Pérsia shanẽ ibuhaira Ciro Senhor Deus hau dayashunũ yununikaki, na hãtxarã
45
Senhor Deusũ Ciro katukĩ shanẽ ibuhaira watãhawẽ mekẽ yusiuri tsumatã
hau mai pakea betsa betsapa maemakĩ hawena watã
shanẽ ibu betsa betsapabũ detenameti yamawakĩ
hau mebĩshanũ yununikiaki.
Hanushũ mae tibitũ beputi Ciro Senhor Deusũ bepẽshũtã
hau tsuã ana bepuyamanũbũ nemashũkubainikiaki.
Ha haska wanishũ natiã Senhor Deusũ Ciro yuikĩ:
2 “Mĩ kai bebũ mia bebũ kakĩ
mati tibi ẽ mia pureshũkubaĩshanaii.
Mane bronze beputi tibi ẽ mia taskeshũkubaĩshanaii.
Mane ferro shui mestẽwãti tibi
ẽ mia teke teke ashũshanaii.
3 Ea ẽ Israelbũ Senhor Deusũ
mĩ kenawẽ ẽ mia kenai mĩ ea unãshanũ
mabu karuhaira inũ pei hune aru pehaira wanibu
mia betximatã inãkĩ ẽ mia haya wakubaĩshanaii.
4 Ha ẽ tsuma Jacó betxipaikĩ ẽ katuni, Israelbu enaburã,
habuwẽ taeshũ mĩ kena kayabiwẽ ẽ mia kenaniki.
Mĩ shanẽ ibu keyutima mia shinãpaketi haya wakĩ ẽ mia kaĩmaniki,
hawa mĩ ea unãmabiakenã.
5 Earã, ẽ habia Senhor Deuski, betsa hayamarã.
Ea keska betsa Deus kayabi hayamahairaki.
Mai pakea tibibe mĩ hatube detenameshanũ
ẽ mia kushipa wakĩ pewaniki, mĩ ea unãmabiakenã,
6 bari huaikiria inũ bari hikiaikirishũ
hau dasibibũ tsua ea keska hayama
hau unãshanũbunã.
Earã, ẽ habia Senhor Deuski, betsa hayamarã.
7 Bari txashati inũ, meshu inũ, benimai hiweti inũ,
hamapaiwẽ bika teneti sharabu pawakĩ ẽ dami waniki.
Na haska tibi dami wakinã,
ea Senhor Deusũ anishũ ẽ akubaĩmiski”, iwanã,
Kushipa binu keyua hiwea Senhor Deuskiaki, na hãtxarã
8 Senhor Deusũ ana yuikĩ:
“Hamapai tibi ẽ maemati kushipawenã,
nai anushũ eã ẽ yunumiski,
eska keska tibirã,
nai anu basnũ kurumayai inũ nai kuĩ anua ui haya wakinã.
Habu tibirã, maĩ tsu amis keska wakĩ
meketi pepa inũ yunuti pepa
ẽ kaĩmamiski, yunu huatã bimimis keska wakinã.
9 Mai mabu tibi haskas hatiubus hatũ ashiãbe ha itirubumaki.
Ha inũ, mapupã ha dayai yuikĩ: “Mĩ ea haska wai?” ikasmai
hatũ ha mabu washuri yuikĩ:
‘Mianã, daya mĩ unãmaki’,
akĩ yuinametirubumaki.
10 Ha inũ, tsuãra huni bake wani
hawẽ ibubube ha itirumahairaki,
mai anu hiwemaniwẽ taearã.
11 Israelĩ Senhor Deus meribi hatũ Israel hawena hatu wanitũ tsuara yuikĩ:
“Haska ẽ bakebu ẽ hatu wamis
mã ea unãti watirumẽ?
Haska hamapai tibi ẽ amis ea merabewakĩ shinã betsa mã ea yusĩtirumẽ?
12 Eã ẽ aniki, mai inũ yurabu dami wakinã.
Ẽ mekẽwẽ nai hirabi hatishũ kesũtã
hanushũ ẽ yunua dasibi habu txashatirubu tashni keyunibuki.
13 Ha dikabi eãri Ciro ẽ tashnimaniki,
hau hatu maemanunã.
Hawẽ kati bai dasibi ẽ hawama washũshanaii.
