50
Senhor Deusũ hatu yuikubaĩkĩ:“Huni betsa hawẽ hawara biãkĩ
ẽ diriamawẽ taeshũ
pakakĩ hau matu hawẽ tsuma wakĩ
escravo wanũ ẽ matu yunuama iniki.
Ha inũ, huni betsã hawẽ aĩ ana betxipaiama
danãkĩ henemis keska wakĩ
Israel matũ ibubu ẽ hawa hatu danãkĩ nitxiãmabia
hakia ibubis txakabukĩ
ẽ hãtxa nĩkaisbumawẽ taeshũ
matũ ibubu Israelbu danãkĩ
ẽ hatu yununiki,
hau nawabũ hatu tsuma wayunũbunã.
2 Ana matu merabewanũ ika hushũ
ẽ hawa huni betsa betxiama iniki.
Ẽ matu kenabia tsuã taska mã ea kemama inibuki.
Ẽ matu haska wabia haskakĩ mã ea benakĩ shinaĩsmamẽ?
Eanã, matu merabewakĩ ẽ matu piskumatiruma
mã ekiri shinaĩ imismẽ?
Habũ matu tsuma wabu anua ẽ matu tashnimatiruma dabanẽ
mã shinaĩ imismẽ?
Earã, ẽ kushipaki. Ianẽwã yunukĩ:
‘Hawaira hene netsui metuwe’, ẽ wa itiru inũ
heneri betsa wakĩ metu wakĩ ẽ tsusĩ wãyã
baka ũpash manui mawai pisimayatiruki, hene hayamakenã.
Ha hene netsua anuri mairi hanu tsua hiweabuma ẽ watiruki.
3 Nai kashai keska wakĩ meshu wakĩ ẽ
bepua tsuara mawashĩkẽ hatu manui punu nukamisbu keska ẽ wamiski.”
Senhor Deusũ tsuma Deuski txiti itã hawa dateama itxakawabiabu tenekubaĩshanikiaki, na hãtxarã
4 Habu nuitapai punu nukabu ea Isaíasĩ ẽ hatu merabewakĩ benimawashanũ
Senhor Deusũ ea unanepa watã ea yununiki.
Ẽ shabakabi pe nĩkakubainũ merabewakĩ
shaba tibi Deusũ ea pe yusĩkubaĩmiski.
5 Senhor Deusũ tapĩmakĩ ea unanepa waya
hawa danaĩ haki petxi
ẽ hawẽ huĩti kushismaki.
6 Hau ea kakush kakush anũbũ
ẽ petxi ẽ hatu inãkĩ yunumiski.
Ẽ keshni ea tseka tseka akaibu
ẽ hawa hatu nemaismaki.
Habũ ea itxakawakĩ eki kemu mitxuaibũ
ẽ besu hunei ẽ hawa tinĩsmaki.
7 Senhor Jeová ea merabewamiswẽ taea
tsuabũra ea itxakawakĩ ea isĩ tenemaya
datei txĩtuãma tenea ẽ mishki kushipa keskaki.
Ẽ shanẽ ibu kushipatũ ea mekeaya
habiatiãri eki kashebiaibũ hawa datei
ẽ hawa dakeama ishanaii.
8 Hatũ ea mekemistũ ea keshekẽ
tsuara eki sinatai huayarã,
hatũ unãti wakĩ pewanikatũ
hau nuku pewanũ hanu bunãkãwẽ.
Tsuãra ẽ txakabukiri ea txitekatsis ikirã,
hushũ hau ea yui benũbũwẽ.
9 Senhor Jeová kushipatũ ea merabewamiswẽ taeshũ
tsuã ea txitetã ea hawa itxakawatirubumaki.
Dasibi habu eki sinatamisburã, yamashãkanikiki,
ha nakashã tari pikĩ keyumis keskairã.