Uva bai miyuirã, Judá enabu keskakiaki, na hãtxarã
5
Ẽ haibu pepahaira ẽ hakiri kãtai ea nĩkakãwẽ,hawẽ uva bai betxipaimiskiri ẽ kãtashunairã.
Ẽ haiburã, uva bai hayaki.
Hawẽ bai anurã, mai pepahaira hayaki.
2 Pukĩbaĩkĩ mai pewakĩ mishki putakĩ pewatã
hawẽ uva tatxa pepa bitã banaimaki.
Hanushũ hawẽ bai nemaki hanushũ uĩbaũti hiwe pishta keyatapa waimaki.
Ha inũ, hanushũ tsinikĩ vinho wãti pewaimaki.
Ẽ haibũ haska watã hawẽ uva banaima
uva batapa manabiaya
hakia hawẽ uva besheai anu uva bimi pe ikama
bimi bũkash besti hayashinaki.
3 Ha maewã Jerusalém anu mã Judá enabu hiweabuũ,
natiã ẽ matu yukai ea yuikãwẽ:
Ha uva bimi bũkashrã,
haratu tsua txakabumẽkainã, ẽ uva baimẽkaĩ, ẽ eamẽkainã.
4 Ha ẽ uva bai anurã, ana hawa husitibiakẽ
ẽ haska wama ikimamẽ?
Ẽ hawa hakimatã akama ikimamẽ?
Uva batapa ikai ẽ manabiaya
haskai uva haska ikama bũkash ishiãmẽ?
5 Eskaki. Matu yuinũ ea nĩkakãwẽ,
ẽ uva bai haska wakatsi hakiri ẽ shinainã.
Ẽ hawẽ hatu nemakĩ keneima daka pekati, hau txakabuwanũbunã.
Ẽ mishki kenebaunima daka ẽ berãti, hau haki pai pai inũbunã.
6 Haska watã haki petxikaĩkĩ ẽ henebaĩkĩ
ana pewakĩ ẽ ana hawa dameshteama inũ ẽ ana basi meshatirumaki.
Ẽ haska wabaina hanu ni shushu benei inũ
hau mae musha benetxakayamashanũwẽ.
Ha inũ, hau ana hamamaki ui iyamanũ
nai kuĩ ẽ nemashanaii.
7 Na uva baikiri miyuirã,
Senhor Deus dasibi kushipahairatũ habu betxipaikĩ
uva bai banayama keskarã,
Israel hiweabu hatũ mai pakea inũ
Judá enabũ mai pakeaki.
Hanushũ hawẽ yunuti inũ hawẽ nematiki mesekĩ hau txibãkubaĩshanũbũ
Senhor Deusũ hatu manabiaya
habu anurã, sinatai inũ detenameaibu besti hayaki.
Ha inũ, hawẽ yunuti kushipa pepa katuaibu hatu manabia
haska hiweama hatu nuitapawaibu
isĩ tenei biski ikaibu ẽ nĩka bestikubainaii.