Hanushũ hatũ ẽ maewã ea benishũshanikiki.
Haska watã enabu habũ hatu iyunibu hatu mebikinãkĩ
hatu henematã hatu ea akĩ pakamama manakuti yukama ishanikiki”, iki
Senhor Deus dasibi binua hãtxashuki.
14 Senhor Deusũ Israelbu yuikĩ:
“Egito anua dayakapabu inũ,
Etiópia anua mabu inananãmisbu inũ,
Sabá anua ha yura keyatapabu habũ matu kẽwaĩ
matũ tsumai escravo ishãkanikiki.
Mane dispi txiwetameyawẽ neshea matu txipi mapua
matu bebũ dãti itã kẽwãkĩ matu yuikĩ:
‘Txanima kayabi matuna besti Deus kayabi matu anuki.
Ha bestihairaki, Deus betsa hayamarã’, ikaibũ”,
15 Isaíasĩ ana hatu yuikĩ:
Haskabiaibũ miarã, tsuã mia uĩtiruma
mĩ Israel mekekĩ piskumanika Deuski.
16 Tsuabũra dami yushĩ wamisburã,
haburã, dakeshãkanikiki.
Betsabu hatuki kashetã usãshãkanikiki.
17 Hakia Israelburã, Senhor Deusũ hatu mekekĩ
hatu piskumakĩ heneama ishanikiki.
Haburã, hawa babui dake taskama ishãkanikiki.
18 Nai dami wanika Senhor Deusũnã,
mai dami wakĩ tashnimaniki.
Haska watã mestẽwaniki.
Hatũ mai dami watanã,
hau shaka bestiyamanũ yurabu dami wariatã hiwemakĩ yuikĩ:
“Ea besti ẽ Senhor Deuski, betsa hayamarã.
19 Ea hãtxairã, hune ẽ isma inũ
hanira mai anu hunea meshu anua ẽ ismariki.
Jacó enabu eã hatu yuikĩ:
‘Hanira tsua niama anu ea benakãwẽ’,
ẽ hatu aismaki.
Ea ẽ Senhor Deus txanima ẽ hãtxamisrã, kaneama ikũ kayabi ẽ yuiaii”, iwanã,
Dami yushĩ kẽwãmisbu Senhor Deusũ hatu txitenikiaki, na hãtxarã
20 Senhor Deusũ ana yuikĩ:
“Matu habu teshewayamabu hanira mã hiwebaunabuũ,
dasibi ea anu itxai bekãwẽ.
Hatira hawa unãbumã hatũ hi dami yushĩ iatã shuku dakabaini
habe hãtxakĩ hawa hatu meketã piskumatirumabia
hamẽ yukai hãtxawãmisbuki.
21 Mã haratura dami yushĩbe hãtxakĩ yukakatsi ikairã,
haska matu ashũtirumẽkaĩ,
betsa tibi meakeakei
habe hãtxakĩ unãti wakĩ unãkãwẽ.
Na haska tibi inũbariairã, bebũkirihairarã, tsuã yui txaninimẽ?
Ea besti ẽ ikama inimẽ, Senhor Deusrã?
Deus kayabi betsa ea keska hayamaki.
Deus kushipahaira maemakĩ mekekĩ binumanika tsua ea keska hayamaki.
22 Mai kesua anu hiwebaunabuũ, ea anu bekãwẽ,
matu mekekĩ ẽ matu piskumashanairã.
Earã, ẽ Deuski, ea keska betsa hayamarã.
23 Emebi hãtxai yubakakĩ
hawẽ maemakĩ binumati ẽ yuimisrã,
ha ẽ yubakani hãtxarã, ẽ meneshanaii.
Eskashãkanikiki: Dasibibũ ea kẽwaĩ ea bebũ dãti itã,
‘Mia besti mĩ Deuski’, ikĩ ea datã akĩ
24 ea yuikĩ: ‘Senhor Deus besti kushipa maemanika paepaki’, ikaibũ
hakia hatiri habũ ea danãmisbu hatuki kashekĩ usãshãkanikiki.
25 Ewẽ taea dasibi Israelĩ enabu hamapai txakabu binu keyutã
ewẽ keĩ benimashãkanikiki”, ikaya,