Deuswẽ yurabu benimamisbukiaki, na nawati hãtxarã
Davĩ kãta kenenikiaki.
63
Ẽ Deusuũ, mĩ ẽ Deuski!Mia ũpash manuai keska wakĩ
miki nukunũ ika ẽ mia bena txakayamaii.
Ha mai metu ũpash hayama anua nia keskashũ
ũpash manutxakayamai keskakĩ ẽ hiwea hirabiwẽ mia betxipaikĩ
ẽ mia benakubainaii.
2 Mĩ tari hiwe meribi meranua ẽ mia uĩkatsis ikaii,
mĩ kushipa inũ mĩ hawẽrua uĩ shinã txãkainã.
3 Mĩ nuikiparã, mĩ nuku hiwea inãni keskama binuaki.
Haskawẽ taeshũ ẽ huiwẽ ẽ mia kẽwãkubainaii.
4 Hiweyukũkaĩkĩ ẽ mia duawakubainaii.
Mikiri ẽ mekẽ meshã ẽ mibe hãtxakũkainaii.
5 Piti itxapa hawẽrua watã pi benimai shinã txãkaĩ
pepemisbu keskakĩ ẽ huiwẽ benimakĩ ẽ mia kẽwãkubainaii.
6 Meshu merã inatã ushakĩ mia shinãkubaini ẽ ushamiski.
7 Mĩ ẽ merabenãtũ ea merabewa benimai mĩ pũyãwẽ mĩ ea yabukĩ akawa ẽ shinã txãkãmiski.
8 Ẽ hiwea hirabirã, ẽ miki dasiaki.
Mĩ ea haska wawẽ taeshũ mĩ mekẽ yusiuriawẽ ea tsuma
mestẽwãtã mĩ ea putaismaki.
9 Tsuabũra ea detekatsis ikĩ benaiburã, habu mawa
hatu maiwaburã, hatũ kupitirã, mai uke merãhaira bumisbuki.
10 Matxatu kenu txaipawẽ hatu tenãbu
kamã inawã pikĩ hatu yamawakubaĩmiski.
11 Ẽ shanẽ ibuhairarã, ẽ Deus shinaĩ ẽ benimakũkaĩmiski.
Tsuabũra Deusũ kena datã aki
hakiri kãtakĩ kẽwãkubaĩmisbuki.
Hakia tsuabura hãtxai txanitxakaiburã,
hatũ kesha Deusũ hatu bepumiski.