Senhor Deusrã, ẽ shaba inũ ẽ mekenikaki, na nawati hãtxarã
Davĩ kãta kenenikiaki
27
Senhor Deus ẽ shaba keska hatũ ea mekemiswẽ taeaana hamapai betsaki ẽ dateamaki.
Ẽ hiwea Deusũ ea keshekubaĩmiswẽ taea
ana tsuki ẽ dateamaki.
2 Huni txakabubu eki sinatabirã ea atxishũ yamawanũ ika ibiabiranaibu
habu huti itã tĩ iki di imisbuki.
3 Detenamenikabu itxatã ea keshebiabaunabũ
huĩti bene bene iki ẽ hawa hatuwẽ dateamaki.
Ea detenũ itã ekiri detenamenikabu benibiabiranaibũ
ẽ shanẽ ibuki txiti ika babuama ẽ unanuma hiwekũkainaii.
4 Senhor Deusuũ, eska bestikiri ẽ mia yukaii, haska ẽ betxipaiairã.
Senhor Deusuũ, bari tibi ẽ hiweawẽ mĩ hiwe merãshũ
mĩ kushipa hawẽrua shinãkĩ ẽ mia kẽwãkatsis ikaii.
5 Shaba betsatiã bika sharabu ẽ teneaya
mĩ hiwe merã ea hunekĩ arutã
mĩ ea mekekubaĩshanaii.
Hanua tsuã ea metirumanu mistutã mĩ ea pashawatiruki.
6 Eki sinataibu mĩ kushipawẽ ma mĩ ea hatu binuma
hanua tashnikauã has shinãma
mĩ hiwe merãshũ inãkuĩ mia kua keyushũkĩ
mia kẽwaĩ benimahairai kãtakĩ ẽ mia nawashũshanaii.
7 Senhor Deusuũ, ẽ mia kenai ea nĩkawe.
Ewẽ dabanã ikĩ ea kemawe.
8 Ẽ huĩtinĩ mikiri ea yuikĩ:
“Senhor Deus benai haki nukuwe”, ea wa
haskawẽ taeshũ miki nukunũ, iwanã, mĩ ẽ Deus ẽ mia benaii.
9 Miarã, habia mia besti mĩ ẽ Deus mekenãwẽ taeshũ ea heneyamawe.
Eki dakei hunei iruyamawe.
Ha inũ, eki sinatakĩ ea danãyamawe,
miã besti mĩ ea merabewamiswẽ taeshunã.
10 Ẽ ibubũ ea putabiabainabũ Senhor Deusuũ,
ea hawa heneama mĩ ea mekekubaĩshanaii.
11-12 Senhor Deusuũ, natiã eki sinataibu
hamẽ ekiri txanitxakai itimaskabirã ea atxikatsis ikaibu
haska shinaĩbu keska ea hatu yunuyamawe.
Hakia mĩ bai pepa ea unãmakĩ hawẽ ea iyuwe, ẽ hawẽ kanunã.
13 Ea ẽ hiwekũkaĩmiswẽ taeshũ
haska Senhor Deusũ hawenabu hawẽ duapa hatu uĩmakubaĩmis
ẽ haki nukushanai ẽ unaiĩ.
14 Senhor Deuski mestẽtã hawẽ kushipai punu nukama
hawẽ shinã betxipaikĩ hawa txĩtuãma haki mestẽkubaĩkãwẽ.