Shanẽ ibuhaira benã yunuti kushipa pepawẽ hatu mekeshanikiaki, na hãtxarã
32
Uatiã shanẽ ibuhaira bena shanẽ ibuirã,yunua pepawẽ yunushanikiki.
Hawẽ shanẽ ibu beshmasbu shanẽ ibushũkinã,
yunuti kushipa pepawẽri ishãkanikiki.
2 Habu tibirã, eskabu ishãkanikiki.
Niwe beaya hanu irutirubu keska inũ,
ui niweya beaya hanu pashatirubu keska inũ,
mai tsusĩ anu mibãkĩ bai tibi waimabu anu
hanu hene habai keska inũ,
hanu hawa hayama anu barĩ kuahairai anu
mishkipãwã dakashũ mai utawamis keskabu ishãkanikiki.
3 Habũ berurã, pehaira hatu uinũ ika beru hã ikabu inũ
nĩka pewanũ ika paweshpai keyutã hatu nĩkakatsis ishãkanikiki.
4 Hatũ akarã, shinãtãs akĩ kaneama
hakia bebũkiri shinã pewatã akubaĩshãkanikiki.
Habũ hamapai hatu yuikinã,
shabakabihaira hatu unãmashãkanikiki.
5 Ha shanẽ ibubu shanẽ ibuaibũ yurabu atimapai daya peisma
hatu kẽwãbiamisbu ana hatukiri pe hãtxama ishãkanikiki.
Hamẽ uĩbaĩ kemutapa tsaubiamiskẽ ana yurabũ duawakĩ:
“Mĩ nukũ shanẽ ibu kushipaki”, akĩ ana yuiama ishãkanikiki.
6 Yurabu atimapai daya peisma hawẽ beyawẽ taea
haska hãtxamis heneama inũ,
haska txakabu shinaĩ keska yubakatã heneama akubaĩmisbuki.
Txakabu besti kaĩmatã hiwenũ ika hamapai atimapati benakubaini
Senhor Deuskiri hãtxa txakabu yui txanitxakamisbuki.
Habunã, bunibiranaibu hawa hatu inãma inũ
ũpash manubiranaibu hatu amakĩ pewatã hatu nitxĩsbumaki,
hatu nuitapawakinã.
7 Ha yurabu atimapai daya peisbuma matxupakĩ
hatu parã bestikĩ hawarawẽ kemuti watã hatu hawẽ atximisbuki.
Nuitapaibu hatu parã paepa watã ana hatu txakabuwamisbuki.
Hawa hayabuma: “Yunuti kushipawẽ ea merabewakĩ ashũwẽ”, ibiaibũ
hatu parã bestimisbuki.
8 Hamẽ ha huni shinã pepa duapaburã,
habu hãtxai yubakatã pe besti washãkanikiki.
Haska yubakashina hawa betsa wama mestẽwãtã apakeshãkanikiki.
Aĩbuaibu nuimakiri yusiãkiaki, na hãtxarã
9 Matu mã aĩbuaibu nuibumaã,
matu yuinũ ea nĩkakãwẽ.
Ibubis mã kẽmis aĩbuaibuũ,
ẽ hãtxa nĩkakãwẽ.
10 Natiã mã aĩbu dayakapa matuki txiti ikubaĩmisburã,
ano bestitxai kai binuaya
ana mibã tibi hawaira hushiãma inũ uva bimi mã tsekatiruma
hawẽ taea dakei mã dateshãkanaii.
11 Mã aĩbuaibu nuima hiweabuũ, datei saki saki ikãwẽ.
Matuki txiti ishũ mã aĩbuaibu matu kẽwãmisbuũ,
ana haska shinãma date paepakĩ
matũ batxi hawẽrua pekatã
hawẽ nui bika tenei unãmati batxi besha sawerikãwẽ.
12 Ha mibã bai pepa anua inũ uva bai kemutapa anua
matũ piti keyushanaiwẽ taeshũ
haska mã hatuwẽ nuiaiwẽ taea
shutirĩ shutirĩ ikĩ hatu uĩmakãwẽ.
13 Ẽ mai pakea anua hi mushaya inũ nishi mushaya beneshanikiki,
ha mae anua matũ hiwe tibi anua haibunãtã nawai
mã beyusmisbu anurã.
14 Ha inũ, shanẽ ibuhairatũ hiwe hawẽrua heneshãkanikiki.
Ha maewã merã yurã kaiã hiwebiamisbu hanu ana tsua hiweama ishanikiki.
Hatũ iruti mishkiwẽ kenebaũkĩ kushipa wanibu henekibi heneshãkanikiki.
Haska wabainibu anu jumento unãhaira hari benimai hiwea anu
habianuri ina awã basi pishãkanikiki.
15 Senhor Deus dasibi damiwanikatũ hawẽ kushipa ana nuku anu yunua huaya
hanu hawa mibã hayamabiakẽ betsa maewakĩ
mai anu dayati pepa wakĩ
hanu mibã pepa benemis anu
ana bimihairati hayashanikiki.
16 Hawẽ hãtxa txanima inũ hawẽ yunuti kushipa pepa
dasibi mai pakea hiwebaunabu anu hayashãkanikiki.
17 Hawẽ yunuti kushipa pepa beneirã,
hawa hawẽ datetima unanuma hiweti ipakeshanikiki.
18 Enabu hiweirã, mae pes daka anu hiweshãkanikiki,
hawa dateamarã, hanu hiweabu tsuã hatu metirubuma anurã.
19 Haska inũ, barush ui niri ikĩ ni shukua yamawaya
ha maewã babubiaya
20 ui mirima ikĩ matũ yunu txa aka beneaya
hanua matũ jumento inũ matũ ina awã piti basi benemakĩ pewaya
matuburã, benimai mã hiwekũkaĩshanaii.