Hawenabu hawẽ hatu unãtirubukiri Isaíasĩ hawẽ bake kenanikiaki, na hãtxarã
8
Senhor Deusũ ea yuikĩ: “Hi besha ture sapa bitã haki mĩ hãtxa kuĩwẽ eska kenewe: ‘Maer-Salal-Hás-Baz’, wakinã. 2 Haska mĩ wai habũ uĩtã txanitirubu huni dabe txanitxakaisma Deusbe hawenabu hãtxashunika Urias inũ betsa Jeberequiasĩ huni bake Zacarias hau unanũ hatu bebũshũ kenewe”, ea wa3 txipu ẽ aĩ Deusũ hãtxa yuishunikabe ẽ habe txutanameima ha tuyatã huni bake kainiki. Hanushũ Senhor Deusũ ea yuikĩ: “Mĩ bake kenakinã, ‘Maer-Salal-Hás-Baz’, washãwẽ, nukũ hãtxawẽ yuiarã, ‘Hawairakirã atxishũ yamawaki’, akinã. 4 Mĩ bake kaĩma hawa hãtxa pesei kenãnamei: ‘Papaii’, iki ‘Mamaiĩ’, iriamakẽ Damasco inũ Samaria anu hiweabu Assíria nawabũ hatu atxishũ yamawatã hatũ mabu hawẽrua hatũ shanẽ ibũ hiwe ewapa anu bushãkanikiki”, ea watã 5 Deusũ ana ea yuikĩ:
6 “Assíria shanẽ ibu Rezim inũ Remaliasĩ bakẽ hatu datekĩ
atxikatsis ikaibuwẽ taea Judá enabu hatuki dateaibũ
Siloé hene pes daka unãshubira habamis
Judá enabũ itxakawakanikiki.
7 Haskawẽ taeshũ Hene Eufrates Senhor Deusũ mata wakĩ
hatu atximashanikiki.
Haska yuiarã, Assíria shanẽ ibũ hawẽ kushipawẽ hatu atxi keyushanikiki.
Hawẽ pashku teshesha tibiwẽ hene hikibaĩkĩ
dasibi kẽku mataismabia atxikĩ keyukĩ
8 Judá mai pakea hari binubaĩ
hari kesuismabia kẽku tsakashanikiki.
Isa hawẽ pei pexa dakamis keskakĩ,
Emanuelĩ, mai hirabi mĩ atxi keyushanaii.
9 Nawa shukua tibibuũ, matunabube itxatã hatu deteshãkãwẽ.
Mai pakea txai tibi anu hiweabuũ, mã eskashanai nĩkakãwẽ.
Detenamenũ ishũ matũ pia mã bibiabauna
txanima mã datehairashanaii.
10 Mã nukukiri yubakabia mã akama ishanaii.
Haska betxipaikĩ mã katushũ yuibia mã nuku akama iriashanaii,
Deus nukube nashui itã nuku mekeawẽ taearã.”
Senhor Deuski besti mesei haki datetikiaki, na hãtxarã
11 Senhor Deusũ ea tsuma mestẽwãtã ha huni txakabubũ shinã ẽ hatu txibãyamanũ bebũkiri ea unãmakĩ nemakĩ ea yuikĩ: 12 “Habu matukiri yubakaibũ hatubebis yubakayamakãwẽ. Habũ matu datekĩ mesewabiaibũ hatuwẽ dateyamakãwẽ. 13 Senhor Deusũ dasibi binua meribi pepa hatũ nema keyutiru bestiki datekãwẽ. Ha bebunua besti mã haki datetiruki. 14 Earã, matuwẽ taea ẽ eskaki. Ẽ matũ itxati hiwe meribi keskaki. Hakia Israelĩ bakebũ shanẽ ibu dabe ẽ mishki daka haki huti itirubu keskaki. Eki huti ika keskatã ea danaĩ ha shanẽ ibu dabe hatunabube di ishãkanikiki. Jerusalém merã hiweaburã, ẽ birũ keska anu hikitã haburi harakiri kaĩtima nuitapashãkanikiki. 15 Itxapahaira eki huti ishãkanikiki. Eki huti itã di iki mawashãkanikiki. Haburã, birũ merã hikiaibu hatu bepuabu harakiri kaĩtirubuma ishãkanikiki”, itã,
Hawẽ tsumabu bebũkiri haskashanaibu Isaías hatuki txaninikiaki, na hãtxarã
16 ana Senhor Deusũ ea yuikĩ:
“Na ẽ hãtxarã, arukĩ pewawe.
Haska ẽ mia yusĩkĩ unãmashurã,
mestẽwãtã miki txiti ikabu hatu yusĩkubaĩwẽ”, ea waya
17 Senhor Deusũ hawẽ hãtxa Jacó enabukiri hunebiaya
eanã, ikũwaĩ ẽ haki txiti ikaii.
18 Senhor Deusũ hawẽ bake betsabu ea anu inãkĩ yunua habubetã
Israelĩ enabu Senhor Deusũ haska betxipaiai
hawẽ kushipa unãmakĩ shabakabi wati nũ ikũkainaii.
Mati keyatapa Sião anu hiweshũ
Senhor Deus dasibi kushipa binuatũ nuku yunua
nũ akai nũ hawena nuku uĩshãkanikiki.
19 Hakia huni betsabũ matu yuikĩ:
“Mawabũ yushĩbe hãtxamisbu yukakãwẽ.
Ha huni mukayabu hatũ yushĩbe hãtxai shei ikawẽ
tsuã nĩkatirumawẽ hãtxamisbuki.
Yurabu hatũ yushibube hãtxakinã,
mawabũ unanepa hãtxa yukatimamẽ, hiweabunã,
20 haskashanaibu tapĩkinã?
Haska hakiri hãtxakĩ yukabiamisburã,
habũ yuiairã, patapa unaĩsmapabuki!
21 Ha huni shinã pewama buni paepai
buni bestiwẽ nui sinatai mapubaũshãkanikiki.
Haskakĩ hatũ shanẽ ibuhaira inũ hatũ yushibu yupui
hatuki hãtxa txakabushãkanikiki.
Manaũri nai teskãshũ uĩtã
22 hanushũ txipu maĩ tinĩtã
hawa pepaki nukuama nuitapahairai inũ
meshu merã bika besti tenei
dasibi meshũ besti atxia uĩshãkanikiki.
Habũ hatu atxia harakiri shinãbaini pashatirubuma ishãkanikiki.