaburã,
hawenabu Deusbe hãtxashunikabuki”, matu washãkanikiki.
Nawabu txaikeshũ hatũ hamapai ibubis matu beshuãbu
mã hawẽ benimai shinã txãkãshanaii,
hatũ tari hawẽrua inũ hatũ dauti pepa sawea mapuarã.
7 Mã enabu habu matuki sinatakĩ itxakawakĩ matu dakewakubainibu
nuitapakĩ bika mirima mã mekubainima keska
natiã ha binumakĩ matũ mae anushũ
mabu karu mirima inũ benimai shinã txãkaĩ henetima bi
mã hawẽ hiwekũkaĩshanaii.
8 Deusũ hatu yuikĩ:
“Yunuti kushipa pepa ea Senhor Deusũ ẽ betxipaimiski.
Hakia habu yumetsumisbu inũ yura betsa tenãmisbu
danaĩ ẽ hatuki sinatamiski.
Ẽ shinã haskawẽ taea enabu habu duawakĩ heneama
pewẽ hatu manakukatsi iki ẽ hatube yubakakĩ
mestẽwãkĩ ẽ akibi ashanaii.
9 Matũ bababu pakubaini pe hiweabũ
nawa shukua tibibũ hatukiri pe shinãkĩ
kẽwãkĩ yuikubaĩshãkanikiki.
Senhor Deusũ hawenabu pewẽ hatu duawakubainai
dasibibũ hatu uĩkĩ unãshãkanikiki”, ikaya
10 Haskakiri Senhor Deus yubakakũkainaiwẽ taea
ea ẽ shinã txãkaiĩ.
Hawẽ meketi haya ea inãkĩ piskumatã
hawẽ yunuti kushipawẽ ea mekekĩ binumakĩ ea duawakubainikiki,
huni aĩyãkatsi iki hawẽruakĩ maiti pepa sawemis keskai inũ
aĩbu beneyanũ, iwanã, hawẽruakĩ
dauti betsa betsapawẽ daumis keskairã.
Haskawẽ taea ẽ Deuswẽ ẽ benima txakayamaii.
11 Haska mibã mai anua hukuĩ peshei taemis keska inũ
bai watã hawara heshe betsa banashinabu
peshetã hukuĩ ewamiski.
Haska keskari wakĩ Senhor Deusũ hawẽ kushipawẽ
hawenabu hatu binumakĩ
dasibi nawa shukuabu hatu kãtamakĩ kẽwãmashanikiki.