Yurabu Deusũ hatu unanuma hiwemashanikiaki, na hãtxarã
2
Na haska ikũkaĩshanai Amozĩ bake Isaías nama keskawẽ Deusũ hawẽ hãtxa shabakabi bebũkiri Judákiri inũ hatũ maewã Jerusalémkiri shabakabi unãmanikiaki.2 Hanu bari hawẽ henei ma kemaya
ha mati anu Senhor Deus kẽwãti hiwe hayakẽ
Deus hakiri hãtxakĩ mestẽwãshanikiki.
Ha mati binua anushũ hakiri pe shinãkĩ mati tibi binua anu
nawa shukua betsa betsapa beshãkanikiki.
3 Sião anu Senhor Deusũ yusiã tashni Jerusalém anu hawẽ hãtxa kaĩshanaiwẽ taea yurabu mirimahaira hanu hikitushitã yuikĩ:
“Senhor Deusũ Mati Sião anu nũ mapekenũ bekãwẽ,
Jacó mekenika Senhor Deusũ kẽwãti hiwe anurã.
Harishũ hawẽ pe hiweti shinãkiri nuku yusiãbu
ha bai keska hawẽ yusiã txibãkĩ
tapĩ nũ pepashãkanaii”, ika
bebirã bebirãshãkanikiki.
4 Hanushũ nawa shukua tibi Senhor Deusũ unãti wakubaĩshanikiki,
ha yurabu itxapahairabu hawawẽra ha imisbu
haratura pepa inũ haratubũra kaneaibu unãtã hatu pewakinã.
Hatu haska wa hanua habu maei betsairã,
hatũ nupe kenu txaipabu betsa wakĩ
hawẽ mai tsispubirãti washãkanikiki.
Ha inũ, hatũ txatxiti betsa wakĩ teshki matxatu washãkanikiki.
Ha haskaibutianã, ha yurabu ana hatũ detenameti mabu betsawẽ
ana tsuabe detenameama ishãkanikiki.
Ha inũ, detenametikiri ana tsuã hatu yusiãma ishanikiki.
5 Jacó enabuũ, Senhor Deusũ yusiã pepa shaba keska txibãbaini
hawẽ hiwei taeribainãkãwẽ!