Senhor Deusrã, nukubekiaki, na nawati hãtxarã
Corá bakẽ kãta kenenikiaki
46
Hawara bikahaira nũ teneai nukũ Deusũ nuku merabewamiski.Nuku keshekĩ nuku arua tsuã nuku metiruma
Deus nukũ kushipahairaki.
2 Patxa sakukĩ mai txurũwãkĩ
ha mati tibi tsekebaĩ ianẽwã nuahaira merã pukui keyubiaya
nũ hawẽ taea nũ hawa dateama ishanaii.
3 Ianẽwã shubi buspu tsaubirani hawẽ hui kaĩ meseai nĩkabiai
nũ hawa dateama ishanaii.
Mai mati matipa sinatai patxa sakui saki saki iki mesehairabiaya
nũ hawa dateama ishanaii.
4 Hene ewapa teshesha daberã, haburã, Deusũ mae hawẽ benimakanikiki.
Deus dasibi binuatũ mae meribi txakabumahaira hawẽ benimaikiki.
5 Ha mae merã Deus hiweshũ hatu tsuma keyuaki.
Shaba betsa tashniai tibi Deusũ merabewakubainikiki.
6 Deusũ hawẽ hãtxa nawa tibi hatu nĩkamaitiã
datei saki saki iki hatũ hui dẽke ishãkanikiki.
Mai yamakainaya shanẽ ibu tibitũ hatũ kushipa benushãkanikiki.
7 Ha nukũ Senhor Deus dasibi kushipa binu keyua na habia nukubeki.
Jacó Deusũnã, nuku keshekĩ nuku arua tsuã nuku metirumaki!
8 Senhor Deusũ hawẽ kushipawẽ na mai anushũ nawabu hatu dateakeakeimarã,
neri beshũ uĩ bekãwẽ.
9 Mai kesuakea anua hatube detenamekĩ
hatũ pia tekekĩ hatũ hashi teke keyukĩ
hanushũ hatũ detenameti cavalo tarãmabaĩti
ana tsuabe detenametirubuma wakĩ hawẽ henekĩ txiwẽ hatu menũ keyuimaki.
10 “Ea kẽwãkĩ ea unãti wakãwẽ!”
Earã, ẽ Senhor Deuski!
Hiwebaunabu mamaki ẽ ea hiweaki!
Mai hirabi mamaki ẽ niaki!
11 Ha nukũ Senhor Deus dasibi kushipa binu keyua na habia nukubeki.
Jacó Deusũnã, nuku keshekĩ nuku arua tsuã nuku metirumaki!