Deusũ duapa pepawenã, kẽwaĩ benimakũkaĩtikiaki, na nawati hãtxarã
Davĩ kãta kenenikiaki.
65
Deus mae Sião mekeatuũ,mĩ pepahairawẽ taeshũ mia kẽwãmisbuki.
Haska uĩkĩ mĩ betxipaiai mia yubatã
menenũ, iwanã, mia ashũkubaĩmisbuki.
2 Mai hirabi anu hiwebaunabũ mibe hãtxanũ ika bekanikiki.
Mibe hãtxakĩ mia yukaibu hatũ hãtxa nĩkakubaĩwẽ.
3 Nukũ txakabu tibitũ nuku tsumashũ bika tenemabiaya
miã ha txakabu betxipaiama nuku buashũkĩ mĩ ana shinaĩsmaki.
4 Haratura yura mĩ hiwe meribi anu mia dapi hiwemakĩ
katushũ mĩ iyua benimakũkaĩmiski.
Betsa betsapa pehairawẽ mĩ hatu duawarã,
mĩ hiwe meribi anua nũ pe hiwekatsis ikaii.
5 Mĩ nukũ mekenika Deusũnã,
pepa yunukĩ txakabu nemanishũ hawẽ mĩ kushipahaira nuku uĩmakĩ
e imakĩ mĩ nuku shabakabi hawẽ manakukubainaii.
Mai hirabi kesukauana anu inũ ianẽwã anu txaihaira hiweabũ
mia ikũwaĩ miki txiti ikabuki.
6 Mĩ kushipa paewẽ mati matipa
mĩ hatu tsuma pewakĩ mestẽwãmiski.
7 Ianẽwã betxuruni buspu tsaubirã
kũyã ikai nesewakĩ mĩ pes wamiski.
Yurabu hatũ mae anua itimaskaibu
nemakĩ mĩ hatu pes wariamiski.
8 Bari huaikiria inũ bari kaikiri txaihaira ha maiwẽ hiwebaunabu
mĩ e imati kushipahaira uĩ saki saki imisbuki.
Miwẽ benimai hiwebaunabu sai sai iriamisbuki.
9 Miã besti mai hirabi mekeshũ ui imakĩ dasibi mĩ benemamiski.
Miã hene bai tapia tibi txara txara imakĩ nashimakĩ
shekiwã trigo mĩ benemamiski.
Haska wakĩ yunu bai wabu tibi mĩ hatu pewashũmiski.
10 Miã mai pewakĩ uiwẽ mĩ babuwa dayakĩ
tsispubaĩkĩ ukebukũ mãtxĩbainabu
namakis ha bai tapiãwẽ hau kanũ ui itxapa mĩ habamamiski.
Haska wakĩ mibãbu mĩ hatu duawashũmiski, yunu itxapa hatu inãkinã.
11 Mĩ nai kuĩ itxapawẽ hatu duawakĩ
hawa yaushiama mĩ inãshinawẽ taea
ha yunu tsekati baritiã biaibu mirima mĩ hatu duawamiski.
12 Hanu tsua hiweabumanu basi benemakĩ duawakĩ mĩ nãke datãmiski.
Ha mati tenãmã yuinakapã mewe piti hayawakĩ
mĩ beyusti tari sawema keska wamiski.
13 Pãpa anu ma basĩ keyubia anu hanu txashuwanẽ pi itxamisbuki.
Napaku anu shekiwã tibi benei batxi pepa sawemisbu keskaki.
Haskawẽ taea dasibibu kãtai benimai sai sai imisbuki.