Shanẽ ibuhaira Lemuelĩ unanepa hãtxakiaki, na hãtxarã
31
Eska hawẽ ewã yusiã nĩkanishũ shanẽ ibuhaira Lemuelĩ hatu kenemakubainikiaki.2 Kukaã, Deus ẽ yukakubaina
ea nĩkatã Deusũ mia ea bimaima
ẽ mia kainiwẽ taeshũ
hawa ana betsa mia yusĩpa?
3 Eska mia yusinũ ea nĩkairawe.
Aĩbuaibuwẽ kemukũkaini
shanẽ ibukĩ hatũ kushipa benumisbuwẽ taeshũ
aĩbuaibu txutakubaĩkĩ
mĩ kushipa benuyamakubaĩshãwẽ.
4 Kukaã, mia yuinũ ea nĩkawe.
Uva vinho inũ shia paepa itxapa
shanẽ ibubu inũ yununikabũ akubainaiburã,
haska pemaki.
5 Haskairã, paẽshũ nukũ yunuti inũ
hawẽ nemati hãtxa hakimatã
nuitapaibu mekeama hatu itxakawakubaĩtirubuki.
6 Ha shia paepa inũ vinho aki mawai inũ nuitapaiburã,
hau habũ besti anũbũ nemayamashãwẽ.
7 Shia inũ vinho aki
nuitapai inũ isĩ tenebiai
hawa ana shinãma hakimatirubuki.
8 Yununikabube tsuara hãtxapanãbũ
tsuãra hatu nemaibu miã hatu merabewakĩ ha hatu nuitapawaibu
hatu hãtxashũkũkaĩshãwẽ.
9 Mia shanẽ ibutanã,
nuitapaibu inũ habu huni pepa
hatu itxakawaibu hatu nemashũkĩ
yunuti pepa kushipawẽ unãti wakĩ
yunu pewakubaĩshãwẽ.
Aĩbuaibu pepabukiri hawẽ huni bake ana yusĩrianikiaki, na hãtxarã
10 Aĩbu duapa pepa bikatsi
benabaunarã, bikahairaki.
Hawaira hania mĩ betxitirumaki.
Ha aĩbu pepa haska mĩ betxitirurã,
hamapai dauti kushipa hawẽrua karuhaira binuhairaki.
11 Hawẽ benẽ hawẽ ainĩ hãtxa
haki txiti ikĩ ikũwãkubainaiwẽ taea
hawẽ hamapai dasibi hawẽ hiweti hayakubaĩmisbuki.
12 Shaba tibi hawẽ benimakatsi
hawẽ bene pe shinãshũkĩ
merabewaiwẽ taea hawẽ hiwea hirabiwẽ
hawẽ bene benimakũkaĩmiski.
13 Txashuwã dani lana inũ
shapu pepa benakĩ bitãshũ
hawẽ hiwe anu beshũ
hawẽ mekẽnẽ dayakĩ
lana inũ shapu turu akĩ
yumẽ wãtã timamiski, benimakinã.
14 Txaihairakea hukĩ shashu ewapawẽ mabu bemisbu keska wakĩ
txaihaira aĩbu kashũ piti betsa betsapa
hawenabu bishũtãtãmiski.
15 Penariama butukaĩ
hawenabu inũ hawẽ tsumabu
bawashũtã hatu pimamiski.
16 Hanu yunuti bai binũ ishũ uĩtã pekẽ
benimakĩ pei bikubaĩkĩ itxawashinawẽ bai bitã
hawẽ uva bai wamiski.
17 Haska watã hawẽ kushipawẽ dayai
ibubis shinã txãkaĩ benimai dayakũkaĩmiski.
18 Hawẽ tsumabu bariri pe hatu dayamabai
hari meshu merã dayakĩ hawẽ bĩ
hawaira nukawaismaki.
19 Hanushũ hawẽ mekẽnẽ ibubis yumẽ wãtã
tari wakĩ timakubaĩmiski.
20 Ha inũ, hawa hayabuma nuitapaibu merabewakĩ
haska yukaibu yaushiama hatu inãkubaĩmiski.
21 Hawenabu hatu matsi tari washuĩmawẽ taea
matsihairatiã dasibi yabukui peabũ
aĩbu pepa hatuwẽ dateismaki.
22 Hawẽ dayarã, ibubis dakukuti wakĩ inũ
batxi mayunepa hawẽrua watã sawekubaĩmiski.
23 Aĩbu dayakapawẽ taeshũ
hatũ mae anushũ hawẽ bene
dasibibũ unãkanikiki.
Ha dikabi hatũ mai pakea hirabi anushũ
shanẽ ibubũ hawẽ bene duawakĩ nĩkamisbuki.
24 Ha aĩbunã, tima tari txaipa inũ hawẽ nanesheketi timamis shũ
habu mabu inananaĩbu anu
hatu inãshũ pei bimiski.
25 Batxi pepa sawea keska wakĩ
kushipa inũ shinã pepawẽ shinaĩ
meshukiri hawara ishanai shinaĩ hawẽ nuikũkaĩsmaki.
26 Hãtxairã, unanepa hãtxawẽ hãtxakĩ
hatuwẽ nuikĩ hatu yusĩkubaĩmiski.
27 Habe hiwemisbũ hawara akubainaibu hatu shinãkĩ
hawẽ dayawẽ piti hatu bishũtã
hatubetã pikubaĩmiski.
28-29 Hawẽ bakebu inũ hawẽ benẽ kẽwãkĩ yuikĩ:
“Aĩbu pepa itxapabubiakẽ
mianã, dasibi mĩ hatu binuhairaki”,
akĩ yuikubaĩmisbuki.
30 Aĩbu natiã txipash hawẽ yura hawẽruabia
hawẽ shinã mĩ unãma hawẽ yurawẽ mia parãtiruki.
Ha inũ, hawẽ yura hawẽruabia hawaira atimapatiruki.
Hakia aĩbu betsa Senhor Deuswẽ datekĩ duawakĩ
pe shinãkubainai
ha aĩbukiri hawenabũ kẽwãkubaĩshãkanikiki.
31 Aĩbu pepa dayakapabu mae anu itxashũ
yura dasibibũ hau kẽwãkubainũbũwẽ,
haska hatu ashũkubaĩmis shinãkĩ yuikinã.